بيىلعى جىلى 20 مىڭنان استام شەتەلدىككە قازاقستاندا جۇمىس ىستەۋگە رۇقسات بەرىلدى
ونىڭ ىشىندە ءبىرىنشى ساناتقا (باسشىلار مەن ولاردىڭ ورىنباسارلارى) 816، ەكىنشى ساناتقا (قۇرىلىمدىق بولىمشەلەردىڭ باسشىلارى) 4595 رۇقسات شىعارىلدى. شەتەلدىك جۇمىس كۇشىن (ش ج ك) تارتۋعا ارنالعان رۇقساتتاردىڭ كوپ بولىگى ءۇشىنشى (ماماندار) جانە ءتورتىنشى (بىلىكتى جۇمىسكەرلەر) ساناتتارىنا بەرىلدى - سايكەسىنشە 9656 ادام جانە 1769 ادام. سونداي- اق ماۋسىمدىق جۇمىستارعا - 2156، كورپوراتيۆتىك اۋىسىم اياسىندا 1565 ادام تارتىلعان.
قازىرگى ۋاقىتتا قازاقستاندا ش ج ك پايدالاناتىن 2210 جۇمىس بەرۋشى بار. ولاردا قازاقستاننىڭ 518,8 مىڭعا جۋىق ازاماتى جۇمىس ىستەيدى، بۇل قىزمەتكەرلەردىڭ جالپى سانىنىڭ % 96- ىن قۇرايدى.
ەڭبەكشى ميگرانتتاردىڭ نەگىزگى شىققان ەلدەرى قىتاي - 4397 ادام، وزبەكستان - 2254 ادام، ءۇندىستان - 1819، تۇركيا - 1845، ۇلى بريتانيا - 1420 ادام.
ىشكى ەڭبەك نارىعىن قورعاۋ ماقساتىندا قازاقستان رەسپۋبليكاسىنىڭ ۇكىمەتى جىل سايىن رەسپۋبليكاعا شەتەلدىك مامانداردى تارتۋعا كۆوتا بەلگىلەيتىنىن ەسكە سالا كەتكەن ءجون.
2019 -جىلعا شەتەلدىك جۇمىس كۇشىن تارتۋ كۆوتاسى رەسپۋبليكانىڭ ەكونوميكالىق بەلسەندى حالقىنىڭ 0,54 پايىزى (شامامەن 48,7 مىڭ ادام) دەڭگەيىندە بەلگىلەندى.
