جەتىسۋعا كەلگەن التايلىقتار استانانىڭ 20 جىلدىعىن تويلادى
وسىعان وراي تەكەلى قالاسىندا «سلاۆيان مادەنيەتى مەن جازۋى» كۇندەرىنە ارنالعان اۋقىمدى فورۋم ۇيىمداستىرىلدى. «استانا - ارمان قالا» دەپ اتالعان فەستيۆالگە التايدان قوناقتار كەلىپ، جەتىسۋلىق اعايىنمەن رۋحاني بايلانىس ورناتتى، دەپ حابارلايدى قازاقپارات ءتىلشىسى.
التايدان الاتاۋعا بەت العان سلاۆيان وكىلىنىڭ ءبىرى سەرگەي موزگوۆوي. اعاشقا جان بىتىرگەن شەبەر بىرنەشە تۋىندىسىن تەكەلىگە ارنايى الىپ كەلىپ، كورمەگە قويدى. بارناۋىلدان كەلگەن قوناق 14 جاسىنان باستاپ اعاشتان ءتۇيىن تۇيۋگە ماشىقتانعانىن ايتادى. سوزىنشە، ونىڭ كەي تۋىندىلارى رەسەي پرەزيدەنتىنىڭ جەكە مۇراجايىندا ساقتالعان.
«التاي ولكەسىنەن جەتىسۋعا 8 ادام كەلدىك. تەكەلى قالاسىنا ءبىرىنشى رەت كەلىپ تۇرمىز. استانانىڭ 20 جىلدىعىنا ارنالعان سلاۆيان مادەنيەتىنىڭ فورۋمىنا قاتىسقانىمىزعا وتە قۋانىشتىمىز. استانا جايناي بەرسىن. استاناعا قاراپ، ءبىز قازاقستاننىڭ دامۋىن كورىپ جاتىرمىز»، - دەدى شەبەر سەرگەي موزگوۆوي.
جەتىسۋ جەرىندە «سلاۆيان مادەنيەتى مەن جازۋى» كۇندەرىنە ارنالعان فورۋم جىلدا ۇيىمداستىرىلادى. داستۇرگە ارنالعان شارا بيىل تەكەلى قالاسىندا ءوتىپ، كەشتە ەكى ەلدىڭ سلاۆياندارى جينالعان قاۋىمعا ونەرلەرىن پاش ەتتى.
«ۇلتارالىق، ەتنوسارالىق دوستىقتى نىعايتۋ. ءار ۇلتتىڭ ءوزىنىڭ مادەنيەتىن، جازباسىن، تاريحىن، سالت- ءداستۇرىن دارىپتەۋ، سونى ۇرپاقتان- ۇرپاققا جالعاستىرۋ. سونىڭ ارقاسىندا ۇلتتاردىڭ اراسىندا قارىم- قاتىناستى، دوستىقتى نىعايتۋ بولىپ تابىلادى»، - دەدى تەكەلى قالاسىنىڭ اكىمى باحتيار ونەربايەۆ.
رەسەي سلاۆياندارى استانانى جاس قالا رەتىندە تانيتىندارىن ايتادى. الىستا بولساقتا باس قالانىڭ قارىشتاپ دامۋىنا كۋامىز، - دەيدى التايدان كەلگەن قوناقتار.
