استانانىڭ 20 جىلدىق مەرەكەسى شەنەۋنىكتەرگە ەمەس، حالىق ءۇشىن جاسالادى - داۋرەن ابايەۆ
«استانانىڭ 20 جىلدىعى شەنەۋنىكتەر ءۇشىن ەمەس ەڭ الدىمەن، ەلوردا تۇرعىندارى ءۇشىن مەرەكە سانالادى جانە بۇل - ەڭ باستىسى دا. باسا نازار اۋدارتقىم كەلگەن تاعى ءبىر ماسەلە، بۇل بيۋدجەت بىرنەشە مەملەكەتتىك ورگانداردان شوعىرلاندىرىلعان. كوپشىلىك ايتىپ جۇرگەندەي، بۇل ەشقانداي دا كرەديتتىك اقشا ەمەس. مەنىڭشە، بۇگىنگى كۇنگە ساي كەلەتىن باعا جانە بۇل رەتتە ەشقانداي پروبلەما بولماۋى ءتيىس. تەكسەرۋشى ورگاندار كەز كەلگەن ۋاقىتتا اتالعان قاراجاتتىڭ ماقساتقا ساي شىعىندالۋىن تەكسەرە الادى»، - دەدى مينيستر ۇكىمەت وتىرىسىنان كەيىن ب ا ق وكىلدەرىنىڭ ەلوردانىڭ 20 جىلدىعىن اتاپ وتۋگە بولىنەتىن قارجى كولەمىنە قاتىستى قويعان ساۋالىنا وراي.
سونىمەن قاتار ول وڭىرلەردىڭ ەلورداعا سىيلىقتارىنا قاتىستى دا پىكىر ءبىلدىردى.
«سامال شاعىن اۋدانى مەن ساياباق اراسىندا سالىنىپ جاتقان ۆەلوسيپەد جانە جاياۋ جۇرگىنشى جولى استانا قالاسىنىڭ اكىمى ءۇشىن ەمەس، وسى ەلوردانىڭ تۇرعىندارى مەن قوناقتارى ءۇشىن، ءبىرىنشى كەزەكتە بالالار ءۇشىن، سىزدەردىڭ بارلىقتارىڭىز ءۇشىن سالىنادى. ەلوردا كۇنى مەرەكەلەنىپ بىتە سالىسىمەن سىزدەر جۇمسالعان قاراجاتتى بىردەن ەستەن شىعارىپ، ونداعان جىلدار بويى سول كوپىردى پايدالاناسىزدار. سوندىقتان دا دۇرىس ەكپىن بەرەيىك»، - دەدى داۋرەن ابايەۆ.
مينيستر مىسال رەتىندە مەملەكەت باسشىسىنىڭ 5 الەۋمەتتىك باستاماسىن جۇزەگە اسىرۋ ءۇشىن 2,5 تريلليون تەڭگە قاراجات جۇمسالاتىندىعىن اتاپ ءوتتى.
«قاي مەملەكەتتە ستۋدەنتتەرگە ارنالعان جاتاقحانا سالىنۋدا؟ تۇرعىن ءۇي بويىنشا مۇنداي اۋقىمدى باعدارلاما قايدا قابىلدانعان؟ سىزدەر بۇل جايىندا ايتپايسىزدار، ەكپىن قويمايسىزدار. تولىقتاي العاندا 19 ميلليارد تەڭگەنى قۇرايتىن بۇل سوما شوعىرلاندىرىلعان، ءتۇرلى مەملەكەتتىك ورگانداردىڭ ءارتۇرلى باعدارلامالارىنان تۇرادى»، - دەپ ءتۇسىندىردى ول.
اۆتور: مارلان جيەمباي
