استانانىڭ 20 جىلدىعى: رەسپۋبليكالىق راديو ءمۇشايرا وتەدى
راديو ءمۇشايرا استانانىڭ 20 جىلدىعىنا ارنالىپ وتىر. ونىڭ ماقساتى - استانانىڭ الەم مەن ەل الدىنداعى ماڭىزىن، الار ورنىن، دامۋ ساتىلارىن ولەڭگە ارقاۋ ەتە وتىرىپ، ەلباسىنىڭ ەڭبەگىن كورسەتۋ. سول ارقىلى ەلدى، جەردى، وتاندى قۇرمەتتەۋدىڭ ۇلگىسىن وسكەلەڭ ۇرپاقتىڭ ساناسىنا ءسىڭىرۋ.
«راديو ءمۇشايرا مەملەكەتتىك تىلدە وتەدى. ءمۇشايراعا قاتىساتىن اقىن «ەڭسەلى ەلوردام» جانە «ەلتۇتقا - ەلباسى» دەگەن تاقىرىپتى قامتيتىن ەكى ولەڭ جولداۋى كەرەك. ءار ولەڭنىڭ كولەمى 10 شۋماقتان اسپاۋى ءتيىس. راديو ءمۇشايراعا 18 بەن 35 جاس اراسىنداعى اقىندار قاتىسادى. ءمۇشايراعا ۇسىنىلعان جىر مارجانىن ساراپتاۋ ءۇشىن تاۋەلسىز قازىلار القاسى جاساقتالادى. ىرىكتەۋدەن وتكەن ولەڭدەر قازاق راديوسىنىڭ ەفيرىنەن وقىلادى»، - دەپ حابارلاندى مينيسترلىكتىڭ باسپا ءسوز قىزمەتىنەن.
رەسپۋبليكالىق راديو ءمۇشايرا ارنايى حابار رەتىندە راديو ەفيرىنە قويىلادى. ناقتىراق ايتقاندا، جيىلىگى اپتاسىنا ءبىر رەت، ۇزاقتىعى 10 مينۋتقا سوزىلماق.
راديو ءمۇشايراعا قاتىساتىن اقىندار ولەڭدەرىن [email protected] ەلەكتروندى پوشتاسىنا جىبەرۋى ءتيىس. ەش جەردە جاريالانباعان ولەڭدەر 2018-جىلعى 16- ءساۋىر مەن 16- مامىر ارالىعىندا قابىلدانادى. ءمۇشايرانىڭ قورىتىندىسى استانا كۇنى قارساڭىندا جاريالانادى. ۇزدىك دەپ تانىلعان ولەڭدەر ارنايى جيناققا ەنەدى. سونىمەن قاتار ۇزدىك ولەڭدەر اۋديو ديسكىگە جازىلادى. ەڭ ۇزدىك 5 اقىننىڭ ولەڭىنە «قازاقستان» ۇلتتىق ارناسى بەينەسيۋجەت ءتۇسىرىپ، ەفيردەن بەرەدى.
راديو ءمۇشايرا قورىتىندىسى بويىنشا جەڭىمپازدارعا قارجىلاي جۇلدە، سەرتيفيكات، ديپلوم بەرىلەدى. اتاپ ايتقاندا، 1- ورىنعا (1 جۇلدەگەر) 500 مىڭ تەڭگە، 2-ورىنعا (2 جۇلدەگەر) 300 مىڭ تەڭگەدەن، 3-ورىنعا (2 جۇلدەگەر) 200 مىڭ تەڭگەدەن تابىستالادى. ءمۇشايرانىڭ قورىتىندى پوەزيا كەشى «قازاقستان» ورتالىق كونسەرت زالىندا وتەدى.
اۆتور: ايان بەكەن ۇلى
