ءبىر جاسار ۇلىن 20 مىڭ دوللارعا ساۋدالاعان ايەل ماسكەۋدە ۇستالدى
استانا. قازاقپارات - ماسكەۋ تەرگەۋشىلەرى ءبىر جاسار ۇلىن 20 مىڭ ا ق ش دوللارىنا ساتپاق بولعان 33 جاستاعى كەلىنشەكتى ۇستادى، دەپ حابارلايدى قازاقپارات رەسەيلىك تاسس اگەنتتىگىنە سىلتەمە جاساپ.
ر ف تەرگەۋ كوميتەتى ماسكەۋ قالاسى بويىنشا باسقارماسى باسشىسىنىڭ اعا كومەكشىسى يۋليا يۆانوۆانىڭ ايتۋىنشا، كەلىنشەككە ر ف قىلمىستىق كودەكسى 127-بابىنىڭ 2-بولىگىنە سايكەس «ادام ساۋداسى» بويىنشا ايىپ تاعىلعان. «تەرگەۋ نۇسقاسى بويىنشا، 2017 -جىلدىڭ جەلتوقسان ايىندا ايەل ادام قازاقستان رەسپۋبليكاسىنىڭ الماتى قالاسىندا بولعان كەزىندە الەۋمەتتىك جەلىدەگى توپتاردىڭ بىرىنە 2017 -جىلى تۋعان بالاسىن اسىراپ الاتىن ادامداردى ىزدەيتىنى تۋرالى حابارلاما قالدىرعان. ول بالاسى ءۇشىن 20 مىڭ دوللار سۇراعان»، - دەيدى ي. يۆانوۆا.
5 -ساۋىردە كەلىنشەك ماسكەۋگە كەلگەن. وزدەرىن ساتىپ الۋشى رەتىندە تانىستىرعان تەرگەۋشىلەرگە جولىققان ايەل بالادان باس تارتاتىنى جونىندە قولحات جازىپ بەرگەن. بۇدان كەيىن ولار اقشانى الۋ ءۇشىن بانككە بارعان جەرىندە ايەلدىڭ قولىنا كىسەن سالىنعان. قازىر ۇل بالا بالالار ۇيىنە ورنالاستىرىلدى.
«تەرگەۋ بارىسىندا تەرگەۋشىلەر قازاقستان رەسپۋبليكاسىنان كۇدىكتىنىڭ مەكەنجايىن جانە جاۋاپ الۋ ءۇشىن تۋىستارىن، سونداي-اق بالانىڭ بيولوگيالىق اكەسىن تابۋعا قۇقىقتىق كومەك كورسەتۋگە سۇرانىم جىبەرۋگە نيەتتى. تاياۋ ارادا كەلىنشەككە قاماۋعا الۋ تۋراسىندا بۇلتارتپاۋ شاراسى قولدانىلادى»، - دەيدى ي. يۆانوۆا.
