ءدىنىن 20 تيىنعا ساتا جازداعان ادام

استانا. قازاقپارات - ءبىر مۇسىلمان جۇمىس بارىسىمەن لوندون قالاسىنا كوشىپ كەلەدى.

ىڭعايلى بولعاننان كەيىن نەگىزىنەن قوعامدىق كولىكپەن ءجۇرۋدى ادەتكە اينالدىرادى.

ەڭ قىزىعى، ول ۇنەمى ءبىر اۆتوبۋسقا ءمىنىپ، ءبىر جۇرگىزۋشىگە كەز بولاتىن.

ارادا بىرنەشە اپتا وتەدى. جۇمىسقا كەتىپ بارا جاتقان مۇسىلمان جىگىت ادەتتەگى اۆتوبۋسىنا وتىرادى. جول اقىسىن تولەپ، ورنىنا وتىرعاننان كەيىن عانا كولىك جۇرگىزۋشىسىنىڭ 20 تيىن ارتىق بەرىپ قويعانىن بايقايدى. مۇسىلمانعا ىشىنەن ءبىر داۋىس: «تيىندى قايتار! بۇل سەنىڭ حاقىڭ ەمەس» دەسە، ەكىنشى ءبىر داۋىس: «ەشكىم بايقامايتىن بولماشى تيىن عوي. اۆتوبۋس مەكەمەسى حالىقتان قانشاما اقشا الىپ جاتىر، سەنىڭ تيىنىڭا قاراپ قالماعان شىعار... وزىڭە قالدىر دا، اللانىڭ سىيلىعى دەپ ءبىل» دەيدى.

اۆتوبۋس ايالداماعا توقتايدى، ال مۇسىلمان شىعىپ بارا جاتادى. ەسىككە جەتىپ قالعاندا كىلت توقتاپ، جۇرگىزۋشىگە بۇرىلىپ: «ءسىز ماعان ارتىعىمەن قايىرىپسىز» دەپ، 20 تيىندى قايتا ۇسىنادى. اقشانى الىپ تۇرعان اۆتوبۋس جۇرگىزۋشىسى جىميا قاراپ: «ءسىز ءبىزدىڭ ەلگە جاڭادان كوشىپ كەلگەن مۇسىلمان ەمەسسىز بە؟ يسلام جايلى ءبىلۋ ءۇشىن، سىزدەردىڭ مەشىتتەرىڭىزگە بارىپ جۇرگەن جايىم بار. شىندىعىندا، ءسىزدى تەكسەرۋ ءۇشىن اقشانى ادەيى ارتىعىراق بەرگەن ەدىم» دەيدى.

اۆتوبۋستان تۇسكەن مۇسىلمان قورقىنىشتان قول-اياعى دىرىلدەپ، قۇلاپ قالا جازدايدى. جاقىن تۇرعان باعانعا سۇيەنگەن كۇيى كوز جاسىن توگىپ، كوككە قاراپ: «ۋا، اللا! سەنىڭ ءدىنىڭدى 20 تيىنعا ساتا جازدادىم عوي! كەشىر مەنى!» دەپ دۇعا قىلادى.

باۋىرلار! راسىمەن دە، يسلامدى باسقالارعا كوركەم تۇردە كورسەتىپ، ادىلدىگىمىز بەن شىنشىلدىعىمىز ارقىلى ولارعا ۇلگى بولۋدىڭ ورنىنا، جوعارىداعىداي جاعدايعا ءتۇسىپ جاتامىز. قانداي ءسات، قانداي كەزەڭ بولماسىن، اللانىڭ ءبىزدى توبەمىزدەن باقىلاپ تۇرعانىن ۇمىتپايىق!

 

دەرەككوزى:  islam.kz