زامانبەك ءنۇرقادىلوۆ وزىنەن 20 جاس كىشى ماقپالعا ماحابباتىن قالاي دالەلدەدى؟

باستاپقىدا اكە مەن قىزى رەتىندە سىيلاسقان جۇپتىڭ اراسىندا ماحاببات وتى قالاي پايدا بولدى؟

بۇل سۇراقتىڭ جاۋابىن ءانشى «Hit TV» ارناسىنا بەرگەن سۇحباتىندا ايتتى.

«ءبىز ءبىر جىل بويى قىزى مەن اكەسىندەي ءومىر سۇردىك. مەن مىسالى باتا المادىم. ءبىراق ەركەك ادامدار وندايعا مىقتى كەلەدى عوي، ال مەن باتا المايتىنمىن. ءبىر اعام سياقتى، تۋىسىم سياقتى سىيلاپ، «ءسىز-ءسىز» دەپ ءجۇردىم. ءسويتىپ ءجۇرىپ زاكەڭ دالەلدەدى عوي ماحابباتىن»، - دەيدى بىلدەي ءبىر قالا اكىمىن وزىنە قاراتقان ءانشى.

«شەشەمىز ايتاتىن ەر-ازاماتتىڭ ايەلدەن ەڭ بولماعاندا بەس جاس ۇلكەن بولۋى كەرەك دەيتىن. زاكەڭ دە مەنەن جيىرما جاس ۇلكەن، سولاي كەزدەستى. باسىندا شوشىعانمىن... «جيىرما جاس ۇلكەن، قالاي مەن ول كىسىمەن تۇرامىن؟»، - دەيتىنمىن. ءبىراق كەيىننەن ۇيرەنىسىپ كەتتىك قوي. ول كىسى جاسارا باستادى، مەن قارتايا باستادىم. سولاي بولادى ەكەن ءوزى. ۇلكەن كىسى جاس قىزدى العان كەزدە سەنىڭ جاس گورموندارىڭ سوعان كەتەدى ەكەن، ۇلكەن كىسىنىكى ساعان كەلەدى.

سەنى جاقسى كورىپ تۇرعان ادامنىڭ ماحابباتىن سەزەسىڭ عوي. ول كىسى ماعان حاتى ارقىلى، ادەمى-ادەمى اشىق حاتتارى ارقىلى حات جولداپ تۇردى. ونىڭ ارتىنا «ازامات» جانە ت. ب. لاقاپ اتىن جازىپ قوياتىن. ول كىسى قالانىڭ باستىعى بولدى عوي. ءوزىن جاسىرعىسى كەلدى مە، ايتەۋىر سولاي جازاتىن. سىيلىقتار جىبەرىپ تۇردى.

مەنەن ەندى جيىرما كويلەك بۇرىن توزدىرعان ادام. كوپ وقىعان، كوپ بىلەدى، وقۋدى قىزىل ديپلوممەن بىتىرگەن وتە سابىرلى، دانا كىسى. ول كىسى ماعان ەسسىز عاشىق بولىپ قالدى. ونىڭ ماعان دەگەن سەزىمىن كورگەن سوڭ مەن دە كەيىننەن عاشىق بولىپ، اياعىنا قۇلادىم. ول كىسىنىڭ قيىندىعىنا بىرگە كونىپ، قۋانىشىنا بىرگە قۋانىپ، سۋىعىنا بىرگە ءتوزدىم»، - دەدى ول.

وسىلايشا، ءوزىنىڭ ءومىرى مەن ماحابباتىنان سىر اقتارعان ول قىز-كەلىنشەكتەرگە سابىرلى بولۋى كەرەك ەكەنىن ايتتى.