وڭتۇستىك قازاقستان اكىمى 20 جاسقا «ۇزدىك جاستار پرەمياسىن» تابىستادى - فوتو
جاستاردىڭ اراسىندا مادەنيەتتىلىك پەن ادەپتىلىكتى قالىپتاستىرۋ ماقساتىندا ۇيىمداستىرىلعان كەشتە وبلىس اكىمى ءسوز الىپ، بارشا وڭتۇستىك قازاقستاندىق ستۋدەنت جاستاردى بۇگىنگى مەرەكەمەن قۇتتىقتاپ، ىستىق لەبىزىن جەتكىزدى.
«ەلىمىزدە قاي كەزدە بولماسىن جاستارعا، جاس ماماندارعا ۇلكەن سەنىم ارتىلىپ، جاستاردىڭ وسۋىنە كوپتەگەن جاعدايلار جاسالۋدا. مەملەكەت باسشىسىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسى ۇلتتىق رۋحانياتتىڭ جاڭا تۇعىرى دەسەك، ونى جۇزەگە اسىرۋ ءبارىمىزدىڭ الدىمىزدا تۇرعان باستى ماقسات. بۇگىندە ۇلىستىڭ ۇيىتقىسى اتانعان - ءوڭىرىمىزدى جان-جاقتى دامىتۋ جولىندا جىگەرلى جاستارىمىزدىڭ ۇلەسى بار، ءالى دە كوپ ەڭبەك ەتىپ، وبلىستىڭ دامۋىنا سۇبەلى ۇلەس قوساتىندارىڭىزعا سەنىمدىمىن. سىزدەرگە تەك ەڭبەكتە عانا ەمەس، تاۋەلسىز ەلىمىزدىڭ ماقتانىشىنا اينالىپ، بارلىق سالالاردا ۇلكەن جەتىستىكتەرگە جەتۋلەرىڭىزگە شىن جۇرەكتەن تىلەكتەسپىن»، - دەدى اكىم.
مۇنان بولەك، وبلىس اكىمى جىل بويى ءتۇرلى سالالاردا وزىندىك ۇلەس قوسىپ جۇرگەن 20 كوشباسشى جاسقا 15 نوميناتسيا بويىنشا «ۇزدىك جاستار پرەمياسىن» تابىستادى.
سالتاناتتى كەشتە ارنايى دايىندىقتان وتكەن 22 جۇپ ءبي كەشىنە ارنالعان سالتاناتتى كيىمدەرىن كيىپ، ۆەنا ۆالسىن بيلەدى. ولار ءبي الاڭىن ناعىز ۆەنالىق ەرتەگى الەمىنە اينالدىرعانداي اسەر قالدىردى. ءىس-شاراعا وبلىستىق ءماسليحات دەپۋتاتتارى، جوعارى جانە ارناۋلى ورتا وقۋ ورىندارىنىڭ باسشىلارى مەن بەلسەندى جاستار، جۇمىسشى جاستار ۇيىمى مەن ەرىكتى جاستار جالپى سانى 500 دەن استام ادام قاتىستى. سونىمەن قاتار، مەرەكە قارساڭىندا بۇگىن «جاستار رەسۋرستىق ورتالىعى» عيماراتىندا «وڭتۇستىك» جاستار تەاترىنىڭ تالانتتى ونەر يەلەرى وزبەك دراماتۋرگى ح. حۋرسانوۆتىڭ «ولدىك تە، قۇرمەتتى بولدىق» اتتى تاربيەلىك ءمانى زور كومەديالىق جانرداعى قويىلىمىن ۇسىندى.
ايتا كەتەيىك، وبلىستاعى 12 جوعارى وقۋ ورنىندا 44860 ستۋدەنت، 91 ورتا، ارناۋلى وقۋ ورىندارى مەن كوللەدجدە 70885 ستۋدەنت ءبىلىم الادى. ياعني، وڭىردە 115 مىڭنان استام ستۋدەنت بار.
