اقمولا قالاسىن ەل استاناسى دەپ جاريالاعان جارلىققا 20 جىل تولدى
ەل استاناسىن وزگەرتۋ تۋرالى باستى جارلىقتان كەيىن 1997-جىلدىڭ 8- قاراشاسىندا قازاقستان رەسپۋبليكاسىنىڭ مەملەكەتتىك رامىزدەرىنىڭ ەتالوندارى - تۋ، ەلتاڭبا جانە پرەزيدەنت شتاندارتى اقمولاعا اكەلىندى. ارادا 1 ايدان استام ۋاقىت وتكەن سوڭ ق ر پرەزيدەنتى نۇرسۇلتان نازاربايەۆتىڭ قاتىسۋىمەن پارلامەنت پالاتالارى مەن ۇكىمەتتىڭ بىرلەسكەن وتىرىسى ءوتتى.
وندا ەل ورتالىعىنىڭ اقمولاعا كوشىرىلگەنى ايتىلىپ، ءدال سول كۇنى نۇرسۇلتان نازاربايەۆ اقمولا قالاسى رەسمي تۇردە مەملەكەت استاناسى بولاتىنىن جاريالادى.
1998-جىلدىڭ 6- مامىرىندا ەل پرەزيدەنتىنىڭ جارلىعىمەن اقمولا قالاسىنىڭ اتى استانا بولىپ وزگەرتىلىپ، سول جىلدىڭ 10- ماۋسىمىندا قالانىڭ قازاقستان رەسپۋبليكاسىنىڭ استاناسى رەتىندەگى رەسمي تۇساۋكەسەرى ءوتتى.
سودان بەرگى 20 جىلدىڭ ىشىندە استانا الەمدەگى ەڭ كوركەم شاھارلاردىڭ بىرىنە اينالدى. قازاقستاننىڭ شىعىسى مەن باتىسىنان، وڭتۇستىگى مەن سولتۇستىگىنەن ارقاعا كوشكەن القالى جۇرت ەل ورتالىعىنىڭ حالقىن جىلدان جىلعا ارتتىرىپ، استانا بىلتىر ميلليونىنشى تۇرعىنىنىڭ دۇنيەگە كەلگەنىن جاريا ەتتى.
قازىر استانا ەۋروپا مەن ازيانى بايلانىستىرىپ تۇرعان التىن كوپىر ىسپەتتەس. ابىرويى كۇننەن كۇنگە ارتىپ، «ەكسپو-2017» مامانداندىرىلعان حالىقارالىق كورمەسىن لايىقتى دارەجەدە وتكىزدى.
استانا - تاۋەلسىز قازاقستاننىڭ سيمۆولى. تاريحتىڭ جاڭا مىڭجىلدىعىنا قازاقستاننىڭ ورتالىعى بولىپ ەنگەن شاھار وركەندەۋ جولىندا ءوز قارقىنىنان تايماي كەلەدى.
اۆتور: ايان بەكەن ۇلى
