اكەسى: ديماشتىڭ جۇرت بىلمەيتىن 20 شاقتى ءانى بار

استانا. قازاقپارات - ديماشتىڭ اتا- اناسى كوپشىلىك بىلە بەرمەيتىن قابىلەتى تۋرالى ايتىپ بەردى. ءانشىنىڭ حالىققا تانىستىرىلماعان 20 شاقتى ءانى بار ەكەن.

بۇل تۋرالى استانا ارناسىنىڭ «سىرلاسۋ» باعدارلاماسىندا ايتىلدى.

«ديماشتىڭ ءان جازاتىن قاسيەتى بار. ءان دەگەن - وتىرىپ الىپ تاپسىرىسقا جازا سالاتىن نەمەسە كوبەيتە سالاتىن دۇنيە ەمەس. ول دا - كوڭىل- كۇي مەن جاقسى سەزىمنىڭ ناتيجەسى. «ۇمىتىلماس كۇن» - ديماشتىڭ العاشقى تۋىندىلارىنىڭ ءبىرى. ديماشتىڭ مۋزىكاعا دەگەن كوزقاراسى مەن ينتەللەكتىسى ەرەكشە. بارلىق نارسەنى بىردەن ۇناتىپ، قۇلاي بەرمەيدى. كوڭىلىنە قوندىرىپ، جۇرەگىنەن وتكىزگەن دۇنيەلەردى عانا ساحناعا الىپ شىعادى. «ۇمىتىلماس كۇن» دەگەن تۋىندىسى دا ۇزاق وڭدەلگەن بولاتىن» ، - دەيدى سۆەتا ايتبايەۆا.

مۇنىمەن قاتار، قانات مىرزا ۇلىنىڭ كەي انىنە ءسوزدى ءوزى جازىپ بەرەتىنىن ايتتى. كوپتەگەن اقىنعا جازدىرعان ءان ماتىندەرى كوڭىلدەرىنەن شىقپاعان ەكەن.

«دەگەنمەن، ديماشتىڭ جيىرماعا جۋىق اۋەندەرى بار. ونىڭ بارلىعىن تولىق ءپىسىرىپ، اقىندارعا ءسوز جازدىرۋ قاجەت. ديماشتىڭ «كوركەمىم» سەكىلدى ويناقى ءبىر- ەكى اندەرىنە ءسوزدى ءوزىم جازىپ بەردىم. كەيدە ءسوزىن جازعانمەن، كوكەيىڭە قونباي تۇرادى. سونداي اۋەندەردى قويىپ قويامىز. اۋقىمدى ويدى تۇيىندەيتىن تىم جاقسى اۋەندەرى بار. وسىلارعا اقىندارعا ءسوز جازدىرىپ كورگەن ەدىك، كوڭىلىمىزگە قونبادى. اۋەن مەن ءسوزدىڭ قابىسۋى وتە قيىن. اۋەن وزىنشە جاقسى، ءسوز وزىنشە جاقسى. ءبىراق ەكەۋى ءبىر- بىرىنە ساي كەلمەيدى» ، - دەيدى قانات ايتبايەۆ.