شىمكەنتتە مەرەكە التىن ادام كيىمىندەگى 20 سالت اتتىلار شەرۋىمەن ەرەكشەلەندى

شىمكەنت. قازاقپارات - بۇگىن شىمكەنت قالاسى ءال- فارابي الاڭىندا 1 - مامىر - قازاقستان حالقىنىڭ بىرلىگى كۇنىنە ارنالعان مەرەكەلىك شارا ءوتتى.

سالتاناتتى جيىندا ايماق باسشىسى جانسەيىت تۇيمەبايەۆ ەلدەگى ەتنوس ارالىق تاتۋلىق پەن قوعامدىق- ساياسي تۇراقتىلىقتى ساقتاۋعا سۇبەلى ۇلەس قوسقان وڭىردەگى 18 ەتنومادەني بىرلەستىكتەرگە وبلىس اكىمىنىڭ «باۋىرمال» سىيلىعىن تابىستادى.

 مەرەكەلىك شارا سونداي- اق التىن ادام كيىمىندەگى 20 سالت اتتىلار شەرۋىمەن ەرەكشەلەندى، دەپ حابارلايدى قازاقپارات ح ا ا ءتىلشىسى. الاڭعا جينالعان جۇرتشىلىق «اق كوگەرشىن» كومپوزيتسياسىن تاماشالاپ، ىنتىماعى جاراسقان ءتۇرلى ەتنوس وكىلدەرى ونەرپازدارىنىڭ ءانىن تىڭدادى. الاڭنان ەلىمىزدەگى بەيبىتشىلىكتىڭ نىسانى ىسپەتتەس «ماڭگىلىك ەل» وبرازىندا بەزەندىرىلگەن ماشينا ءوتتى. وتانىمىزدىڭ ەڭ ماڭىزدى مەيرامدارىنىڭ بىرىنە قاتىسقان وبلىس اكىمى جانسەيىت تۇيمەبايەۆ بارشا وڭتۇستىك قازاقستاندىقتاردى بىرلىك كۇنىمەن قۇتتىقتادى.

«حالقىمىزدا «باق قايدا باراسىڭ - ىنتىماققا بارامىن» دەگەن دانا ءسوز بار. ەلدىك بولمىسىمىزعا ءتان بۇل ۇعىمدى تاۋەلسىزدىكتىڭ تۇعىرلى، مەملەكەتتىڭ عۇمىرلى بولۋىنا وزەك ەتتىك. بىرلىكتى باستى بايلىعىمىز - تاۋەلسىزدىكتىڭ ارقاۋى ەتىپ ايشىقتادىق. ەلباسىمىز ۇسىنعان جول، جۇرت بولىپ جۇمىلا ۇستانعان ساياسات شيرەك عاسىردا جەمىستى ناتيجەسىن بەردى. بۇگىنگى قازاقستان بىرلىگى بەكەم، تىرلىگى كەلىسكەن، ىنتىماعى جاراسقان ەلگە اينالدى. جەتكەن جەتىستىكتەرىمىز بەن العان اسۋلارىمىز از ەمەس. بۇگىن ءبىز ۇلى دالانىڭ ۇلاعاتىمەن ماڭگىلىك ەل قۇرۋعا قادام باستىق. كۇن سايىن قۇبىلعان زامانانىڭ يىرىمىنە توتەپ بەرەتىن قۋاتتى مەملەكەتتى جاساۋدىڭ قامىنا كىرىستىك. ەلەۋلى وزگەرىستەر قوعامنىڭ بارلىق سالاسىن قامتىپ وتىر. جالپى ۇلتتىق جاڭعىرۋ ساياسي- ەكونوميكالىق سالالارمەن قاتار، ازاماتتىق ساناعا دا سەرپىلىس الىپ كەلمەك»، - دەدى اكىم.

 ايتا كەتەيىك، وڭتۇستىك قازاقستاندا بۇگىنگى تاڭدا 100-دەن استام ەتنوس وكىلدەرى تاتۋ- ءتاتتى ءومىر ءسۇرىپ، بىرلەسە ەڭبەك ەتىپ كەلەدى. ال وبلىستاعى 20 ەتنومادەني ورتالىق پەن اۋدان، قالالارداعى 51 فيليالدا ءار ەتنوستىڭ سالت- داستۇرىنە، ادەپ- عۇرپىنا، مادەنيەتىنە بايلانىستى ءتۇرلى ءىس- شارالاردى وتكىزۋىنە بارلىق مۇمكىندىكتەر جاسالعان. سونىمەن قاتار، ەتنومادەني ورتالىقتار جانىندا 17 جاستار قاناتى مەن 11 جەكسەنبىلىك مەكتەبى بار.

 اۆتور: اينۇر اقبايەۆا