قازاقستاندىق سۋرەتشى 20 جىلدان بەرى قىستا جالاڭاياق ءجۇرىپ جۇرتتى تاڭعالدىردى
بۇل تۋرالى قازاقستان ارناسىنىڭ «ايتۋعا وڭاي» باعدارلاماسىندا ايتىلدى.
جاستايىنان قىل قالامدى وزىنە سەرىك ەتىپ جۇرگەن اباي ابىشيەۆتىڭ كوپتەگەن شىعارمالارى بار. ونىڭ «اقساق كيىك»، «عارىش عالاماتى»، «تانكيستەر»، «جەكپە- جەك» سەكىلدى تۋىندىلارى وزىندىك ناقىشىمەن ەرەكشەلەنەدى. 20 جىلدان استام ۋاقىت بولدى ءوزى سۋىقتى قاجەت ەتىپ تۇرادى. سۋىق اۋا رايىنا شىدامدى. جىلى مەزگىلگە اسا شىداي بەرمەيدى. جازدا كولەڭكە جەر ىزدەيدى»، - دەيدى ابىشيەۆتىڭ ايەلى كۇنقياش مىرزاعۇلوۆا.
ابايدىڭ تاعى ءبىر ەرەكشەلىگى ول قىستىڭ قاقاعان ايازىندا جالاڭاياق جۇرە بەرەدى. بۇعان دەيىن ۇزاق جىل بويى تاماعى ءجيى اۋىرعان. ءتىپتى السىرەپ، توسەك تارتىپ قالعان كەزدەرى دە بولعان. الايدا جالاڭاياق قار كەشكەننەن باستاپ، تاماق اۋرۋىنان قۇلان- تازا ايىعىپ كەتكەن. ءتىپتى تۇماۋ دا تيمەيدى ەكەن.
«ستۋدياعا جالاڭاياق كەلۋىمە بولاتىن ەدى. ۇيدەگىلەر «ۇيات بولادى» دەپ جىبەرمەدى. بوزبالا كۇنىمنەن باستاپ تاماعىم اۋىرا باستادى. ۇنەمى سالقىن سۋ ىشكىم كەلىپ تۇراتىن بولدى. ارتىنشا قانشا سۋىق سۋ ىشسەم دە، ءشولىم قانبايتىن ءبىر ادەت شىقتى. ءوزىم وتە كىتاپقۇمار جان بولىپ ءوستىم. ءبىر كۇنى كىتاپتان «ادام سۋىققا شىداسا، كوپتەگەن اۋرۋدان ايىعادى» دەگەن سوزدەردى وقىپ قالدىم. وسى كەڭەستى باسشىلىققا الىپ، جالاڭاياق جۇرە باستادىم. كەلىنشەگىم ايتىپ وتكەندەي، العاش 20 جىل بۇرىن جالاڭاياق جۇرە باستادىم. ەشقانداي دا قيىندىعى جوق. مۇنى كەز كەلگەن ادام ىستەي الادى. ءبىراق، گيگيەنا تۇرعىسىنان قاراساڭ، ۇنەمى جالاڭاياق جۇرە بەرۋگە بولمايدى. ونىڭ ۇستىنە كوشەنى باسىپ كەلىپ، ۇيدە ەركىن جۇرە المايسىڭ. ءبىراق جۇرۋگە بولادى. بۇدان كەيىن تاماعىم اندا- ساندا عانا اۋىراتىن بولدى. سۋىق سۋ ىشكەندە، ءشولىم قاناتىنداي دارەجەگە جەتتىم»، - دەيدى اباي مىرزا.
باعدارلاما جۇرگىزۋشىسى بەيسەن قۇرانبەك ستۋديا قوناعىنىڭ سوزىمەن كەلىسپەيتىنىن جەتكىزدى. ياعني قىستا كەز كەلگەن ادامنىڭ جالاڭاياق جۇرە المايتىنىن تىلگە تيەك ەتتى ءارى بالالارعا ەسكەرتۋ جاسادى.
