سوتتىڭ قاتەلىگىنەن كىناسىز ازامات 20 جىلىن تەمىر توردىڭ ار جاعىندا وتكىزگەن

استانا. قازاقپارات - ادام ولتىرگەندىگى ءۇشىن سوتتالعان يتالياندىقتى كىناسىز دەپ تاۋىپ تۇرمەدەن شىعاردى.

ول 20 جىلىن تەمىر توردىڭ ار جاعىندا وتكىزدى، دەپ جازدى La Stampa.

باسىلىمنىڭ دەرەكتەرىنە قاراعاندا، اڭگىمە 55 جاستاعى تارانتو پروۆينسياسىنداعى فراگانيانو قالاسىنىڭ تۇرعىنى اندجەلو ماسسارو (Angelo Massaro) جايلى بولىپ وتىر. كاتانزارو قالاسىنىڭ سوتى ونى 1995 -جىلى 22 -قازاندا لورەنسو فەرسۋرەللانى (Lorenzo Fersurella) ءولتىردى دەگەن ايىپپەن 24 جىلعا باس بوستاندىعىنان ايىرعان. ايىپتاۋ ماسسارونىڭ تەلەفونىن تىڭداۋ جانە اقپارشىنىڭ بۇل قىلمىس جايلى ءۇشىنشى ءبىر ادامنان العان مالىمەتىنە نەگىزدەلگەن. كەيىننەن ونىڭ ايتقاندارىنىڭ شىندىققا جاناسپايتىندىعى انىقتالادى. بۇدان باسقا ماسسارونىڭ ادۆوكاتى ادام ءولىمى بولعان ءتۇنى كليەنتى وزگە جەردە بولعانىن دالەلدەي الدى.

ناتيجەسىندە كاتانزارو قالاسىنىڭ سول سوتى اپەللياتسيالىق شاعىمدى قاناعاتتاندىردى جانە ونى بوساتۋ تۋرالى شەشىم شىعاردى. ەندى يتالياندىقتىڭ قورعاۋشىلارى ادىلەت مينيسترلىگىنەن ونى زاڭسىز باس بوستاندىعىنان ايىرعانى ءۇشىن وتەماقى تالاپ ەتپەك.

ال تۇرمەدەن شىققان ماسسارو 20 جىل بويى شەككەن ازابىن ەشنارسە وتەي المايتىندىعىن، دەگەنمەن قاتەلىككە بوي الدىرعانداردىڭ جازالانۋىنا، ادىلدىككە قول جەتكىزۋگە ارەكەتتەنەتىندىگىن ءمالىم ەتتى. تۇرمەدە وتىرعان جىلدار ىشىندە يتالياندىق كاتانزارو ۋنيۆەرسيتەتىنىڭ زاڭ فاكۋلتەتىن ءتامامداعان.

اۆتور: ەرلان قوجاكەلديەۆ