اتىراۋداعى كومپانيا ءوز ەركىمەن جۇمىستان شىققاندارعا 20 مىڭ دوللار تولەيدى

اتىراۋ. قازاقپارات - اتىراۋدا وڭىردەگى تەڭىز جانە كورولدىك مۇناي- گاز كەن ورىندارىندا شيكىزات وندىرۋمەن اينالىساتىن «تەڭىز شيەۆرويل» كومپانياسىنىڭ كوپتەگەن قىزمەتكەرلەرى ءوز ەركىلەرىمەن جۇمىستان شىققىلارى كەلەدى.

 سەبەبى، جۇمىستان ءوز ەرىكتەرىمەن شىققان ماماندارعا 20 مىڭ دوللاردان استام قارجى بەرىلەدى.

 «سوڭعى جىلدارداعى مۇناي باعاسىنىڭ كۇرت تومەندەۋىنە بايلانىستى ءبىزدىڭ كاسىپورىندا ءوندىرىستى وڭتايلاندىرۋ جۇمىستارى جۇرگىزىلۋدە. ءوز ەركىمەن جۇمىستان شىققان ماماندارعا وتەماقى رەتىندە اقشا بەرىلەتىن باعدارلاما بەكىتىلدى. اتالمىش باعدارلاما حالىقارالىق تاجىريبە ستاندارتتارىنا تولىقتاي ساي كەلەدى جانە تەك ەڭبەككەردىڭ ءوز قالاۋىمەن جۇزەگە اسىرىلادى. قىزمەتكەرلەرگە ەڭبەك كەلىسىمشارتىن تاراپتاردىڭ كەلىسىمىمەن بۇزۋعا مۇمكىندىك بەرىلگەن. كەلىسىمشارتتى وسىنداي جولمەن بۇزۋ ق ر ەڭبەك كودەكسىمەن بەكىتىلگەن»، - دەپ حابارلادى «قازاقپارات» ح ا ا تىلشىسىنە ت ش و قوعاممەن جانە بيلىكپەن قاتىناس مەنەدجەرى ريزابەك ارتىعاليەۆ.

 ەڭبەك كەلىسىمشارتىن جويۋ تۋرالى ۇسىنىس حات 300-گە جۋىق ادامعا بەرىلدى. وعان كەلىسكەندەر ەكى جىلدىق جالاقىلارىن ياعني 20 مىڭ دوللاردان كەم ەمەس اقشانى وتەماقى رەتىندە الادى. ال، وسى سومادان كوپ جالاقى الىپ جۇرگەن قىزمەتكەر جالاقىسىنا ساي قارجىنى الۋعا مۇمكىندىك بەرىلگەن. ەڭ جوعارعى سوماعا شەكتەۋ قويىلماعان. بۇل ۇسىنىس مامانعا ايتىلىپ، ءبىراق ول كەلىسپەگەن جاعدايدا جۇمىستان قىسقارتىلادى دەگەن ءسوز ەمەس. تەك قىزمەتى عانا قىسقارتىلادى، ال مامان جۇمىسىن باسقا قىزمەتتە جالعاستىرادى. سونداي- اق، وسىنداي ۇسىنىس بەرىلمەگەن مامان ءوز ەركىمەن جۇمىستان كەتكىسى كەلەتىن بولسا، وعان ەكى جىلدىق جالاقى وتەماقى تولەۋ قاراستىرىلماعان.