الماتىدا اسا ءىرى كولەمدە قارجى جىمقىرعان 20 شاقتى حاكەر سوتتالىپ جاتىر
20 ادام سوتتالىپ جاتىر. 16 سىنا قاتىستى قاماۋعا الۋ شاراسى قولدانىلدى. تورتەۋى كەپىلدىك تولەگەن. قورعاۋشىلاردىڭ ءبىرى سوت وتىرىسىن كەيىنگە شەگەرۋدى سۇرادى. ناتيجەسىندە سوت وتىرىسى 26 -قازانعا شەگەرىلدى.
سوتتا داستاروۆ كۋاگەرلەردى، تەرگەۋشىلەردى جانە تەرگەۋ امالدارىن وتكىزگەندە قاتىسقان كۋاگەرلەردى شاقىرۋدى سۇرادى. بۇل ءوتىنىشى ماقۇلداندى.
تەرگەۋ نۇسقاسى بويىنشا، وماروۆ پەن داستاروۆ ۆيرۋسى بار حاتتاردى باس پروكۋراتۋرا، سالىق كوميتەتى، قارجى مينيسترلىگى، مەملەكەتتىك كىرىس كوميتەتى جانە C1 بۋحالتەريا باعدارلاماسىنا قولداۋ كورسەتۋ قىزمەتتەرىنىڭ اتىنان كاسىپورىنداردىڭ ەلەكتروندىق پوشتالارىنا جولداعان. كەلگەن حاتتى الۋشىلار كورسەتىلگەن سىلتەمە بويىنشا ءوتىپ، ولاردىڭ كومپيۋتەرلەرىنە قاۋىپتى باعدارلاما جۇكتەلگەن. سول باعدارلاما ارقىلى پايدالانۋشىلاردىڭ كومپيۋتەرىنە قول جەتكىزگەن حاكەرلەر مەملەكەتتىك جانە جەكە كاسىپورىنداردىڭ قاراجاتىن ارنايى شوتتارعا اۋدارعان.
ولاردىڭ ارەكەتىنەن جەكە كاسىپورىنداردىڭ ءبىرى جاپا شەكتى. ونىڭ باسشىسى اسەل ەسىمدى قىز وقيعانىڭ قالاي بولعانىن ايتتى.
«بىزگە مەملەكەتتىك كىرىس دەپارتامەنتىنەن حات كەلدى. ونى بۋحالتەر اشتى. زياندى باعدارلاما انىقتالىپ، ءبىزدىڭ شوتتان ماتەريالدىق كومەك رەتىندە ءىرى سوما اۋدارىلدى. ناقتى سومانى ايتا المايمىن، الايدا ءبىر ميلليوننان ارتىق اقشا بولدى. قاراجات كاۋاپ دايىنداۋشى ستانيسلاۆ دزيۋباتوۆتىڭ شوتىنا ءتۇستى. اقشانى قايتارۋ ءۇشىن پروكۋراتۋرا كومەگىنە جۇگىندىك»، - دەدى قىز.
كاسىپكەر بۇل رەتتە بانكتىڭ ۇستانىمىن تۇسىنبەگەنىن ايتتى.
«بۇرىن ءبىر شوتتان ەكىنشىسىنە اۋدارىلاتىن تولەمدەردى بانك مامانى راستايتىن. مامان ءبىر گاپ بار ەكەنىن ءتۇسىنۋى ءتيىس ەدى. ول (كاسىپورىن بۋحالتەرى) اقشا اۋدارمادى»، - دەدى ول.
تەرگەۋ نۇسقاسى بويىنشا، توپتىڭ باسشىلارى الماز وماروۆ پەن باۋىرجان داستاروۆ. ولار سەگىز باپتا قاراستىرىلعان قىلمىس جاسادى دەپ ايىپتالىپ وتىر.
