جۇزدەگەن ميلليونعا وقىپ كەلگەن قازاق فۋتبولشىلارى قاقپاسىنا 20 گول جىبەرىپ الدى
بۇل تۋرالى شامشارحان ءومىرزاقوۆ ەسىمدى ازامات ءوزىنىڭ Facebook پاراقشاسىندا جازدى. ول «برازيليالىقتار» دەپ اتالاتىن قازاقستان جاسوسپىرىمدەر قۇراماسىن سىنعا العان.
ول فۋتبولشىلارعا جۇزدەگەن ميلليون جۇمسالعانىنا قاراماستان، ولاردىڭ رەسەيدە وتكەن گراناتكين كۋبوگىندا ەڭ سوڭعى ورىن العانىنا نارازى. ول سايىسقا 18 كوماندا قاتىسقان بولاتىن.
«ءبىزدىڭ قۇراما سوڭىنان ساناعاندا ءبىرىنشى ورىن الدى. ولار رەسەيدەن 5-0، بولگاريادان 2-0، مولدوۆيادان 3-0، سلوۆاكيادان 1-0، ەستونيادان 5-2، رەسەي-2 كومانداسىنان 4-2 بولىپ ۇتىلدى. ونىڭ وزىندە ءبىر گولدى رەسەيلىك ءوز قاقپاسىنا سالدى.
برازيلياعا بارعان 50 بالانىڭ 15 ءى ءبىرىنشى ليگادا «بايتەرەك» كومانداسى بولىپ وينايدى. ولار دا چەمپيوناتتىڭ ەڭ سوڭىندا ءجۇر. 11 ويىننىڭ بارىندە جەڭىلىپ، قاقپالارىنا 33 دوپ جىبەرگەن. ۇيات. 294000000 تەڭگەنى وندا نە ءۇشىن تولەدىك؟ وقۋعا كەتكەن 26 بالانىڭ ءارقايسى ءۇشىن 72 مىڭ دوللاردان تولەنگەن ەكەن. ولاردى ىرىكتەۋمەن كىمدەر اينالىستى؟ بۇل تىزىمگە اۋىلداعى تالانتتى بالالار مۇلدە ىلىنبەيدى»، - دەيدى ول.
ءومىرزاقوۆتىڭ جازعان پوستى الەۋمەتتىك جەلىدە 1300 لايك، 200 دەن استام پىكىر جيناپ، 800 رەت بولىسكەن. بۇعان دەيىن ەلىمىزدىڭ سپورت ءمينيسترى جاس فۋتبولشىلاردى برازيلياعا جىبەرۋ توقتاتىلاتىنىن ايتقان ەدى.