سەمەيدە كورىپكەلدەر اكەسىنە 20 جىل بۇرىن جوعالعان ۇلىنىڭ ءتىرى ەكەنىن ايتقان
بۇل تۋرالى ەكسپرەسس ك باسىلىمى حابارلايدى.
ۇلىن جيىرما جىل بويى ىزدەپ كەلە جاتقان دانيال ءسۇيىنجانوۆ ءالى دە كۇدەرىن ۇزبەگەن. ول كەزەكتى رەت قالالىق اكىمدىككە كەلىپ، كومەك سۇرادى.
«1996 -جىلى مەن بەس جاستاعى ۇلىم ەرجاندى «سوسنا» ساناتوريىنە جىبەردىم. قۇرامىندا 16 ادام بار توپتى تاڭعى سەرۋەنگە الىپ شىققان كەزدە، بالا جوعالىپ كەتەدى. وقيعا بولعاننان ءۇش كۇننەن كەيىن دە ساناتوري باسشىلىعى بىزگە ەشتەڭەنى حابارلامايدى. ەندى مىنە 20 جىل بولدى، ءالى ىزدەپ كەلە جاتىرمىن. وسى جىلدار ىشىندە بۇل ىسكە قاتىستى زەرتتەۋ جۇمىسى جۇرمەي قويدى. ەش جەردە ونى كورگەن، بىلگەن جان جوق. بۇلاي بولۋى مۇمكىن بە؟ الدە ساناتوري باسشىلىعى ايتۋعا قورىقتى ما... ەندى ودان بەرى ءبىراز جىل ءوتتى، بىرەۋ- مىرەۋ نەگە ايتپايدى بىلسە؟ ماعان سول جىلى ۇلىممەن بىرگە دەمالعان بالالارمەن سويلەسۋگە مۇمكىندىك بەرمەدى. مەن ونىڭ ءتىرى ەكەنىنە سەنەمىن. مەن بالامدى مەملەكەتكە بەردىم جانە مەملەكەت ونى دالاعا تاستاماۋى ءتيىس. ءولى بولسىن، ءتىرى بولسىن ۇلىمدى وزىمە قايتارىڭدارشى»، - دەيدى اكە.
بۇل جاعدايدى ايتىپ دانيال ءسۇيىنجانوۆ ەكستراسەنستەردىڭ دە كومەگىنە بىرنەشە رەت جۇگىنگەن. ولاردىڭ بارلىعى بىردەي بالانىڭ ءتىرى، ونى مۇسىلمان وتباسى اسىراپ العانىن ايتقان. ءتىپتى ول وتباسى الماتى وبلىسىندا، ال اسىراپ الۋشىنىڭ ەسىمى اكمال بولۋى مۇمكىن دەپ تە ايتىپ بەرگەن.
«ەگەر بۇل شىنىمەن سولاي بولسا، وندا بۇل ادامداردان ۇلىمدى قايتارۋدى ءوتىنىپ سۇرايمىن. قازىر دە ولار اتا-انا بولىپ ۇلگەردى، بالادان ايىرىلۋدىڭ نە ەكەنىن سەزەدى ەمەس پە»، - دەيدى ۇلىن ىزدەپ سارىلعان اكە.
ەندى ول كىسى بىرنەشە جەيدە ساتىپ الىپ، وعان كىشكەنتاي ەرجاننىڭ سۋرەتىن جابىستىرىپ، ءوزىنىڭ ۇلىنا ارناعان ولەڭىن دە جازىپ قويماق. وسى ارقىلى ۇلىممەن كەزدەسىپ قالارمىن دەپ ۇمىتتەنەدى. ول وسى كيىمدى كيىپ وزگەلەردىڭ نازارىن اۋدارۋ ءۇشىن استاناعا قاراي جولعا شىقپاق.
Stan.kz
