ەسەپ كوميتەتى 20 جىلدىق قىزمەتىن قورىتىندىلادى - فوتو
كوميتەت ءتوراعاسى قوزىكورپەش جاڭبىرشين كوميتەتتىڭ العاشقى ءتوراعالارىنا ءسوز بەرىپ، كوميتەتتىڭ ارداگەر قىزمەتكەرلەرىنە ۆەدومستۆولىق ماراپاتتار تابىس ەتتى. ق. ءجاڭبىرشيننىڭ پىكىرىنشە، وسىدان 20 جىل بۇرىن وسىنداي كوميتەت قۇرۋ جونىندەگى پرەزيدەنتتىڭ جارلىعى قازاقستاننىڭ قارجى جۇيەسىنىڭ جاڭا ءبىر پاراعى ەدى.
«رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتى تۋرالى» ەرەجەنى بەكىتۋ تۋرالى» مەملەكەت باسشىسى نۇرسۇلتان نازاربايەۆتىڭ 1996 -جىلعى 19 -ساۋىردەگى جارلىعىمەن مەملەكەتتىك- قارجىلىق باقىلاۋ سالاسىنداعى قازاقستاندىق جۇيەنىڭ دامۋ تاريحىندا جاڭا ءبىر پاراق اشىلدى»، - دەيدى ق. جاڭبىرشين.
«ەسەپ كوميتەتى 20 جىل ىشىندە 734 باقىلاۋ ءىس- شاراسىن جۇرگىزىپ، 6064 وبەكتىنى تەكسەردى. وسىلايشا، باقىلانعان بيۋدجەت قاراجاتى مەن مەملەكەت اكتيۆتەرىنىڭ كولەمى 26,0 ترلن تەڭگەدەن استام قاراجاتتى قۇراعان. جالپى سوماسى 4,0 تريلليون تەڭگەدەن استام قۇقىق بۇزۋشىلىق انىقتالىپ، 316,0 ميلليارد تەڭگەدەن استام بيۋدجەت قاراجاتى قالپىنا كەلتىرىلدى. ەسەپ كوميتەتىنىڭ ءتيىمدى جۇمىسىن مىنا مالىمەتكە قاراپ بىلۋگە بولادى: وسى ۋاقىت ىشىندە ەسەپ كوميتەتىنىڭ جۇمىسىنا 9 ميلليارد تەڭگە تارتىلعان. ال، قالپىنا كەلگەن بيۋدجەت قاراجاتى جوعارىدا ايتقانىماي، 316,0 ميلليارد تەڭگەنى قۇرادى»، - دەدى 20 جىلدىڭ جۇمىسىن قورىتىندىلاي كەلە ق. جاڭبىرشين.
ايتا كەتەيىك، شارا بارىسىندا كوميتەت ءتوراعاسى مەملەكەت باسشىسى نۇرسۇلتان نازاربايەۆ رەسپۋبليكالىق بيۋدجەتتى باقىلاۋ جونىندەگى ەسەپ كوميتەتىنىڭ ۇجىمىنا ارنالعان قۇتتىقتاۋدى وقىدى.
