ن. نازاربايەۆ ەسەپ كوميتەتىنىڭ ۇجىمىن 20 جىلدىق مەرەيتويىمەن قۇتتىقتادى
بۇگىن سالتاناتتى شارا بارىسىنا كوميتەت ءتوراعاسى قوزىكورپەش جاڭبىرشين قىزمەتكەرلەرىنە ەلباسىنىڭ قۇتتىقتاۋىن جەتكىزدى.
«قىمباتتى دوستار! سىزدەردى مەرەيلى مەرەكەلەرىڭىزبەن - رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ قۇرىلعانىنا 20 جىل تولۋىمەن قۇتتىقتايمىن. قارجى سالاسىنداعى ءتارتىپ - وتاندىق ەكونوميكانى تابىستى دامىتۋدىڭ، ازاماتتاردىڭ الەۋمەتتىك ءال- اۋقاتىن ارتتىرۋدىڭ نەگىزى. ونى قاتاڭ ساقتاۋىمىز مەملەكەتتىك مىندەت. ەسەپ كوميتەتى وسى مىندەتتى ورىنداۋ ىسىندە جەتەكشى ءرول اتقارىپ كەلەدى. وتكەن جىلدار ىشىندە ول تاۋەلسىز ءاۋديتتىڭ الەمدىك ستاندارتتارعا ساي جۇمىس جۇرگىزەتىن بەدەلدى ينستيتۋتىنا اينالدى.
سىزدەردىڭ كاسىبي قىزمەتتەرىڭىزدىڭ ارقاسىندا ۇلتتىق رەسۋرستاردىڭ پايدالانۋ تيىمدىلىگى ارتىپ كەلەدى. الداعى ۋاقىتتا دا وزدەرىڭىزگە تاپسىرىلعان كۇردەلى مىندەتتەردى ابىرويمەن اتقاراتىندارىڭىزعا سەنەمىن»، - دەگەن مەملەكەت باسشىسى ءوزىنىڭ ارنايى قۇتتىقتاۋىندا.
پرەزيدەنت سونداي-اق، ۇجىمنىڭ جۇمىسىنا زور تابىس، كوميتەت قىزمەتكەرلەرىنە قاجىماس ەرىك- جىگەر تىلەدى.
ەسكە سالا كەتەيىك، 1996 -جىلدىڭ 19 -ساۋىرىندە ق ر پرەزيدەنتى ن. نازاربايەۆ «رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتى تۋرالى» ەرەجەنى بەكىتۋ تۋرالى جارلىققا قول قويعان.
اۆتور: كەنجەكەي توقتامۇرات قىزى
