كوكشەتاۋدا «ق. ساتپايەۆ 20- عاسىردىڭ عۇلاما عالىمى» اتتى عىلىمي سەمينار ءوتتى - فوتو

كوكشەتاۋ. قازاقپارات - كوكشەتاۋدا وبلىستىق «قازاق ءتىلى جانە مادەنيەتى» قوعامىنىڭ ۇيىمداستىرۋىمەن «ق. ساتپايەۆ ⅩⅩ عاسىردىڭ عۇلاما عالىمى» اتتى عىلىمي- پراكتيكالىق سەمينار ءوتتى.

ا. مىرزاحمەتوۆ اتىنداعى كوكشەتاۋ ۋنيۆەرسيتەتى مەن سولتۇستىك قازاقستان ءوڭىرارالىق گەولوگيا جانە جەر قويناۋىن پايدالانۋ دەپارتامەنتىنىڭ اتسالىسۋىمەن وتكەن شاراعا عالىمدار مەن جوعارى وقۋ ورىندارىنىڭ ستۋدەنتتەرى، مەكتەپ وقۋشىلارى قاتىستى.

عىلىمي- پراكتيكالىق سەميناردى اشقان وبلىستىق «قازاق ءتىلى جانە مادەنيەتى» قوعامىنىڭ ءتوراعاسى مەيرامبەك قيىقوۆ بۇنداي شارانى وتكىزۋدەگى باستى ماقسات - جەزقازعان وڭىرىندەگى كوپتەگەن جەر استى بايلىقتارىنىڭ كوزىن اشىپ، ەلىمىزدىڭ عىلىمىنىڭ دامۋىنا زور ۇلەس قوسقان زاڭعار تۇلعامىزدىڭ ءومىر، ەڭبەك جولىن جاس ۇرپاققا تانىستىرۋ، سول ارقىلى ولاردىڭ بويىندا وتانسۇيگىشتىك، ەلجاندىلىق، ينتەرناتسيونالدىق تاربيەنى ءسىڭىرۋ ەكەندىگىن اتاپ ءوتتى.

سەميناردا عالىمنىڭ بالا كەزىنەن باستاپ ەرجەتىپ ەسەيگەندەگى، عىلىم جولىنا ءتۇسىپ، بيىكتەرگە كوتەرىلگەن كەزەڭدەرى تۋرالى جان- جاقتى اقپاراتتار بەرىلدى. №18 -كوكشەتاۋ ورتا مەكتەبىنىڭ وقۋشىلارى نۇرلان ورازبايەۆ پەن ايدا ءامىرحانوۆا بالا قانىشتىڭ ءومىرى جايىندا اڭگىمەلەپ بەردى. بالا كەزىنەن وقۋعا زەرەك بولعان ول وزگە بالالار سياقتى قالتاسىنا اسىق سالىپ ويناماي، كەرىسىنشە وزەن جاعاسىندا جاتقان تاستاردى جينايدى. اكەسى يمانتاي العىر ۇلدىڭ بولاشاعىنان ۇلكەن ءۇمىت كۇتىپ، اۋىل مەكتەبىن بىتىرگەن سوڭ پاۆلودار قالاسىنداعى ورىس- قازاق ۋچيليشەسىنە وقۋعا جىبەرەدى. دەنساۋلىعىنىڭ ناشارلاۋىنا قاراماستان، بىلىمگە قۇشتار بوزبالا وقۋىن ويداعىداي ءبىتىرىپ شىعادى.

ا. مىرزاحمەتوۆ اتىنداعى كوكشەتاۋ ۋنيۆەرسيتەتىنىڭ ستۋدەنتى ماعىپار اتىعاي عالىمنىڭ تومسك تەحنولوگيا ينستيتۋتىنا ءتۇسىپ، وقىعان كەزەڭى جايىندا ايتىپ بەرسە، وسى ۋنيۆەرسيتەتتىڭ وقىتۋشىسى تەحنيكا عىلىمدارىنىڭ كانديداتى نۇرجان بولاتوۆ پەن ريزات ەلۋبايەۆ قانىش ساتپايەۆتىڭ عىلىم سالاسىنداعى ەڭبەكتەرى مەن قوعام قايراتكەرى رەتىندەگى جۇمىستارى جايىندا جان- جاقتى باياندادى.

شارا بارىسىندا عالىمدار مەن ستۋدەنتتەردى «قازاق ءتىلى مەن مادەنيەتى» قوعامىنىڭ ءتورعاسى م. قيىقوۆ پەن وبلىستىق جاستار ءىسى ساياساتى باسقارماسىنىڭ باسشىسى ر. عاللياموۆ العىس حاتتارمەن ماراپاتتادى. سەمينار سوڭىندا وعان قاتىسۋشىلار ق. ساتپايەۆ كوشەسىنىڭ بويىنداعى عالىمنىڭ ەسكەرتكىش بيۋستىنە گۇل شوقتارىن قويدى.

       

 اۆتور: اسلان وسپانوۆ