اقتوبەدە ءجۇز جاساعان 20 اجە بار
«ءومىردىڭ تالاي سوقپاعىن باسىنان وتكەرسە دە قاجىماي، اللا بەرگەن دەنساۋلىقتىڭ ارقاسىندا عاسىر جاساعان كەيۋانالاردى كوكتەم مەرەكەسى - حالىقارالىق ايەلدەر كۇنىمەن قۇتتىقتاپ، باتالارىن الۋدى ءجون كوردىك»، دەپ جازادى باسىلىم.
اقتوبەلىك ءاسيا سارينا بيىل 100- كوكتەمىن قارسى الىپ وتىر. ءتورت بالادان تاراعان 16 نەمەرە، 23 شوبەرە، 4 شوپشەك ءسۇيىپ وتىرعان كەيۋانا ءالى كۇنگە دەيىن ءوز تالعامىمەن كيىم تىكتىرىپ كيەدى.
«قازىرگىنىڭ قاريالارى دۇكەننەن كيىنگەندى ءتاۋىر كورەدى. ءبىر جاعىنان تاپسىرىسپەن تىگىلگەن كيىم قىمباتقا تۇسەدى. الايدا ءبىزدىڭ «اجەمىز» ارنايى تىگىلگەن كويلەكتەردى ۇناتادى. جانە ۇلگىسىن ءوزى ايتىپ، كورسەتەدى. سىرت ادامدار جۇزگە كەلگەن كىسىگە ساندىكتىڭ نە قاجەتى بار دەپ ويلايتىن بولار، الايدا ءبىزدىڭ اۋلەتتىڭ بارلىق مۇشەسى اجەمىزدىڭ تالعامپازدىعىنا ۇنەمى ءسۇيسىنىپ وتىرادى»، - دەيدى قىزى ساعيرا.
كەيۋانا ءومىر بويى تىگىنشىلىكپەن اينالىسقان. العان ءبىلىمى بولماسا دا، ءالى كۇنگە دەيىن ەسكى قيسسا-داستانداردى، «ەر توستىك» ەرتەگىسىن، «قوبىلاندى»، «قىز جىبەك» جىرلارىنان ۇزىندىلەردى جاتقا وقيدى. ەستە ساقتاۋ قابىلەتى جوعارى.
«وتباسىنىڭ عانا ەمەس، اۋلەتتىڭ ۇيىتقىسى بولىپ وتىرعان ءاسيا اجە 8- ناۋرىز مەرەكەسىندە بارلىق وتباسى مۇشەلەرىن جيناعاندى جاقسى كورەدى. شوبەرە-شوپشەكتەرىن قاسىنا جيناپ الىپ، زەينەتاقىسىنان جىرىپ، تيىن-تەبەن ۇستاتادى»، دەلىنگەن ماقالادا.
ءاسيا اجە قازىر نەمەرەلەرى اسىلبەك پەن جاقسىبەكتىڭ قولىندا تۇرىپ جاتىر. ءجۇز جاساعان كەيۋانانىڭ باتاسىن الۋعا كەلەتىندەر دە از ەمەس. اڭگىمە سوڭىندا اجە بىزگە دە اق باتاسىن بەرىپ، «ەلىمىز امان، حالقىمىز تىنىش، ىرگەمىز مىقتى بولسىن!» دەپ تىلەگىن ءبىلدىردى.
تاعى دا ءبىر قالا تۇرعىنى، عاسىر جاساعان كەيۋانا راحي نۇرمانوۆا - كوكتەم مەرەكەسىن ەرەكشە كۇتەتىندەردىڭ ءبىرى. ول بۇل كۇنى بارلىق بالالارىن كەڭ داستارقان باسىنا جينايدى. بيىل راحي اجە 101 جاسقا تولدى.
قاريانى اڭگىمەگە تارتپاق بولىپ ەدىك، ءسال مازاسىزدانىپ وتىر ەكەن. ءبىزدى اينالىپ-تولعانىپ باتاسىن بەردى. ودان كەيىنگى اڭگىمەنى قولىنداعى كەلىنى باقتىگۇل جالعاستىرىپ اكەتتى.
باقتىگۇل اپانىڭ ايتۋىنشا، راحي اجە ءومىرىنىڭ كوپ بولىگىن كيەلى ىرعىز جەرىندە وتكىزگەن. ۇجىمشاردا ەڭبەك ەتىپ، تۋعان جەرىنىڭ وركەندەپ، وسۋىنە ۇلەس قوسقان. ەر مىنەزىمەن، جومارتتىعىمەن ەل اۋزىندا ءجۇرىپ، كوپكە شاراپاتى تيگەن. بايدىڭ قىزى بولسا دا قارشادايىنان ەڭبەككە ەرتە ارالاسقان. وتاعاسى وسپانمەن سوعىستان كەيىنگى جىلدارى كوڭىل قوسىپ، شاڭىراق كوتەرگەن. بۇگىندە سول 5 بالادان ورگەن 19 نەمەرە، 40 شوبەرە، 2 شوپشەك ءسۇيىپ وتىرعان عاسىر قۇرداسى ءالى كۇنگە دەيىن ەسىندە قالعان وقيعالاردى تىزبەكتەپ ايتىپ بەرەدى.
سانالى عۇمىرىندا شاڭىراعىن شايقالتپاي، اتادان قالعان قاراشاڭىراقتىڭ وتىن سوندىرمەي، بار بالاسىنا قامقور بولا بىلگەن اياۋلى انا بۇگىندە زور قۇرمەتكە يە. قيامەت- قايىم قيىندىقتاردى جەڭە بىلگەن راحي اجە ۇلى وتان سوعىسى جىلدارى تىلدا ەڭبەك ەتكەن. بۇگىنگى كۇنى ەلەۋسىز قالعانى بولماسا، ەڭبەك ارداگەرى ءالى كۇنگە دەيىن تىلداعى قيىندىقتارىن ەسكە تۇسىرسە، كوزىنە جاس الادى.
قيمىلى شيراق، اڭگىمەشىل عاسىر يەسى ءالى كۇنگە دەيىن «قازاقستان ايەلدەرى» جۋرنالىن ءسۇيىپ وقيدى ەكەن. سونداي-اق، ۇيدە وتىرىپ قازاقتىڭ تەرمەلەرىن، ءداستۇرلى اندەرىن ايتادى.
ونىڭ ايتۋىنشا، قازىر ازداپ سىرقاتتانعانى بولماسا، اجەنىڭ ءوزى تىڭ، ءسوزى شيراق، ويى جيناقى. ءۇي ىشىندە ەمىن-ەركىن ءجۇرىپ، تۇرادى. تاماققا تابەتى جاقسى. مىنەزى بىربەتكەي، شىنشىل. سونىڭ ارقاسىندا ءوزىنىڭ بار ايتقانىن جاساتىپ، نەمەرە-شوبەرەلەرىنە ۇنەمى بۇيرىق بەرىپ وتىرادى.
راحي اجەنىڭ ۇزاق جاساۋىنىڭ سەبەبىن سۇراعانىمىزدا، بالالارى ونىڭ ۇنەمى «جاقسى ءومىر ءسۇرىپ، ۇزاق جاساعىڭ كەلسە، بارلىق اداممەن تاتۋ بول. كەڭ بول!» دەپ اقىل- كەڭەس ايتىپ وتىراتىنىن جەتكىزدى.
