شىعس قازاقستاندا بالىقشى كەلىنشەك 20 ادامدى جۇمىسپەن قامتىپ وتىر
«جيىرما بەسكە ەندى اياق باسقان جاس قىز وتىن-سۋ، ازىق تاۋىپ، ءۇي-ءىشىن اسىراۋدىڭ قامىمەن قارا كۇزدىڭ سوڭىنداعى ءبىر كۇنى ەرتە تۇرىپ، اعاسىنا ىلەسىپ بالىق اۋلاۋعا شىقتى. سودان بەرى 25 كوكتەم مەن جاز، كۇز بەن قىس ءوتىپتى. ايگۇل اۋىلدا ءالى بالىقشى بولىپ ءجۇر»، دەلىنگەن ماقالادا.
قازىر بالىققا اتشانامەن، اربامەن بارمايدى، «ۋازيك» پەن «نيۆامەن» بارادى، قازىر بالىقتى جالعىز اۋلامايدى، بۇكىل بريگادامەن بارىپ، اۋلايدى. ول كەزدەگى بولشيەۆيك اۋىلى قازىر تاسساي دەپ اتالادى. زامان وزگەرگەنمەن، ايگۇلدىڭ كاسىبى وزگەرگەن جوق. ول بۇكىل ەل بىلەتىن بالىقشى كەلىنشەك اتاندى.
ايگۇل بۇگىندە جەكە كاسىپكەر بولىپ تىركەلىپ، اۋىلداعى 20 ادامعا جۇمىس تاۋىپ بەرىپ وتىر. بريگاداسىندا ءوزىنىڭ اعالارى مەن باۋىرلارى، كۇيەۋ بالالارى دا ەڭبەك ەتىپ جاتىر. ءبارى دە ءبىر ءۇيدىڭ بالالارىنداي.
بالىقشىلاردى قۇرال-جابدىقتارمەن قامتۋ، ىشكى شارۋاشىلىق جۇمىستارىن ۇيىمداستىرۋ، كولگە شاباق جىبەرىپ، بالىق قورىن مولايتۋ، باسقا دا شارۋالاردى شەشۋ ءبارى-ءبارى ايگۇلدىڭ موينىندا.
تاسسايلىق بالىقشىلار بىرىگىپ، «اكۆاكۋلتۋرا» كووپەراتيۆىن قۇرىپ جاتىر. بۇل جاعالاۋداعى جۇرتتىڭ ەڭبەك ەتۋىنە، اۋلانعان بالىقتى ۋاقىتىندا وتكىزىپ، تابىس تابۋىنا بۇرىنعىدان قولايلى، ءتيىمدى جاعداي تۋادى دەگەن ءسوز. «كوپەراتيۆىمىزدى تاجىريبەلى كاسىپكەر، بالىقشى ۆلاديسلاۆ گريتسەنكو باسقارادى. اۋلانعان بالىقتى وتكىزۋ، وعان قوسا تابيعات بايلىعىن ورتايتپاي، كوبەيتۋ، كولگە شاباق جىبەرۋ، وزگە ماسەلەلەردى دە كوپەراتيۆ ارقىلى وڭدى شەشەمىز دەگەن ويدامىز. بيىل وبلىس اكىمىنىڭ قولداۋىمەن ايماقتا بالىق شارۋاشىلىعىن دامىتۋعا كوڭىل ءبولىنىپ، ليميت بەرۋ ماسەلەسى دە وڭدى شەشىمىن تابادى دەگەندى ەستىپ قۋانىپ وتىرمىز»، - دەيدى بالىقشى كەلىنشەك.
«ءبىزدىڭ كەيىپكەرىمىز بالىقشى بولۋ مەنىڭ ماڭدايىما جازىلعان، بالىقشى - مەنىڭ سۇيىكتى كاسىبىم دەيدى. سوندىقتان ماۋسىمنىڭ 12 ءى بالىقشىلار كۇنى ايگۇلدىڭ شيرەك عاسىر اتاپ ءوتىپ كەلە جاتقان ءتول مەرەكەسى. اۋداندىق كاسىپكەرلەر پالاتاسىنىڭ باسشىسى ءاليا مۇقاشيەۆا ايگۇل باستاعان تاسسايلىق بالىقشىلار بريگاداسىنىڭ ەڭبەكتەرىن ەرەكشە اتاپ ايتىپ، شاعىن ۇجىمنىڭ جەرگىلىكتى بيۋدجەت قورجىنىن تولتىرۋعا قوسىپ وتىرعان ۇلەسى ايتارلىقتاي ەكەنىن جەتكىزدى»، دەلىنگەن ماقالادا.
