يندونەزيا جاعالاۋىندا سۋعا باتقان پارومنىڭ 20 دان استام جولاۋشىسى قۇتقارىلدى
بۇل تۋرالى جەكسەنبىدە جەرگىلىكتى بيلىك حابارلادى.
«قۇتقارۋ جيلەتتەرىن كيىپ العان 21 ادام تابىلدى. ولار تەڭىزدە. ءبىز ولاردى قاۋىپسىز جەرگە شىعارامىز»، - دەپ اتاپ ءوتتى ىزدەۋ- قۇتقارۋ وپەراتسياسىنىڭ باسشىسى روكي ازيكين. ونىڭ ايتۋىنشا، كەمە اۋدارىلۋ سالدارىنان باتۋى مۇمكىن. ول سونداي- اق پارومنىڭ كەم دەگەندە ەكى جولاۋشىسى قازا تاپقانىن حابارلادى، ولاردىڭ مۇردەلەرى تابىلدى.
بۇعان دەيىن يندونەزيالىق بالىقشىلار جوعالعان پارومنىڭ ءتورت جولاۋشىسىن انىقتاپ، قاۋىپسىز جەرگە شىعاردى، ولاردىڭ اراسىندا ءبىر بالا بولعان. ولار بالىق اۋلاۋ بۋيلارىن ۇستاپ سۋ بەتىندە قالقىپ ءجۇردى.
بورتىندا 100 دەن استام ادام بولعان پاروممەن بايلانىس 19 - جەلتوقساندا، كەمە سۋلاۆەسي ارالىنان 20 شاقىرىم جەردە بولعان كەزدە ۇزىلگەن. وڭتۇستىك سۋلاۆەسي پروۆينتسياسى پوليتسياسىنىڭ كوميسسارى فرانس بۋرانگتىڭ حابارلاۋىنشا، قۇتقارۋ وپەراتسياسىنا تەڭىزدىڭ قاتتى تولقىنى كەدەرگى كەلتىرۋدە. كەمەنىڭ بورتىندا 94 ەرەسەك پەن 14 بالا بولعان، دەپ جازادى ت ا س س.
