قازاقستانداعى 20 جىل قاڭىراپ تۇرعان قۇپيا نىسان ءىرى قويماعا اينالدى

استانا. قازاقپارات - ەلىمىزدىڭ وڭتۇستىگىندە وسكەن كوكونىستى قوستانايدىڭ قويماسىندا ساپاسىن جوعالتپاي ساقتاپ، قولايلى ۋاقىتتا ەكسپورتقا شىعارۋعا بولادى.

رەسەيمەن شەكارالاس جاتقان توعىزاق اۋىلىندا جۇزەگە اسقان جوبا وسىنداي مۇمكىندىككە جول اشىپ وتىر.

ءبىر قىزىعى، بەيبىت كۇندە بيزنەس كوزىنە اينالعان بۇل جەر كەڭەس زامانىندا قۇپيا نىسان سانالعان.

قارابالىق اۋدانىنداعى توعىزاق اۋىلى رەسپۋبليكالىق ماڭىزداعى تاسجول ۇستىندە جاتىر. ەلدىمەكەن ىرگەسىنەن تەمىرجول دا وتەدى.

ەگەر اۋا شىعىپ تۇراتىن مورجالار بولماسا، بۇل قورشاۋلى الاڭقايدىڭ استىندا قىرۋار بايلىق جاتىر دەگەنگە سەنۋ دە قيىن.

اۋىر جۇك كولىكتەرى ەمىن-ەركىن سيىپ كەتە بەرەتىن قويما 1972-جىلى قاۋىپسىزدىك ماقساتىندا سالىنعان. مىقتىلىعىندا ءمىن جوق، جان-جاعى تۇگەل تاسپەن شەگەندەلگەن. نىساننىڭ بيىكتىگى 6 مەتر، ونىڭ سىرتىندا توبەسىن 2 مەتر قالىڭدىقتاعى توپىراق تاعى جاۋىپ جاتىر.

كەڭەس كەزىندە مۇندا قاۋىپسىزدىك ماقساتىندا الماعايىپ زامانعا دەپ ازىق-تۇلىك، نەگىزىنەن ۇن ساقتالعان. 20 جىل قاڭىراپ جاتىپ، تاعى دا پايدالانۋعا بەرىلدى.

قويمادا 8 مىڭ توننا ءونىم ساقتاۋعا بولادى. جەر استى قويماسىن قالپىنا كەلتىرۋگە 477 ميلليون تەڭگە جۇمسالعان.

مۇندا بىرنەشە كوكونىس ءتۇرىن ساقتاۋعا بولادى. ايتسە دە، نىسان يەلەرى مۇندا تەك جۋا عانا ۇستاۋدى ۇيعارىپتى. العاشقى لەك ءونىم قىركۇيەك ايىنىڭ سوڭىندا اكەلىندى.

دامير باينازاروۆ، قويما بريگاديرى:

- قويماداعى بارلىق جابدىقتاردا ولشەگىش ورناتىلعان. ىلعالدىلىق پەن اۋا تەمپەراتۋراسىن، جەلدەتكىشتەردى ۇنەمى باقىلاپ، رەتتەپ وتىرامىز. سىناپ باعاناسى قاشاندا 0, 2- شاماسىندا بولۋى ءتيىس.

توعىزاقتاعى نىسان -  ەلىمىزدەگى ەڭ ءىرى كوكونىس قويمالارىنىڭ ءبىرى. جوبامەن بىرگە اۋىلدا 18 ادامعا جۇمىس ورنى اشىلدى. جۇمىسكەرلەر تاجىريبەسىن ارتتىرۋعا كۇش سالىپ جاتىر. الەكساندر يۋراش، قويما ديرەكتورى:

- ءونىم وڭتۇستىك وبلىستاردان، نەگىزىنەن قاپشاعاي مەن شىمكەنتتەن تەمىرجول ارقىلى اكەلىنەدى. ءبىزدىڭ مىندەت -  ونى ساقتاۋ. جۋا اۋا اينالىپ تۇرعان جەردە بۇزىلمايدى. وعان بار جاعداي جاسالعان. قازىر قويمادا 5 مىڭ توننا پياز بار. ونى الداعى ناۋرىز ايىنا دەيىن ساقتاپ، ودان ارى ساۋداعا شىعارۋ جوسپارلانىپ وتىر. ىشكى نارىقتان ارتىلعانى رەسەيگە جول تارتپاق. شەكارا تۇبىندە ورنالاسقاندىقتان، ۇلكەن نارىققا ەنۋ مۇمكىندىگى دە مول.

ادىلبەك سارين، قارابالىق اۋدانى اكىمىنىڭ ورىنباسارى:

- بۇل جەردە ەڭ ماڭىزدىسى الماتى وبلىسىنان ءوسىرىپ اكەپ، ساقتاپ، وسى جەردە قويىپ، وسى كۇيىندە بۇزباي، قىسقا ارادا ماسكەۋگە 48 ساعاتتا جەتكىزۋگە مۇمكىندىگىمىز بار. تەمىرجول جولدارىن 3 ەسە قىسقارتىپ جاتىرمىز. قازىر كوكونىس ساقتاۋ قويماسى جانىنان قاراقۇمىق، تارى داقىلدارىن وڭدەيتىن شاعىن زاۋىتتىڭ ىرگەتاسى قالانۋدا. ونىڭ دا ونىمدەرىن رەسەي نارىعىنا وتكىزۋ كوزدەلىپ وتىر.

اۆتورلارى: ابىلاي ماۋدانوۆ، ەرمەك مۇحامەدياروۆ

www.24.kz