فلوريدا شتاتىندا سوڭعى 20 جىلدا العاش رەت ايۋ اتۋعا رۇقسات بەرىلدى
دەرەككوزىنە سۇيەنسەك، جانۋارلار الەمىن قورعاۋ جونىندەگى مەملەكەتتىك كوميسسيا ليسەنزياسى بار اڭشىلارعا جالپى سانى 320 قارا ايۋ اتۋعا عانا رۇقسات بەرىپ وتىر. شتات بيلىگىنىڭ ايتۋىنشا، بۇل باستامانىڭ ماقساتى - وڭىردە ايۋ سانى كوبەيىپ كەتكەندىكتەن، اڭنىڭ ءوسۋ قارقىنىن تۇراقتاندىرۋ.
ال، جانۋارلار الەمىن قورعاۋ سالاسىنداعى مامانداردىڭ ايتۋىنشا، شتاتتىڭ اكىمشىلىگى قوقىس قالدىقتارىن تازالاۋ جۇيەسىنە دە ءمان بەرىپ، ءتيىستى شارالاردى قولعا الۋى قاجەت. سەبەبى، جابايى جىرتقىشتىڭ ادام تۇراتىن اۋداندارعا جاقىنداۋىنا باستى سەبەپ - قوقىستاعى اس قالدىقتارىنىڭ ءيىسى.
اسسوشيەيتەد پرەسس اگەنتتىگىنىڭ حابارلاۋىنشا، جابايى اڭدى اۋلاۋ ماۋسىمى ءبىر اپتاعا سوزىلادى، ءبىراق، بەلگىلەنگەن ليميت، ياعني، 320 ايۋ اتىلماسا، اڭ اۋلاۋ ماۋسىمى جالعاسا بەرەدى.
تاعى ءبىر قىزىق دەرەككە كوز جۇگىرتسەك: مەملەكەتتىك كوميسسيا بەلگىلەگەن ەرەجە بويىنشا، اڭشى ايۋ اتىپ ولتىرگەن سوڭ، 12 ساعات ىشىندە 33 ارنايى ستانسيالاردىڭ بىرىنە حابار بەرۋى كەرەك. ەگەر بۇل ەرەجە ساقتالماسا، اڭشى 50-500 دوللار كولەمىندە ايىپپۇل تولەيدى، ءتىپتى، 60 كۇن تۇرمەگە قامالۋى دا مۇمكىن.
