وڭتۇستىك قازاقستاندا بولعان ۇيلەنۋ تويىندا وقىستان ادام اتىپ العان جىگىت 20 جىلعا سوتتالۋى مۇمكىن
ءۇش جاسار ءدۇردانانى سايرام اۋداندىق اۋرۋحاناسىنىڭ دارىگەرلەرى ۇيىنە بوساتتى. ول بىرنەشە جەرىنەن جاراقات العان، ءبىراق مەديتسينالىق كومەك كورسەتىلگەننەن كەيىن قىز بالا اياعىنان تىك تۇرىپ، ونى تۋىستارى ۇيىنە الىپ كەتتى. زارداپ شەككەن ەكىنشى بالا - ەكى جاسار راۋشان، ول شىمكەنتتە وبلىستىق بالالار كلينيكالىق اۋرۋحاناسىندا جاتىر. سايرام اۋداندىق اۋرۋحاناسىنىڭ نەيروحيرۋرگتارى ونىڭ باسىنان بىتىرا جارقىنشاقتارىن الىپ شىقتى، كەيىن ول وبلىستىق بالالار اۋرۋحاناسىنىڭ ماماندارىنا جىبەرىلدى.
ولار وق تەسىپ وتكەن كەڭىردەك تارامى مەن وڭەشتەگى جارانى ەمدەدى. «بالانىڭ موينىندا وق تەسىپ وتكەن جارا بولدى، كەڭىردەك تارامى مەن وڭەشى زاقىمدانعان. قازىر جاعدايى ءبىر قالىپقا ءتۇستى جانە ءبىز ونى جالپى پالاتاعا اۋىستىرۋ ماسەلەسىن قاراپ جاتىرمىز»، - دەدى وبلىستىق بالالار كلينيكالىق اۋرۋحاناسىنىڭ حيرۋرگيا ءبولىمىنىڭ مەڭگەرۋشىسى قايرات ءىزباسوۆ.
سونىمەن قاتار، وق اتقان جىگىتتىڭ وتباسى زارداپ شەككەندەرگە كەز كەلگەن كومەكتى كورسەتۋگە دايىن ەكەنىن جەتكىزدى. «ول وتباسىنا جانىم اشيدى، ەكى جاس كەلىنشەك كوز جۇمدى، 7 بالا اناسىز قالدى. مەن قارجىلاي بولسىن، جىلى سوزبەن بولسىن، قولىمنان كەلگەنىنشە كومەكتەسەمىن. مەن ول وتباسىنا باردىم، جەرلەۋ كەزىندە دە، ودان كەيىن دە اعاممەن بىرگە ول ۇيگە باردىق. ولارعا كوڭىل ايتتىق»، - دەدى وق اتقان جىگىتتىڭ اتاسى حۋسنيددين قوشاقوۆ.
داستان قوشاقوۆ وتباسىنداعى ەڭ ۇلكەن بالا. اتاسىنىڭ ايتۋىنشا، نەمەرەسى ءتىلالعىش بولىپ وسكەن، وعان ۇستازدارى دا، دوستارى دا ەشقاشان نارازى بولماپتى. ءۇش ۇلدى انالارى 25 مىڭ تەڭگە جالاقىمەن جالعىز اسىراعان. داستان اناسىنا كومەكتەسىپ، كورشىلەرى مەن تانىستارىنىڭ وتىنىشىمەن مال سويىپ بەرەتىن بولعان. سۇيىكتى نەمەرەسىنىڭ قولىنا قوساۋىزدىڭ قالاي تۇسكەنىن حۋسنيددين اتا بىلمەيدى. ءبىراق ول وتباسى مەن قورعاۋشىنىڭ بار كۇشى جىگىتتىڭ ادامداردى ادەيى ولتىرمەگەنىن جانە كىناسىن پوليتسياعا ءوزى بارىپ مويىنداعانىن راستاۋعا جۇمسالاتىنىن ايتتى.
ەسكە سالا كەتەيىك، ۇيلەنۋ تويىنداعى اتىس 4 -قىركۇيەكتە مانكەنت اۋىلىندا بولدى. ۇيلەنۋ تويىنىڭ قوناقتارىنىڭ ءبىرى قالىڭدىقتى وق اتۋ ارقىلى قارسى الماقشى بولعان. «الدىن الا مالىمەت بويىنشا، جىگىت قارۋدى كولىكتەن الىپ شىققاندا ول كەنەتتەن اتىلىپ كەتىپتى. وق جۇرگىزۋشىنىڭ بەتىن سىرىپ ءوتىپ، كولىككە قاراما قارسى تۇرعاندارعا تيگەن. وقيعا ورنىندا ەكى ايەل قازا تاپتى، ولاردىڭ ءبىرى 1992, ەكىنشىسى 1989 -جىلعى. تاعى ۇشەۋى جاراقات الدى»، - دەدى پودپولكوۆنيك دانيار مەيىرحان.
اتىستى ۇيىمداستىرعان 1996 -جىلعى جەرگىلىكتى تۇرعىن بولىپ شىقتى. «پوليتسەيلەر تويدا اتىس ۇيىمداستىرعان جىگىتتى 3-4 ساعاتتىڭ ىشىندە ۇستادى. ول جەرگىلىكتى تۇرعىن، كۇيەۋ جىگىتتىڭ دوسى بولىپ شىقتى. وقيعادان كەيىن ول قاشىپ كەتكەن، دەگەنمەن مانكەنتتەن تابىلدى. كۇدىكتى ءوز كىناسىن مويىندادى»، - دەدى مەيىرحان. سايرام پوليتسەيلەرى جىگىت وق اتقان قارۋدى تاركىلەدى. كۇدىكتى ونى وقيعا ورىنان 7 شاقىرىم قاشىقتىقتاعى قۇبىرعا جاسىرعان. بۇل دەرەك بويىنشا قىلمىستىق ءىس قوزعالدى، جىگىت ۋاقىتشا ۇستاۋ يزولياتورىندا وتىر، ول 20 جىلعا دەيىن سوتتالۋى مۇمكىن.