قازاقستاندىق ماجىلىسمەندەردى تۇركىمەنستاننىڭ بەيتاراپ ەل اتانۋىنىڭ 20 جىلدىعىنا ارنالعان مەرەكەگە شاقىردى
اتالعان ەل پارلامەنتشىلەرى ءبىزدىڭ ەلىمىزدە تۇركىمەنستاننىڭ بەيتاراپ ەل اتانۋىنىڭ 20 جىلدىعىنا ارنالعان شارالارعا قاتىسۋعا كەلدى.
تاراپتار ەكىجاقتى ىنتىماقتاستىقتى دامىتۋدىڭ اۋقىمدى ماسەلەلەرىن تالقىلاپ، جانار- جاعار ماي، ەنەرگەتيكا، اۋىلشارۋاشىلىعى، كولىك جانە كوممۋنيكاتسيا سالالارىنا باسا كوڭىل ءبولدى، دەپ حابارلادى ق ر پارلامەنتى تومەنگى پالاتاسىنىڭ باسپا ءسوز قىزمەتى.
قابيبوللا جاقىپوۆ تۇركىمەنستاننىڭ قازاقستان ءۇشىن ورتالىق ازياداعى باۋىرلاس ەل، تاتۋ كورشى، ستراتەگيالىق ارىپتەس ەكەنىن اتاپ ءوتتى.
- ءبىزدىڭ ەلدەر باسشىلارىنىڭ ساليقالى ساياساتىنىڭ ارقاسىندا قازاقستان مەن تۇركىمەنستان ەكىجاقتى ءتيىمدى قارىم- قاتىناستىڭ ۇلگىسىن كورسەتىپ كەلەدى، - دەدى ق. جاقىپوۆ.
ءماجىلىس ءتوراعاسىنىڭ ايتۋىنشا، «تۇركىمەنستان - وزبەكستان - قازاقستان - قىتاي» گاز قۇبىرى، «قازاقستان - تۇركىمەنستان - قىتاي» تەمىر جول قۇرىلىسى سىندى ءىرى جوبالار اياسىندا ىقپالداستىقتىڭ ماڭىزدىلىعى وتە زور.
كەزدەسۋ بارىسىندا تاۋار اينالىمىنىڭ وسىمىنە دە كوڭىل ءبولىندى. وتكەن جىلدىڭ قورىتىندىسى بويىنشا تاۋار اينالىمىنىڭ كولەمى 475 ميلليون دوللاردى قۇراعان.
ءوز كەزەگىندە گۋربانگۋل بايراموۆا جۇزەگە اسىرىلىپ جاتقان جوبالار قازاقستان مەن تۇركىمەنستان عانا ەمەس، ايماقتاعى كوپتەگەن ەلدەردىڭ دامۋىنا ىقپال ەتىپ جاتقاندىعىن اتاپ ءوتتى.
ودان ءارى گ. بايراموۆا قازاقستاندىق ارىپتەستەرىن وزدەرىنىڭ كوپ پارتيالى پارلامەنتتەرىنىڭ قىزمەتىنەن حاباردار ەتتى.
كەزدەسۋ يەلەرى پارلامەنت ارالىق بايلانىستاردى نىعايتۋ جاعدايىن دا نازاردان تىس قالدىرمادى. ول زاڭنامالىق سالادا تاجىريبە الماسۋعا جول اشۋمەن قاتار، قوس مەملەكەت اراسىنداعى دوستىقتىڭ تەرەڭدەي تۇسۋىنە مۇمكىندىك بەرەدى.
مەيماندار قازاقستاندىق ارىپتەستەرىن وسى جىلدىڭ جەلتوقسان ايىندا اشحابادتا وتەتىن مەرەكەلىك شارالارعا قاتىسۋعا شاقىردى.
