قىتايلىق ديپلوماتتار 20 -عاسىردىڭ ورتاسىندا ى. التىنساريننىڭ شىعارماشىلىعىن زەرتتەگەن - فوتو

شيان. قازاقپارات - ق ح ر شەنشي پروۆينتسياسىندا تۇراتىن ءىرى كاسىپكەر چجان فاننىڭ ۇيىندەگى جەكە كىتاپحاناسىنان قازاق حالقىنىڭ بەلگىلى اعارتۋشىسى ىبىراي التىنساريننىڭ تاڭدامالى شىعارمالارى بار كىتاپ تابىلدى.

ونى 1957 - جىلى قازاق ك س ر عىلىم اكادەمياسىنىڭ باسپاسى شىعارعان.

« بۇل كىتاپ ماعان مۇراگەرلىك جولمەن شيان شەتەل تىلدەرى ينستيتۋتىندا ورىس ءتىلىن وقىعان اكەم - چجان فەننەن قالعان. قاراڭىز، مۇندا ونىڭ جەكە ءمورى باسىلعان. ءوزىم ورىس تىلىندە سويلەمەگەندىكتەن، وسى ۋاقىتقا دەيىن بۇل قازاق ويشىلىنىڭ شىعارمالار جيناعى ەكەنىن بىلمەدىم» ، - دەپ ءتۇسىندىردى ول قازاقپارات تىلشىسىنە.

 كىتاپ پاراقتارىندا قىتاي جانە ورىس تىلىندەگى كوپتەگەن جازبا بەلگىلەر بار - ونىڭ العاشقى يەسى ى. التىنساريننىڭ شىعارمالارىن جەتە زەرتتەگەنى كورىنىپ تۇر.

 اڭگىمەلەسۋشىنىڭ ايتۋىنشا، ونىڭ ديپلومات بولعان اكەسى چجان فەن ورىس، جاپون جانە اعىلشىن تىلدەرىن مەڭگەرگەن. قىتايداعى « مادەني توڭكەرىس» جىلدارىندا (1966-1976 جج. ) « ينتەلليگەنت» اتاعىنا يە بولعان ول سيان مەكتەپتەرىنىڭ بىرىندە اعىلشىن ءتىلىنىڭ مۇعالىمى بولىپ جۇمىس ىستەگەن.

 ى. التىنساريننىڭ شىعارمالار جيناعىنىڭ قازىرگى يەسىنىڭ اتاسى چجان يان باي كاسىپكەردىڭ بالاسى بولعان. جاپونيادا ءبىلىم العان. وقۋدان ورالعان سوڭ قىتاي كومپارتياسىنىڭ قاتارىنا كىرىپ، جەرگىلىكتى استىرتىن جۇمىس ىستەۋشىلەرگە كوپ كومەكتەسكەن. ولاردىڭ اراسىندا ق ح ر- دىڭ قازىرگى ءتوراعاسى شي جينپيننىڭ اكەسى - شي چجۋنسيۋن دە بولعان.