13:38, 30 - قىركۇيەك 2014 | GMT +5
قازاقستاندىق تەڭىز پورتتارىنىڭ جۇك قابىلداۋ مۇمكىندىگى جىلىنا 20 ميلليون تونناعا دەيىن جەتكىزىلەدى
استانا. قازاقپارات - قازاقستاندىق تەڭىز پورتتارىنىڭ جۇك قابىلداۋ مۇمكىندىگى 2020-جىلعا قاراي جىلىنا 20 ميلليون تونناعا دەيىن جەتكىزىلەدى. بۇل تۋرالى بۇگىن وتكەن «سۋ كولىگىندەگى قاۋىپسىزدىكتى قامتاماسىز ەتۋدىڭ ماڭىزدى ماسەلەلەرى» اتتى حالىقارالىق عىلىمي-تاجىريبەلىك كونفەرەنتسيادا ق ر ينۆەستيتسيالار جانە دامۋ مينيسترلىگىنىڭ كولىك كوميتەتىنىڭ ءتوراعاسى اسەت اساۋبايەۆ ايتتى.
ونىڭ ايتۋىنشا، اقتاۋ پورتىندا قوسىمشا تەرمينالدار سالۋ جانە قۇرىق پورتىندا سال كەشەنىن سالۋ ارقىلى كاسپي تەڭىزىنەن تاسىمالداناتىن جۇكتەردىڭ مولشەرىن كوبەيتۋ بويىنشا ءبىرقاتار جۇمىستار اتقارىلۋدا.
«اقتاۋ پورتىنىڭ جۇك وتكىزۋ الەۋەتىن كۇشەيتۋ ءۇشىن تاعى ءۇش قۇرعاق جۇك تەرمينالدارىنىڭ قۇرىلىسى جۇرگىزىلۋدە. بۇل ءوز كەزەگىندە قۇرعاق جۇكتەردى قابىلداۋ مۇمكىندىگىن 3 ميلليون تونناعا دەيىن كوبەيتەدى. ال قۇرىق پورتىندا قۋاتتىلىعى 4 ميلليون تونناعا دەيىن جەتەتىن سال كەشەنىن سالۋ جوسپارلانعان»، - دەپ اتاپ ءوتتى ءا. اساۋبايەۆ.
قازاقستاندىق تەڭىز پورتتارىنىڭ جۇك قابىلداۋ مۇمكىندىگى جىلىنا 20 ميلليون تونناعا دەيىن جەتكىزىلەدى
اۆتور: ءابۋ-اسقار مەكەش ۇلى
