قازاقستاندا جىل سايىن 20 مىڭعا جۋىق بوس جۇمىس ورنى تابىلادى - قاسىم-جومارت توقايەۆ
سەنات ءتوراعاسىنىڭ ايتۋىنشا، بۇگىنگى جاھاندانۋ الەمىندە باسەكەگە قابىلەتتى بولۋ مەملەكەتتىڭ تۇراقتى دامۋىنا قاجەتتى ەڭ ماڭىزدى فاكتورلاردىڭ ءبىرى. ال اتالعان فاكتور كوپ جاعدايدا ادامي كاپيتالدىڭ ساپاسىمەن ولشەنسە، مۇنى قالىپتاستىرۋداعى باستى ءرولدى ءبىلىم اتقارادى.
«قازىرگى ۋاقىت كاسىبي ماماننان جوعارى بىلىكتىلىكتى، ۇتقىرلىق پەن ۇشقىر ويدى، ءوز ءبىلىمىن ۇدايى جەتىلدىرىپ وتىرۋدى تالاپ ەتەدى. وسىنداي تالاپتارعا ساي كادرلار دايىنداۋدى قامتاماسىز ەتۋ وتاندىق ءبىلىم بەرۋ جۇيەسىنىڭ باستى مىندەتى. كاسىپتىك تەحنيكالىق جانە جوعارى ءبىلىم بەرۋ اعىمداعى عانا ەمەس كەلەشەكتەگى وتاندىق ەكونوميكانىڭ بىلىكتى ماماندارعا دەگەن قاجەتتىلىكتەرىن تولىققاندى قاناعاتتاندىرۋعا باعدار الۋى ءتيىس»، دەدى سەنات ءتوراعاسى.
سونىمەن قاتار، سپيكەر سوڭعى ۋاقىتتا گۋمانيتارلىق سالا ماماندارىنا دەگەن سۇرانىس كۇرت ءتۇسىپ كەتكەنىن اتاپ ءوتتى. ونىڭ ايتۋىنشا، ەكونوميكا تەحنيكالىق مامانداردى تالاپ ەتىپ وتىر. سوعان وراي، ءوندىرىستىڭ ورتا بۋىن كادرلارىن دايارلاۋعا كوشۋ ماڭىزدى.
«ەڭبەك ورگاندارىنىڭ مالىمەتتەرىنە سۇيەنسەك، قازاقستاندا جىل سايىن 20 مىڭعا تارتا جۇمىس ورنى بوس قالادى. ال بۇل سالاعا ناقتى كاسىبي تەحنيكالىق ءبىلىم يەلەرى تالاپ ەتىلەدى. بولاشاقتا، يننوۆاتسيالىق عىلىمي قامتىمدى ەكونوميكاعا كوشۋگە وراي جوعارى بىلىكتى ماماندارعا سۇرانىس بۇدان دا ارتا تۇسەدى. بۇدان بولەك، ەلباسى جولداۋىندا ايتىلعانىنداي، 2030-جىلعا قاراي ەڭبەك ونىمدىلىگىن بەس ەسەگە ارتتىرۋعا ءتيىسپىز. ال جاڭا تەحنولوگيالاردى يگەرىپ، زاماناۋي قۇرالداردى پايدالانباي ول تاپسىرمانى جۇزەگە اسىرۋ مۇمكىن ەمەس»، - دەدى قاسىم-جومارت توقايەۆ.
اۆتور: قانات مامەتقازى ۇلى
