ب ۇ ۇ بولجامى: 2050 -جىلى قازاقستاندا 10 تۇرعىننىڭ 7 ەۋى قالادا تۇرادى

نۇر- سۇلتان. قازاقپارات - بىرىككەن ۇلتتار ۇيىمىنىڭ بولجامىنا سايكەس، 2050 -جىلعا قاراي قازاقستاندا 10 تۇرعىننىڭ جەتەۋى قالادا تۇرادى، دەپ حابارلايدى قازاقپارات ءتىلشىسى.

Energyprom.kz مالىمەتىنشە، قازاقستاندا قۇرىلىس سالاسى حالىق ءوسىمى قارقىنىنان بىرنەشە ەسە جوعارى. ماسەلەن، وسى جىلدىڭ 7 ايىنىڭ قورىتىندىسىندا ەلىمىزدە 7,7 ميلليون شارشى مەتر تۇرعىن ءۇي پايدالانۋعا بەرىلدى. بۇل وتكەن جىلعى كورسەتكىشتەن 10,3 پايىزعا كوپ. مۇنىڭ ۇستىنە جالپى پايدالانۋعا بەرىلگەن 4 باسپانانىڭ ۇشەۋى، ناقتى ايتقاندا 5,7 ميلليون شارشى مەتر تۇرعىن ءۇي قالالاردا سالىنعان. بيىل ەلىمىزدە 17 ميلليون شارشى مەتر تۇرعىن ءۇيدى پايدالانۋعا بەرۋ جوسپارلانىپ وتىر. اتالعان جوسپار ورىندالسا وندا ول جاڭا رەكوردتىق كورسەتكىش بولماق. ال قازاقستان حالقىنىڭ جىلدىق ءوسىمى نەبارى 1,3 پايىز شاماسىندا عانا.

2021 -جىلدىڭ 1-شىلدەسىندە ەلىمىزدە 19 ميلليون ادام تىركەلگەن. قالا حالقى 2 پايىزعا جۋىق ءوسىپ، 11,3 ميلليون ادامعا جەتكەن. بۇل ەلىمىزدەگى جالپى حالىق سانىنىڭ 59,2 پايىزىن قۇرايدى، ەلىمىزدە تۇرعىن ءۇي قۇرىلىسى سالاسىنداعى قارقىندى وسىمگە مەملەكەتتىك باعدارلاما اياسىنداعى قولجەتىمدى يپوتەكالىق نەسيە سەپ بولىپ وتىر. تەك وسى جىلدىڭ 7 ايىندا عانا «وتباسى» بانكى 183,9 ميلليارد تەڭگەگە جاڭا باسپانا ساتىپ الۋ ءۇشىن 14,4 مىڭ نەسيە بەردى.

«وتباسى» بانكىنىڭ جانە وزگە دە دامۋ ينستيتۋتتارى مەن مەملەكەتتىك باعدارلامالاردىڭ ارقاسىندا ەلىمىزدە ۋربانيزاتسيا قارقىن الىپ كەلە جاتىر. بۇۇ ەكونوميكالىق جانە الەۋمەتتىك ماسەلەلەر دەپارتامەنتىنىڭ بولجامىنا قاراعاندا، 2050 -جىلعا قاراي قازاقستاندا ۋربانيزاتسيا دەڭگەيى 69,1 پايىزعا جەتەدى. ياعني، ەلىمىزدىڭ 10 تۇرعىنىنىڭ 7-ەۋى قالادا تۇراتىن بولادى. سالىستىرمالى تۇردە ايتار بولساق، الەمدە ورتاشا بولجامدى كورسەتكىش - 68,4 پايىز. بۇل رەتتە ازيا ءۇشىن 66,2, ورتالىق ازيا ءۇشىن 60,5 پايىزدى قۇرايدى. تابىس دەڭگەيى جوعارى ەلدەرگە ارنالعان بۇل بولجام 88,4, تابىسى تومەن ەلدەر ءۇشىن 50,2 پايىز شاماسىندا. وسى تۇرعىدان العاندا قازاقستانعا ارنالعان بولجام ومتيميستىك دەۋگە بولادى.