عالىمدار 2045 - جىلعا قاراي الەمدە بولاتىن ءۇش جاڭالىقتى اتادى

استانا. قازاقپارات- پەنتاگوننىڭ قورعانىستىڭ زەرتتەۋ جوباسى اگەنتتىگى (DARPA) الداعى 30 جىلدىڭ باستى جاڭالىعى رەتىندە روبوتتار مەن جاساندى ينتەللەكتتىڭ ونەركاسىپتەگى جۇمىسشىلاردى الماستىرىپ، درونداردىڭ اسكەري جانە كوممەرتسيالىق ماقساتتا پايدالانىلاتىنىن جانە ءوزى جۇرەتىن كولىكتەردىڭ كەڭىنەن قولدانىسقا ەنەتىنىن ايتادى، دەپ جازادى naryk.kz.

 DARPA اگەنتتىگىنىڭ «بولاشاققا باعىت» بايانداماسىندا عالىمدار 2045 -جىلعا قاراي الەمدە بولاتىن ەڭ نەگىزگى ءۇش وزگەرىسكە كەڭىنەن توقتالعان.

بيولوگيا عىلىمدارىنىڭ دوكتورى دجاستين سانچەستىڭ بولجامىنشا ادامدار الداعى 30 جىلدا وزدەرىنىڭ ميى ارقىلى قورشاعان ورتانى باسقارا الاتىن دەڭگەيگە جەتەدى.

«ەلەستەتىپ كورىڭىز، ءسىز تەك ويلاۋ ارقىلى عانا اينالاعا اسەر ەتە الاسىز. نەيرو سيگنالدار ارقىلى وزگەلەرمەن بايلانىس قۇرۋ كوممۋنيكاتسيانىڭ دامىعان شەگىنە جەتكىزەدى»، - دەيدى عالىم.

سانچەستىڭ سوزىنشە، قازىرگى تاڭدا DARPA اگەنتتىگى نەيرو تەحنولوگيادا ۇلكەن جۇمىستار اتقارۋدا. ماسەلەن، قازىردىڭ وزىندە وسى سالانىڭ عالىمدارى ادامزاتتىڭ ويلاۋ ارقىلى وزگەلەرگە جانە قورشاعان ورتاعا اسەر ەتۋدىڭ قاراپايىم فۋتۋريستىك ۇلگىلەرىن دايىنداپ قويعان.

وتكەن اپتادا عانا اگەنتتىك سال اۋرۋىنا ۇشىراعان ادامعا سەزىم مۇشەلەرىن بەرىپ، دەنساۋلىعىن قالپىنا كەلتىرگەنىن ايتادى دوكتور سانچەس.

ميدىڭ كۇشىمەن وزگەلەرگە اسەر ەتۋدەن بولەك الداعى 30 جىلدا بولاتىن ەڭ ۇلكەن جاڭالىق رەتىندە گەولوگ ستەفاني تومپكينس بيىك عيماراتتار سالۋداعى يننوۆاتسيا تۋرالى ايتادى.

«الداعى ۋاقىتتا وتە شىدامدى ءبىراق وتە جەڭىل عيماراتتار سالۋ مۇمكىندىگىنە يە بولامىز. ول ءۇشىن تەمىردەي مىقتى جانە مولەكۋلانىڭ سالماعىنداي جەڭىل جاڭا ماتەريالدار پايدا بولادى»، - دەيدى عالىم.

ونىڭ ايتۋىنشا، 2045 -جىلعا قاراي عيماراتتار ادام تانىماستاي وزگەرىسكە ۇشىرايدى.

ءۇشىنشى جاڭالىق رەتىندە ينجەنەر، استرونافت پام مەلروي كولىك پەن تاسىمال سالاسىنداعى وزگەرىستى ايتادى. ونىڭ ايتۋىنشا، 2045 -جىلعا قاراي كولىكتەر مەن ۇشاقتاردا اقىلدى تەحنولوگيالار ورناتىلىپ، اپاتتىڭ الدىن الۋ ءۇشىن ولاردىڭ اراسىندا ينتەراكتيۆتى تەحنولوگيا ەنگىزىلەدى. ياعني، كولىكتەر ءوزارا «سويلەسە» الاتىن دەڭگەيگە جەتپەك.

«ءتىپتى، ۇشاقتار مەن كوشەدەگى كولىكتەرگە جۇرگىزۋشىلەر مەن ۇشقىشتار قاجەتسىز بولىپ قالۋى عاجاپ ەمەس»، - دەيدى عالىم.

Baq.kz