2030-جىلعا قاراي قازاقستاندىق پورتتاردىڭ وتكىزۋ قابىلەتىن 30 ميلليون تونناعا دەيىن ۇلعايتامىز - مينيستر
استانا. KAZINFORM - بۇل تۋرالى ق ر كولىك ءمينيسترى مارات قارابايەۆ ماڭعىستاۋ وبلىسىنداعى تەڭىز پورتتارىن دامىتۋ جوسپارىنىڭ ىسكە اسىرىلۋىن تەكسەرۋ بارىسىندا ءمالىم ەتتى، دەپ حابارلايدى مينيسترلىكتىڭ باسپا ءسوز قىزمەتى.
باسپا ءسوز مالىمەتتەرىنە قاراعاندا، كولىك ءمينيسترى مارات قارابايەۆ ماڭعىستاۋ وبلىسىنا جۇمىس ساپارى اياسىندا كاسپيدەگى ءىرى كولىك ينفراقۇرىلىمىنىڭ الەۋەتىن باعامدادى. مينيستر اقتاۋ، قۇرىق، باۋتينو تەڭىز پورتتارى مەن سارجا، ەرتاي، سيەۆەرنىي تەڭىز تەرمينالدارىنىڭ جۇمىسىن تەكسەردى.
تەڭىز ينفراقۇرىلىمىن دامىتۋ اياسىندا قوسىمشا كونتەينەرلىك تەرمينالدار سالۋ، قايتا تيەۋ تەحنيكاسىن جاڭارتۋ، لوگيستيكانى دامىتۋ، كەدەندىك جانە اكىمشىلىك راسىمدەردى وڭايلاتۋ، سونداي-اق ت ح ك ب جانە سولتۇستىك-وڭتۇستىك دالىزدەرىن سيفرلاندىرۋ جۇمىستارى اتقارىلۋدا.
جالپى، وسى جۇمىستى ىسكە اسىرۋ قورىتىندىسى بويىنشا 2030-جىلعا قاراي قازاقستاندىق پورتتاردىڭ وتكىزۋ قابىلەتىن اعىمداعى 21 ميلليون توننادان 30 ميلليون تونناعا دەيىن ۇلعايتۋ جوسپارلانىپ وتىر. اتالعان جۇمىستار ترانسكاسپي حالىقارالىق كولىك باعىتىن دامىتۋ شەڭبەرىندە قابىلداناتىن كەشەندى شارالاردىڭ ءبىر بولىگى بولىپ تابىلادى جانە وسى مارشرۋتتا جۇكتەردى تاسىمالداۋ بويىنشا ءوسىپ كەلە جاتقان قاجەتتىلىكتەرگە قىزمەت كورسەتۋدى قامتاماسىز ەتۋگە مۇمكىندىك بەرەدى.
«ماسەلەن، قۇرىق پورتى اكۆاتورياسىنىڭ ءتۇبىن تەرەڭدەتۋ جۇمىستارى ءجۇرىپ جاتىر. ماماندار پورت ءتۇبىن ءبىر جارىم-ەكى مەترگە تەرەڭدەتەدى. جۇمىستارعا ءىرى ەۋروپالىق Jan De Nul كومپانياسىنىڭ ارنايى تەحنيكاسى جۇمىلدىرىلدى. ءدال وسىنداي جۇمىستار اقتاۋ پورتىندا دا جۇرگىزىلەدى. جۇمىس ساپارى بارىسىندا مينيستر باۋتينو تەڭىز پورتىنىڭ اكۆاتورياسىنداعى كەمەلەر قوزعالىسىن باسقارۋ جۇيەسىنىڭ جۇمىسىمەن دە تانىستى. بۇل جۇيە ناۆيگاتسيالىق قاۋىپسىزدىگىن قامتاماسىز ەتەدى جانە تەڭىزدە اپاتتاردىڭ تۋىنداۋ قاۋپىنىڭ الدىن الادى. جۇيە بيىلعى جىلدىڭ تامىز ايىندا قۇرىق تەڭىز پورتىنىڭ اكۆاتورياسىندا ىسكە قوسىلدى. ال كەلەسى 2025-جىلى اقتاۋ پورتىندا دا ءدال وسىنداي جۇيە ىسكە قوسىلادى دەپ جوسپارلانۋدا»، - دەلىنگەن حابارلامادا.
بۇل شارالاردى ىسكە اسىرۋ سولاس-74 حالىقارالىق كونۆەنتسياسىنىڭ تالاپتارىنا سايكەس كاسپي تەڭىزىنىڭ قازاقستاندىق سەكتورىندا ناۆيگاتسيالىق قاۋىپسىزدىكتى قامتاماسىز ەتۋگە مۇمكىندىك بەرەدى.
ەستەرىڭىزگە سالا كەتەيىك، ترانسكاسپي حالىقارالىق كولىك باعىتى بويىنشا جۇكتەردى تاسىمالداۋ كولەمى 7 ايدا %62 عا ۇلعايىپ، 2,5 ميلليون توننانى قۇرادى (2023-جىلدىڭ سايكەس كەزەڭىندە بۇل كورسەتكىش 1,6 ميلليون تونناعا تەڭ بولدى).
