استانانىڭ تۇرعىن ءۇي قورى 2030-جىلعا قاراي 37 ميلليون شارشى مەترگە جەتەدى
بۇگىن ماجىلىستە «نۇرلى جول» باعدارلاماسىن ىسكە اسىرۋ شەڭبەرىندە جالعا بەرىلەتىن تۇرعىن ءۇي قۇرىلىسىنىڭ بارىسى مەن تۇرعىن ءۇي ينفراقۇرىلىمىن نىعايتۋ شارالارى تاقىرىبىنداعى دوڭگەلەك ۇستەلدە استانا قالاسى اكىمىنىڭ ءبىرىنشى ورىنباسارى سەرگەي حوروشۋن ءمالىم ەتتى.
«2030-جىلعا قاراي استانا قالاسىنىڭ حالىق سانى 1 ميلليون 220 مىڭ بولعاندا، ەلورداداعى تۇرعىن ءۇي قورىنىڭ جالپى اۋدانى 37 ميلليون شارشى مەترگە جەتۋى كەرەك. بۇل رەتتە ءبىر تۇرعىنعا 30 شارشى مەتردەن كەلەتىن نورما قاراستىرىلىپ وتىر. بۇگىنگى تاڭدا استانانىڭ تۇرعىن ءۇي قورى 19 ميلليون شارشى مەتردى قۇرايدى. بۇل رەتتە سوڭعى 18 جىلدا 15,5 ميلليون شارشى مەتر پايدالانۋعا بەرىلگەن. ياعني، ءبىز 2030-جىلعا دەيىن بەلگىلەنگەن مەجەگە جەتۋ ءۇشىن جىل سايىن 1 ميلليون 100 مىڭ شارشى مەتر تۇرعىن ءۇي سالىنۋى ءتيىس»، - دەدى س. حوروشۋن.
اكىم ورىنباسارىنىڭ ايتۋىنشا، 2015-جىلى قالادا 1 ميلليون 759 مىڭ شارشى مەتر تۇرعىن ءۇي پايدالانۋعا بەرىلدى. جوسپار بويىنشا بۇل كورسەتكىش اعىمداعى جىلى 2 ميلليون شارشى مەترگە جەتكىزىلمەك.
اۆتور: قانات مامەتقازى ۇلى
