باسپانامەن قامتۋ 2030 -جىلعا قاراي ءار تۇرعىنعا 30 شارشى مەترگە جەتۋى كەرەك - ەلباسى جولداۋى
اتاپ ايتقاندا، مەملەكەت باسشىسى سوڭعى جىلدارى جۇزەگە اسىرىلىپ جاتقان باعدارلامالار ارقاسىندا قازاقستاندا پايدالانۋعا بەرىلگەن تۇرعىن ۇيلەردىڭ كولەمى جىلىنا 10 ميلليون شارشى مەتردەن اسقانىن اتاپ وتەدى.
«تۇرعىن ءۇيدى كوپشىلىككە قولجەتىمدى ەتكەن تۇرعىن ءۇي جيناقتاۋ جۇيەسى ءتيىمدى جۇمىس ىستەۋدە. باسپانامەن قامتۋ كورسەتكىشى سوڭعى 10 جىلدا ءبىر تۇرعىنعا شاققاندا 30 پروتسەنتكە ءوسىپ، بۇگىندە 21,6 شارشى مەتردى قۇرادى. بۇل كورسەتكىشتى 2030 -جىلى 30 شارشى مەترگە دەيىن جەتكىزۋ كەرەك. وسى مىندەتتى ورىنداۋ بارىسىندا قۇرىلىس سالۋدىڭ جاڭا ادىستەرىن، زاماناۋي ماتەريالداردى، سونداي-اق عيماراتتاردىڭ جوباسى مەن قالا قۇرىلىسىنىڭ جوسپارىن جاساعاندا مۇلدە باسقا تاسىلدەردى قولدانۋ كەرەك»، دەلىنگەن ەلباسى جولداۋىندا.
بۇدان بولەك، پرەزيدەنت عيماراتتاردىڭ ساپاسىنا، ەكولوگيالىق تازالىعىنا جانە ەنەرگيالىق تيىمدىلىگىنە جوعارى تالاپ قويۋ ماسەلەسىن العا تارتادى.
«سالىناتىن جانە سالىنعان ۇيلەر مەن ينفراقۇرىلىمدىق نىسانداردى ينتەللەكتۋالدى باسقارۋ جۇيەلەرىمەن جابدىقتاۋ كەرەك. بۇل تۇرعىندارعا قولايلى جاعداي جاساپ، ەلەكتر ەنەرگياسىن، جىلۋمەن سۋدى تۇتىنۋدى قىسقارتىپ، تابيعي مونوپوليستەردى ءتيىمدى جۇمىسقا ىنتالاندىرادى. زاڭناماعا، سونىڭ ىشىندە تابيعي مونوپوليالار سالاسىن رەتتەيتىن زاڭدارعا ءتيىستى وزگەرىستەر ەنگىزۋ قاجەت. اكىمدەر تۇرعىن ءۇي- كوممۋنالدىق ينفراقۇرىلىمىن جەتىلدىرۋ ماسەلەسىن مەملەكەت- جەكەمەنشىك سەرىكتەستىگى نەگىزىندە بەلسەندى شەشۋى كەرەك. اۋىلدىق ەلدى مەكەندەردى ساپالى اۋىزسۋمەن قامتاماسىز ەتۋ ءۇشىن ۇكىمەت بۇل ىسكە بارلىق قاراجات كوزدەرىنەن جىل سايىن كەم دەگەندە 100 ميلليارد تەڭگە قاراستىرۋى قاجەت» دەلىنگەن جولداۋدا.
