ءۇيىندى استىنان 202 ساعاتتان سوڭ امان شىققان ازاماتتىڭ وقيعاسى
دەرەۋ جەدەل جاردەم كولىگىمەن اۋرۋحاناعا جەتكىزىلگەن ول ەسىن جيعان سوڭ، جەر سىلكىنىسى كەزىندە باسىنان وتكەن جاعدايلاردى بايانداپ بەردى.
«تەلەفوننىڭ وياتقىشىن تاڭعى ساعات 8.45 كە قويىپ جاتقانىم ەسىمدە. تەلەفونىم توسەكتىڭ استىندا قالىپتى. قۋاتى دا وشكەن. قۇشاعىمىزدا مۇحاممەد الپارسلان اتتى التى ايلىق ءسابيىمىز بار. باسقا بالالارىمىز سول جەردە جان تاپسىردى. نەشە كۇن بويى ءنار تاتپادىق، تەك ءبىر ۆازەلين تاۋىپ الىپ، تالعاجاۋ ەتپەك بولىپ اۋزىمىزعا سالدىق. ءبىراق ونى دا جەي المادىق، تۇكىرىپ تاستادىق. مۇحاممەد الپارسلانعا ءوزىمنىڭ تۇكىرىگىمدى بەردىم. بەسىنشى كۇنى جۇبايىمنان ءسۇت شىقپادى. مۇحاممەد الپارسلان بەسىنشى كۇنى شىدامادى، تاڭەرتەڭ ساعات التىدا قايتىس بولدى»، - دەپ اڭگىمەلەدى امان قالعان ازامات.
قيراعان ءۇيدىڭ ءۇيىندىسىنىڭ استىنان جۇبايى ەكەۋىنىڭ امان-ەسەن شىعۋىن مۋھاررەم جاساعان دۇعانىڭ كومەگى دەپ تۇسىنەدى.
«العاشىندا اۆتوتۇراقتار جابىق ەدى. ەكىنشى جەر سىلكىنىسى كەزىندە ول جەر اشىلىپتى. مۇنى مەن جەتىنشى كۇنى عانا بايقادىم. تىنىس الا الاتىن جەر سول اۆتوتۇراق قانا ەدى. اللاعا شۇكىر، قولىمدا ساعاتىم بار ەدى. جەتىنشى كۇنى تاڭعى ءتورتتىڭ كەزىندە كىرپىشتىڭ ىلعالدى ەكەنىن بايقادىم. جۇبايىم حيداەتكە كورسەتسەم، ول سەنبەدى. جاقسىلاپ قازدىم، سۋ شىقتى. قار سۋى ەكەن، ءبىراق بىزدە قار جاۋماعان ەدى. اللا بىزگە مەيىرىمىن كورسەتتى. سۋ شىققان جەردى ورىندىقپەن كەڭەيتتىم. شىعاتىن جەر بار ەكەن. ول جەردى دە كەڭەيتىپ، شىعاتىن جولدى اشىپ، امان-ەسەن جەر بەتىنە شىقتىق.
اۋرۋحانادان شىققان سوڭ، جۇبايىم ەكەۋىمىز اللانىڭ جولىندا قىزمەت ەتەمىز. بالكىم، جۇمىس جاسامايتىن دا شىعارمىن. 32 جاسقا كەلىپ، قۇران كارىمدى ۇيرەنبەگەنىمە قاتتى ۇيالامىن. بۇكىل تۇركيا ەستىسىن، قۇران كارىمدى ۇيرەنبەۋ - ۇلكەن ايىپ. بۇل جاقتا تەك دۇعانىڭ ارقاسىندا عانا امان قالدىق»، - دەيدى مۋھاررەم پولات.