2027 -جىلى الەمدى نە كۇتىپ تۇر؟ - The Economist جىل سايىنعى 10 بولجامىن جاريالادى

استانا.قازاقپارات - سوعىس قاۋپى، جاساندى ينتەللەكتىنىڭ ىقپالى، بۇرىن- سوڭدى بولماعان اپتاپ ىستىق پەن الەمدىك ەكونوميكاداعى تۇراقسىزدىق.

Жаңа хаттама: бөгде ғаламшардан белгі келсе, алдымен не істеу керек
Фото: СhatGPT иллюстрациясы

بريتاندىق The Economist باسىلىمى 2027-جىلى الەم نازارىندا بولاتىن باستى ون ءۇردىستى اتادى. بولجامدار The World Ahead 2027 اتتى جىل سايىنعى ارنايى شىعارىلىمدا جاريالاندى، دەپ حابارلايدى turkystan.kz.

باسىلىم رەداكتورى توم ستەنديدجدىڭ پىكىرىنشە، تەحنولوگيانىڭ دامۋى ءومىرىمىزدى عىلىمي- فانتاستيكالىق فيلمگە ۇقساتىپ بارادى. اۆتوكولىكتەر جۇرگىزۋشىسىز قوزعالادى، روبوتتار ادام جۇمىسىن اتقارا باستادى، ال جاساندى ينتەللەكت كۇن سايىن جاڭا نارسە ۇيرەنىپ جاتىر جاتىر. الايدا كەلەسى جىلى ادامزاتتى جاڭا سىن-قاتەر دە كۇتىپ تۇرۋى مۇمكىن.

The Economist پىكىرىنشە، 2027-جىلى مىنا 10 ۇردىسكە نازار اۋدارۋ كەرەك.

1. ا ق ش-تا ترامپتان كەيىنگى كەزەڭگە دايىندىق باستالادى. 2026-جىلعى ارالىق سايلاۋدان كەيىن دونالد ترامپتىڭ ورنىنا كىم پرەزيدەنت بولاتىنى تۋرالى ساياسي تالقىلاۋلار كۇشەيەدى. الايدا باسىلىمنىڭ بولجامىنشا، ترامپ بيلىگىنىڭ قالعان ۋاقىتىندا دا بەلسەندى ساياسات جۇرگىزىپ، حالىقارالىق قاتىناستارعا ىقپال ەتۋگە تىرىسادى.

2. يرانداعى سوعىستىڭ سالدارى ءالى دە سەزىلە بەرەدى. قاقتىعىستىڭ جاقىن ارادا تولىق اياقتالۋى ەكىتالاي دەگەن پىكىر بار. ونىڭ سالدارى مۇناي نارىعىنا، حالىقارالىق ساۋداعا جانە ازىق-تۇلىك قاۋىپسىزدىگىنە اسەر ەتۋى مۇمكىن. اسىرەسە تىڭايتقىش تاپشىلىعى اۋىل شارۋاشىلىعى ءۇشىن جاڭا قيىندىقتار تۋعىزۋى ىقتيمال.

3. 2027-جىل تاريحتاعى ەڭ ىستىق جىل بولۋى مۇمكىن. The Economist كليماتتىڭ جىلىنۋى مەن قۋاتتى ەل-نينو قۇبىلىسى الەمنىڭ كوپتەگەن بولىگىندە قۇرعاقشىلىقتى، اپتاپ ىستىقتى جانە ورمان ءورتىن ۋشىقتىرىپ جىبەرۋى مۇمكىن دەگەن بولجام ايتادى. سونىمەن بىرگە ەلدەردىڭ جاڭارتىلاتىن ەنەرگيا كوزدەرىنە قىزىعۋشىلىعى ارتا ءتۇسۋى ىقتيمال.

4. جاساندى ينتەللەكتىگە قارسى نارازىلىق كۇشەيەدى. ج ي كومپانيالارىنىڭ قارىزى كوبەيىپ، تەحنولوگيا نارىعىندا قارجىلىق تۇراقسىزدىق قاۋپى ارتۋى مۇمكىن. بۇعان قوسا، جەتىلدىرىلگەن جاساندى ينتەللەكت كيبەرشابۋىلداردا كەڭىنەن قولدانىلۋى ىقتيمال. ال قوعامدا تەحنولوگيانىڭ جۇمىس ورىندارىنا جانە قورشاعان ورتاعا اسەرى تۋرالى پىكىرتالاس جالعاسادى.

5. فرانسياداعى پرەزيدەنت سايلاۋى ەۋروپانىڭ بولاشاعىنا اسەر ەتۋى مۇمكىن. 2027 -جىلى فرانسيادا وتەتىن سايلاۋ ەۋروپالىق وداق ءۇشىن ماڭىزدى ساياسي وقيعاعا اينالماق. باسىلىم اسىرەسە وڭشىل پوپۋليستىك باعىتتاعى مارين لە پەننىڭ اينالاسىنداعى ساياسي جاعدايعا نازار اۋدارعان. سايلاۋ ناتيجەسى فرانسيا مەن گەرمانيانىڭ ىنتىماقتاستىعىنا جانە ەو- نىڭ ەكونوميكالىق ساياساتىنا ىقپال ەتۋى مۇمكىن.

6. الەمدە قارىز داعدارىسىنىڭ قاۋپى ارتادى. مەملەكەتتىك شىعىنداردىڭ كوبەيۋى، ينفلياتسيا جانە جاساندى ينتەللەكت ينفراقۇرىلىمىنا سالىناتىن وراسان ينۆەستيتسيالار دامىعان ەلدەردىڭ قارىز الۋ قۇنىن ءوسىرىپ وتىر. جوعارى پايىزدىق مولشەرلەمەلەر بيزنەسكە دە، قاراپايىم حالىققا دا قىسىم ءتۇسىرۋى مۇمكىن.

7. تايۆان توڭىرەگىندەگى شيەلەنىس ۋشىعۋى ىقتيمال. كەيبىر باعالاۋلار بويىنشا، قىتاي باسشىسى شي جينپيڭ قارۋلى كۇشتەرگە 2027-جىلعا قاراي تايۆانعا قاتىستى اسكەري وپەراتسيا جۇرگىزۋگە دايىن بولۋ مىندەتىن قويعان. الايدا بۇل قىتاي ءدال سول جىلى شابۋىل جاسايدى دەگەن ءسوز ەمەس. باسىلىم ۋكرايناداعى جانە تاياۋ شىعىستاعى سوعىستار اسكەري تەحنولوگيالاردىڭ ىقپالىن وزگەرتكەنىنە نازار اۋدارادى.

8. ارىقتاتاتىن دارىلەر جاڭا تۇتىنۋ ءۇردىسىن قالىپتاستىرادى. Ozempic سياقتى پرەپاراتتاردىڭ كەڭ تارالۋى فارماتسيەۆتيكا نارىعىنا عانا ەمەس، كيىم، كوسمەتيكا جانە فيتنەس سالالارىنا دا اسەر ەتۋى مۇمكىن. سالماق تاستاعان ادامداردىڭ ءومىر سالتى مەن تۇتىنۋ ادەتتەرى وزگەرىپ، ۇزاق ءومىر سۇرۋگە باعىتتالعان مەديتسينالىق زەرتتەۋلەرگە قىزىعۋشىلىق ارتادى.

9. عارىشقا ۇشۋ ارزانداي تۇسەدى. SpaceX كومپانياسىنىڭ Starship زىمىرانى سپۋتنيكتەردى تۇراقتى تۇردە ۇشىرۋ ءۇشىن قولدانىلا باستاۋى مۇمكىن. قىتاي كومپانيالارى دا قايتا پايدالانىلاتىن زىمىران تەحنولوگيالارىن دامىتادى. بۇل جەكە عارىش ستانتسيالارىن قۇرۋعا جانە ءتىپتى دەرەكتەر ورتالىقتارىن عارىشتا ورنالاستىرۋ يدەياسىنا جول اشۋى ىقتيمال.

10. گولليۆۋد ەسكى فيلمدەرگە قايتا ورالادى. 2027-جىلى «جۇلدىزدى سوعىستار» (Star Wars) فرانشيزاسىنا 50 جىل تولادى. وسىعان وراي ايگىلى تۋىندى قايتا كورسەتىلىپ، جاڭا فيلمدەر ۇسىنىلادى. سونىمەن قاتار «كەك الۋشىلار» (Avengers) مەن دجەيمس بوند تۋرالى جوبالار كورەرمەنگە قايتا جول تارتپاق. ءبىراق The Economist اۋديتوريا بۇرىننان تانىس كەيىپكەرلەردەن گورى جاڭا وقيعالاردى كوبىرەك قالاي باستاۋى مۇمكىن ەكەنىن دە اتاپ وتەدى.

توم ستەنديدجدىڭ پىكىرىنشە، 2027-جىل الەمدىك ساياسات، ەكونوميكا جانە تەحنولوگيالار ءۇشىن بەلگىسىزدىككە تولى كەزەڭ بولماق. اسىرەسە اسكەري قاقتىعىستاردىڭ سالدارى، كليماتتىڭ وزگەرۋى، مەملەكەتتىك قارىزداردىڭ ءوسۋى جانە جاساندى ينتەللەكتىنىڭ دامۋى ەلدەردىڭ الداعى شەشىمدەرىنە اسەر ەتەدى.