2027-جىلدان باستاپ جۇمىسسىز قالعاندارعا تولەم بەرۋ ءتارتىبى وزگەرەدى

استانا. قازاقپارات - 2027-جىلعى 1-قاڭتاردان باستاپ قازاقستاندا جۇمىسىنان ايىرىلعان ازاماتتارعا مەملەكەتتىك الەۋمەتتىك ساقتاندىرۋ قورىنان تولەم تاعايىنداۋ ءتارتىبى وزگەرەدى.

масылдық
Фото: freepik.com

ەڭ تومەنگى جالاقىنىڭ وسۋىنە بايلانىستى جاردەماقىنىڭ ەڭ جوعارى مولشەرى ايىنا 346,5 مىڭ تەڭگەگە دەيىن ۇلعايىپ، ونى الۋ مەرزىمى 3 ايمەن شەكتەلەدى، دەپ حابارلايدى ەڭبەك جانە حالىقتى الەۋمەتتىك قورعاۋ مينيسترلىگى.

جاڭا ءتاسىل ازاماتتىڭ تۇراقتى جۇمىسقا تەزىرەك ورنالاسۋىنا كومەكتەسۋگە باعىتتالعان. وسىعان بايلانىستى مانساپ ورتالىقتارىندا ادامنىڭ تاجىريبەسى مەن داعدىسىنا سايكەس بوس جۇمىس ورىندارىن ىرىكتەۋگە كوبىرەك ۋاقىت بولىنەدى.

2027-جىلى نە وزگەرەدى؟

الەۋمەتتىك تولەمنىڭ ەڭ ۇزاق مەرزىمى ءۇش اي بولادى.

تولەم بەلسەندى جۇمىس ىزدەۋ كەزەڭىنە تاعايىندالادى.

مينيسترلىك مالىمەتىنشە، تولەمنىڭ ەڭ جوعارى مولشەرى ايىنا 346500 تەڭگەگە دەيىن وسەدى.

ناقتى تولەم مولشەرى تابىس پەن الەۋمەتتىك ساقتاندىرۋ جۇيەسىنە قاتىسۋ وتىلىنە قاراي ەسەپتەلەدى.

مانساپ ورتالىعى تولەم الىپ جۇرگەن ازاماتقا جۇمىس ىزدەۋدى جالعاستىرادى.

ەكى مەرزىمدى اجىراتقان ءجون: جۇمىس ىزدەۋشى مارتەبەسىندە لايىقتى بوس ورىن قاراستىرۋ كەزەڭى 2026-جىلعى 1-قازاننان باستاپ 2 كۇننەن 13 كۇنگە ۇزارتىلدى. ال تولەمنىڭ ەڭ ۇزاق مەرزىمىن ءۇش ايعا دەيىن قىسقارتۋ 2027-جىلعى 1-قاڭتاردان باستالادى.

ءبىرىنشى قادام: جۇمىس ىزدەۋشى رەتىندە تىركەلۋ

جۇمىسىنان ايىرىلعان ازامات الدىمەن جۇمىس ىزدەپ جۇرگەن ادام رەتىندە تىركەلەدى. مۇنى تۇرعىلىقتى جەرى بويىنشا مانساپ ورتالىعىنا بارىپ نەمەسە eGov.kz جانە Enbek.kz ارقىلى جاساۋعا بولادى.

تىركەلگەننەن كەيىن ماماندار ازاماتتىڭ:

ماماندىعى مەن بىلىكتىلىگىن؛

ەڭبەك ءوتىلى مەن كاسىبي تاجىريبەسىن؛

مەڭگەرگەن داعدىلارىن؛

دەنساۋلىق جاعدايىن؛

قولايلى جۇمىس رەجيمىن؛

جۇمىس ورنىنا قاتىناۋ مۇمكىندىگىن زەردەلەيدى.

وسى مالىمەتتەر نەگىزىندە لايىقتى بوس جۇمىس ورىندارى ىرىكتەلىپ، جۇمىس بەرۋشىلەرمەن سۇحبات ۇيىمداستىرىلادى.

نەلىكتەن جۇمىس ىزدەۋ مەرزىمى 13 كۇنگە ۇزارتىلدى؟

بۇعان دەيىن ازامات جۇمىس ىزدەۋشى مارتەبەسىندە ەكى كۇن بولاتىن. 2026-جىلعى 1-قازاننان باستاپ بۇل كەزەڭ 13 كۇنگە دەيىن ۇزارتىلدى.

قوسىمشا ۋاقىت ىشىندە مانساپ ورتالىعى ادامنىڭ كاسىبي مۇمكىندىگىن جان-جاقتى باعالاپ، تاجىريبەسى مەن بىلىكتىلىگىنە سايكەس كەلەتىن جۇمىس ۇسىنۋعا ءتيىس.

ەگەر وسى مەرزىم ىشىندە لايىقتى جۇمىس تابىلماسا جانە تىركەلۋگە كەدەرگى كەلتىرەتىن نەگىزدەر بولماسا، ازاماتقا جۇمىسسىز مارتەبەسى بەرىلەدى.

ەكىنشى قادام: جۇمىسسىز مارتەبەسىن الۋ

جۇمىسسىز مارتەبەسى الەۋمەتتىك تولەم الۋدىڭ نەگىزگى شارتتارىنىڭ ءبىرى سانالادى. الايدا بۇل مارتەبە بەرىلگەننەن كەيىن دە مانساپ ورتالىعى بوس جۇمىس ورىندارىن ۇسىنۋدى جالعاستىرادى.

ازاماتتىڭ جاعدايىنا جانە ءتيىستى باعدارلامالاردىڭ تالاپتارىنا قاراي:

قىسقا مەرزىمدى كاسىپتىك وقۋ؛

قايتا دايارلاۋ كۋرستارى؛

سۋبسيديالاناتىن جۇمىس ورىندارى؛

قوعامدىق جۇمىستار؛

جاستار پراكتيكاسى؛

كاسىپكەرلىك باستامالاردى قولداۋ شارالارى ۇسىنىلۋى مۇمكىن.

الەۋمەتتىك تولەم جاڭا قىزمەت تاپقانعا دەيىن ۋاقىتشا قارجىلاي قولداۋعا ارنالعان.

ءۇشىنشى قادام: الەۋمەتتىك تولەمگە ءوتىنىش بەرۋ

جۇمىسسىز مارتەبەسى بەرىلگەننەن كەيىن الەۋمەتتىك تولەمدى تاعايىنداۋعا ءوتىنىش بەرۋگە بولادى. ونى مىنا جول ارقىلى راسىمدەۋگە مۇمكىندىك بار:

eGov.kz پورتالى؛

Enbek.kz ەلەكتروندىق ەڭبەك بيرجاسى؛

قىزمەت قولجەتىمدى ەكىنشى دەڭگەيدەگى بانكتەردىڭ موبيلدى قوسىمشالارى؛

SMS ارقىلى ۇسىنىلاتىن پرواكتيۆتى قىزمەت؛

مانساپ ورتالىعى؛

«ازاماتتارعا ارنالعان ۇكىمەت» مەملەكەتتىك كورپوراتسياسى.

پرواكتيۆتى قىزمەت ارقىلى تاعايىنداۋ كەزىندە جەكە ءوتىنىش بەرۋ تالاپ ەتىلمەيدى: ازامات كەلگەن حابارلاماعا جاۋاپ بەرىپ، كەلىسىمىن راستايدى.

تولەم كىمدەرگە بەرىلەدى؟

تولەمدى مىندەتتى الەۋمەتتىك ساقتاندىرۋ جۇيەسىنە قاتىسقان جانە مەملەكەتتىك الەۋمەتتىك ساقتاندىرۋ قورىنا الەۋمەتتىك اۋدارىمدارى تۇسكەن ادامدار الا الادى. جۇيەگە قاتىسۋ ءوتىلى كەمىندە التى اي بولۋى قاجەت.

جالدامالى قىزمەتكەر ءۇشىن الەۋمەتتىك اۋدارىمدى جۇمىس بەرۋشى ءوز قاراجاتى ەسەبىنەن تولەيدى. بۇل اۋدارىم قىزمەتكەردىڭ جالاقىسىنان ۇستالمايدى.

بەيرەسمي جۇمىس ىستەگەن نەمەسە ءوزى ءۇشىن الەۋمەتتىك اۋدارىم تۇسپەگەن ازاماتتىڭ تولەم الۋ قۇقىعى بولماۋى مۇمكىن.

تولەم مولشەرى قالاي ەسەپتەلەدى؟

ەسەپتەۋ نەگىزىنە سوڭعى 24 ايدا الەۋمەتتىك اۋدارىمدار جۇرگىزىلگەن ورتاشا ايلىق تابىس الىنادى. تابىستى الماستىرۋ كوەففيتسيەنتى 0,45 كە تەڭ. سونىمەن بىرگە ساقتاندىرۋ جۇيەسىنە قاتىسۋ ءوتىلىنىڭ كوەففيتسيەنتى دە قولدانىلادى.

جەكە تولەمدى ەسەپتەۋدىڭ نەگىزى: ورتاشا ايلىق تابىس ×0,45× ساقتاندىرۋ جۇيەسىنە قاتىسۋ ءوتىلىنىڭ كوەففيتسيەنتى. سوندىقتان ءار ادامنىڭ تولەمى تابىسىنىڭ ءدال 45 پايىزىنا تەڭ بولا بەرمەيدى.

2027-جىلدان باستاپ تولەمنىڭ ەڭ جوعارى مولشەرى جەتى ەڭ تومەنگى جالاقىنىڭ 45 پايىزىنان اسپاۋعا ءتيىس. مينيسترلىكتىڭ تۇسىندىرۋىنشە، ەڭ تومەنگى جالاقى 110 مىڭ تەڭگە بولعاندا بۇل شەك بىلاي ەسەپتەلەدى:

تولەمنىڭ ايلىق ەڭ جوعارى شەگى

110000×7× %45=346500 تەڭگە

346,5 مىڭ تەڭگە - بارلىعىنا تولەنەتىن تۇراقتى سوما ەمەس. ءار ازاماتقا تاعايىندالاتىن تولەم ونىڭ تابىسى مەن ساقتاندىرۋ جۇيەسىنە قاتىسۋ وتىلىنە قاراي جەكە ەسەپتەلەدى.

تولەم الىپ ءجۇرىپ جۇمىس ىزدەۋ قاجەت

الەۋمەتتىك تولەم تاعايىندالعاننان كەيىن ازامات مانساپ ورتالىعىمەن بايلانىستى جالعاستىرىپ، ۇسىنىلعان لايىقتى بوس جۇمىس ورىندارىن قاراستىرۋى كەرەك.

ەگەر ازامات ۇسىنىلعان ءۇش لايىقتى جۇمىستان دالەلدى سەبەپسىز باس تارتسا، ول جۇمىسسىزدار ەسەبىنەن شىعارىلىپ، الەۋمەتتىك تولەم توقتاتىلۋى مۇمكىن.

كاسىپتىك وقۋعا نەمەسە سۋبسيديالاناتىن جۇمىس ورنىنا جىبەرىلگەندە تولەم بارلىق جاعدايدا ساقتالا بەرمەيدى. 2027-جىلدان باستاپ ونىڭ تاعايىندالۋى مەن ساقتالۋى ناقتى شارانىڭ تۇرىنە بايلانىستى بولادى.

بۇرىن تاعايىندالعان تولەمدەر نە بولادى؟

2027-جىلعى 1-قاڭتارعا دەيىن تاعايىندالعان تولەمدەر بۇرىن بەلگىلەنگەن مەرزىم اياقتالعانشا بۇرىنعى شارتتارمەن جالعاسادى. جاڭا ءتارتىپ 2027-جىلعى 1-قاڭتاردان باستاپ تولەم تاعايىنداۋعا جۇگىنگەن ازاماتتارعا قولدانىلادى.

جۇمىس تابىلماسا، مەملەكەتتىك قولداۋ توقتاي ما؟

الەۋمەتتىك تولەم مەرزىمى اياقتالعانىمەن، مانساپ ورتالىعىنىڭ كومەگى توقتامايدى. ازاماتقا بوس جۇمىس ورىندارىن ىزدەۋ، كاسىپتىك وقىتۋ، قايتا دايارلاۋ جانە جۇمىسپەن قامتۋدىڭ باسقا دا شارالارى ۇسىنىلا بەرەدى.

مينيسترلىكتىڭ تۇسىندىرۋىنشە، وزگەرىستەردىڭ ماقساتى - ازاماتتاردىڭ ەڭبەك نارىعىنا تەزىرەك ورالۋىنا جاعداي جاساۋ. جۇمىسىنان ايىرىلۋىنا بايلانىستى تولەم مەملەكەتتىك الەۋمەتتىك ساقتاندىرۋ قورىنىڭ قاراجاتى ەسەبىنەن تولەنەدى.

ەستە ۇستايتىن نەگىزگى جايتتار

الدىمەن جۇمىس ىزدەۋشى رەتىندە تىركەلىپ، ۇسىنىلعان بوس جۇمىس ورىندارىن قاراستىرۋ قاجەت. لايىقتى جۇمىس تابىلماسا، تالاپتارعا سايكەس جۇمىسسىز مارتەبەسى بەرىلەدى. الەۋمەتتىك تولەم الۋ ءۇشىن مىندەتتى الەۋمەتتىك ساقتاندىرۋ جۇيەسىنە قاتىسۋ شارتتارى دا ورىندالۋعا ءتيىس.

2027-جىلدان باستاپ تولەمنىڭ ەڭ ۇزاق مەرزىمى - ءۇش اي. مينيسترلىك جاريالاعان ايلىق ەڭ جوعارى شەك - 346500 تەڭگە. ناقتى سوما مەن تولەم كەزەڭى ءار ادامنىڭ تابىسى جانە الەۋمەتتىك ساقتاندىرۋ جۇيەسىنە قاتىسۋ ءوتىلى بويىنشا ەسەپتەلەدى.