قازاقستان 2027-جىلعا دەيىن 84,6 ميلليارد دوللاردىڭ تاۋارىن ەكسپورتتايمىز - مينيسترلىك

ق ر ۇلتتىق ەكونوميكا ءمينيسترى الىبەك قۋانتىروۆ ۇكىمەت وتىرىسىندا وسىنداي بولجام ايتتى، دەپ حابارلايدى قازاقپارات ءتىلشىسى.

«بيۋدجەتتىك جوسپارلاۋ ءۇشىن نەگىز رەتىندە بازالىق سسەناريدى پايدالانۋ ۇسىنىلادى. وسى سسەناريگە سايكەس جالپى ىشكى ءونىمنىڭ ناقتى ءوسۋى 2023 –جىلعى % 4,0- دان 2027 –جىلى % 4,2 - عا دەيىن جەدەلدەيدى.

نومينالدى جالپى ىشكى ءونىم 120,7 تريلليون تەڭگەدەن 176,6 تريلليون تەڭگەگە دەيىن وسەدى.

ەكونوميكانىڭ بارلىق بازالىق سالالارىندا وڭ ءوسۋ كۇتىلۋدە.

ماسەلەن، ونەركاسىپتە ورتاشا جىلدىق ءوسۋ قارقىنى % 3,1 - دى، ونىڭ ىشىندە وڭدەۋ ونەركاسىبىندە - % 3,5- دى، تاۋ- كەن ءوندىرۋ ونەركاسىبىندە - % 2,9- دى قۇرايدى. اۋىل شارۋاشىلىعىنىڭ جالپى ءونىمى كولەمىنىڭ ورتاشا جىلدىق ءوسۋى % 3,9- دى قۇرايدى»، - دەدى ۆەدومستۆو باسشىسى.

مينيسترلىكتىڭ بولجامىنا سۇيەنسەك، قۇرىلىس سالاسىنىڭ بولجامدى ءوسۋى ورتا ەسەپپەن % 3,8- دى، ساۋدا - % 5,7- دى قۇراۋعا ءتيىس.

«مۇناي ءوندىرۋ 2023 -جىلى 92,6 ميلليون توننانى قۇراپ، 2027 -جىلى 99,9 ميلليون تونناعا دەيىن ۇلعايادى.

ۇلتتىق بانكتىڭ بولجامى بويىنشا ەكسپورت 80,9 ميلليارد دوللارىنان 84,6 ميلليارد دوللارىنا دەيىن، يمپورت 45,7 ميلليارد دوللارىنان 53,5 ميلليارد دوللارىنا دەيىن وسەدى»، - دەدى مينيستر.

اۆتور

ەسىمجان ناقتىباي