2026-جىلى الەم حالقى 690 ميلليون مارتە ساياحاتقا شىققان
استانا. قازاقپارات - 2026-جىلدىڭ ءبىرىنشى جارتىسىندا الەم بويىنشا تۋريستىك ساياحاتتار سانى 0,4 پايىزعا ءوسىپ، شامامەن 690 ميلليون ساپارعا جەتتى.
گەوساياسي تۇراقسىزدىققا، مۇناي باعاسىنىڭ جوعارى بولۋىنا جانە ينفلياتسيا قىسىمىنا قاراماستان، حالىقارالىق ساپارلار سانى وتكەن جىلدىڭ سايكەس كەزەڭىمەن سالىستىرعاندا شامامەن 3 ميلليونعا وسكەن.
ب ۇ ۇ دۇنيەجۇزىلىك تۋريزم ۇيىمىنىڭ (UN Tourism) سوڭعى الەمدىك تۋريزم بارومەترىنە سايكەس، جىلدىڭ ءبىرىنشى جارتىسىندا ەڭ جوعارى ءوسۋ قارقىنى افريكاعا تيەسىلى - 4 پايىز، ەۋروپا ەلدەرى 3 پايىزعا كوپ ساياحاتتاعان. امەريكادا حالىقارالىق ساپارلار 2 پايىزعا، ال ازيا جانە تىنىق مۇحيتى ايماعىندا 1 پايىزعا ءوستى. ال، تاياۋ شىعىستا بۇل كورسەتكىش ايماقتاعى قاقتىعىس سالدارىنان 22 پايىزعا تومەندەدى.
UN Tourism قاقتىعىس سالدارىنان تۋىنداعان اۋە قاتىناسىنداعى ۇزىلىستەر بىرتىندەپ ازايىپ كەلە جاتقانىن اتاپ وتەدى. جاعداي اسىرەسە تاياۋ شىعىستا مامىر مەن ماۋسىم ايىنىڭ باسىندا ايتارلىقتاي جاقسارعان، اتىستىڭ توقتاۋى ءبىرقاتار اۋە باعدارىنىڭ قايتا جاندانۋىنا مۇمكىندىك بەردى. دەگەنمەن، تۇتىنۋشى كوڭىل كۇيىنىڭ قالپىنا كەلۋى بارلىق ەلدە بىركەلكى ەمەس.
تۋريزم ساراپشىلارى جۇرگىزگەن سوڭعى ساۋالناماعا سايكەس، 2026-جىلى حالىقارالىق تۋريزمنىڭ وسۋىنە كەدەرگى كەلتىرەتىن نەگىزگى فاكتورلار - مۇناي باعاسىنىڭ قۇبىلمالى بولۋى، ينفلياتسيا سياقتى ەكونوميكالىق العىشارتتار جانە كولىك، تۇرۋ شىعىندارىنىڭ جوعارى ەكەندىگى انىقتالعان.
دەگەنمەن، ساراپشىلار قىركۇيەكتەن جەلتوقسانعا دەيىنگى كەزەڭدە ازداپ ءوسىم بايقالاتىنىن بولجاپ وتىر. ساۋالناماعا قاتىسقانداردىڭ شامامەن 45 پايىزى حالىقارالىق تۋريزم كورسەتكىشتەرى 2025-جىلدىڭ سوڭعى 4 ايىمەن جاقسارادى دەپ كۇتەدى، ونىڭ ىشىندە 4 پايىزى ءتىپتى ايتارلىقتاي جاقساراتىنىنا سەنىم بىلدىرگەن. تاعى 34 پايىزى كورسەتكىشتەردىڭ وزگەرىسسىز قالاتىنىن بولجاسا، 21 پايىزى ناشارلايدى دەگەن ويدا.
سوڭعى دەرەكتەردى جانە ءالى كۇنگە جالعاسىپ وتىرعان گەوساياسي تۇراقسىزدىقتى ەسكەرە وتىرىپ، 2026-جىلعا ارنالعان حالىقارالىق تۋريستىك ساپارلاردىڭ وسۋىنە قايتا بولجام جاسادى. قاڭتار ايىنداعى ەسەپتە 4 پايىز ءوسىم بولادى دەپ بولجاعان ۇيىم ەندىگى تاڭدا 1-2 پايىز وسىمنەن ءۇمىت ەتەدى.
UN Tourism ناقتى جاعداي تاياۋ شىعىستاعى قاقتىعىستىڭ ۇزاقتىعىنا، ونىڭ مۇناي باعاسى مەن جالپى ينفلياتسياعا اسەرىنە تاۋەلدى ەكەنىن ەسكەرتەدى.
ەسكە سالا كەتەيىك، Air Astana دۋبايعا رەيستەردى قايتا باستاۋدى جوسپارلاپ وتىر.
