تۇران جولبارىسى قازاقستانعا 2025-جىلى ورالادى - ەكولوگيا مينيسترلىگى
«بۇگىنگى 29- شىلدە - حالىقارالىق جولبارىستار كۇنىنە وراي، ارىپتەستەردەن وسى تاقىرىپقا قاتىستى ءتۇرلى سۇراقتار كەلىپ تۇسۋدە. وسىعان وراي، بۇگىنگى پوست ارقىلى جاۋاپ بەرۋگە تىرىستىق. ⅩⅩ عاسىردىڭ باسىندا جەر بەتىندە جولبارىستىڭ 9 ءتۇرى مەكەندەگەن، سانى 100 مىڭنان اسسا، XXI عاسىردىڭ باسىندا شامامەن 3,5 مىڭى قالعان. تۇران جولبارىستارىنىڭ سوڭعى وكىلدەرى 1970-جىلدارى جوعالىپ كەتكەن. قازىرگى تاڭدا ەكولوگيا، گەولوگيا جانە تابيعي رەسۋرستارى مينيسترلىگى بالقاش ماڭىندا جولبارىس پوپۋلياتسياسىن قالپىنا كەلتىرۋدىڭ 15 جىلعا ارنالعان باعدارلاماسىن جاسادى. ول اڭنىڭ مەكەن ەتۋ ورتاسىن دايىنداۋ، جولبارىستى تابيعاتقا جىبەرۋ جانە باعدارلامانىڭ جۇزەگە اسۋىن باقىلاۋ شارالارىن قامتيدى»، - دەپ جازدى مينيسترلىك وكىلى.
ايتۋىنشا، 2018-جىلى «ىلە-بالقاش» رەزەرۆاتى قۇرىلىپ، وندا بيوتەحەنيكالىق شارالار ارقىلى قابان، قۇلان، قاراقۇيرىقتاردى كوبەيتۋ، بۇقار بۇعىلارىنىڭ پوپۋلياتسياسىن قالپىنا كەلتىرۋ جۇمىستارى ءجۇرىپ جاتىر.
«وسى اتالعان شارالار ورىندالعاننان كەيىن ەكوجۇيە جولبارىس پوپۋلياتسياسىن ۇستاپ تۇرۋعا قابىلەتتى بولماق. ايتا كەتەيىك، 2010-جىلى قازاقستان حالىقارالىق جولبارىس سامميتىندە ورتالىق ازياعا تۇران جولبارىستارىن قايتارۋعا دايىن ەكەنىن مالىمدەگەن. ال 2017-جىلى قازاقستان مەن بۇكىلالەمدىك جابايى تابيعات قورى (WWF) وڭتۇستىك بالقاش ماڭى مەن ىلەنىڭ دەلتا اۋدانىندا جولبارىستىڭ رەينسترودۋكتسياسى باعدارلاماسىن جۇزەگە اسىرۋ تۋرالى مەموراندۋمعا قول قويىلدى. ەلىمىزگە العاشقى جولبارىستار 2025-جىلى اكەلىنبەك»، - دەيدى ولجاس بەركىنبايەۆ.
بۇعان دەيىن ق ر ەكولوگيا، گەولوگيا جانە تابيعي رەسۋرستار مينيسترلىگى بىرىككەن ۇلتتار ۇيىمىنىڭ دامۋ باعدارلاماسىمەن بىرلەسىپ ىلە-بالقاش ەكوجۇيەلەرىن قالپىنا كەلتىرۋگە ارنالعان جوبانى ىسكە قوسقانىن حابارلاعان ەدىك.
