سۇڭقار اتتى قازاقستان- رەسەي زىمىرانى كوممەرتسيالىق پايدالانۋعا 2025 - جىلى بەرىلەدى

بۇل تۋرالى ر ي ا نوۆوستي اگەنتتىگى «يزۆەستيا» باسىلىمىنا سىلتەمە جاساپ حابارلاۋدا.
«روس كوسموس» مەملەكەتتىك كورپوراتسياسى ۇسىنعان جوبا سيپاتتاماسىندا اتاپ كورسەتىلگەنىندەي، عارىش كەمەسىن سىناۋ 2024 -جىلى باستالماق. ال 2025 -جىلى «سۇڭقار» كوممەرتسيالىق پايدالانۋعا بەرىلەدى. وسىدان سوڭ، «روس كوموس» گەپتيلمەن ۇشىرىلاتىن پروتون- م راكەتالارىن قولدانۋدى دوعارادى.
قازاقستاندىق سەرىكتەستەر كورپوراتسيانىڭ ۇسىنىسىنا كەلىسىمىن بەرىپ وتىر، دەپ حابارلادى باسىلىمعا «قازعارىش» اگەنتتىگىنە جاقىن دەرەككوزدەردىڭ ءبىرى. دەگەنمەن جاڭا راكەتانىڭ ۇشىرىلۋىنا قاجەتتى جاڭا ينفراقۇرىلىمنىڭ قۇرىلىسىنا قاتىستى ساۋالدار ءالى دە وزەكتى.
«قاراجات جاعى نەگىزىنەن قازاقستان تاراپىنان بولعاندىقتان، بۇل ماسەلەنىڭ قارجىلىق جاعى تالقىلانۋدا. ەسەپتەۋ جۇمىستارى جۇرگىزىلۋدە. ءبىراق يدەيا دەڭگەيىندە بۇل بىزگە ۇنايدى»، - دەپ كەلتىرەدى دەرەككوزدىڭ ءسوزىن باسىلىم.
قازاقستان مەن رەسەي ەكولوگيالىق تازا «بايتەرەك» زىمىران- تاسىعىشىن ۇشىرۋ بويىنشا جۇمىستاردى اتقارىپ كەلەدى. بۇرىن حابارلانعانىنداي، «روس كوسموس» «بايتەرەك» كەشەنىنىڭ جاڭا فورماتتاعى ارىپتەستىگىن دامىتۋدى ۇسىندى. رەسەي تاراپى قازاقستان ءۇشىن «زەنيت» زىمىرانىنىڭ بارلىق جاقسى قىرلارىن الاتىن جاڭا ەكولوگيالىق تازا زىمىران قۇراستىرىپ بەرەدى. ال قازاقستان جاعى زىمىران ۇشىرىلاتىن ينفراقۇرىلىمىن دايىنداۋى ءتيىس.
باسىلىم مالىمەتتەرى بويىنشا، راكەتانىڭ قۇرىلىسىنا قاجەتتى قارجى 2016-2025 -جىلدارعا ارنالعان فەدەرالدىق عارىش باعدارلاماسى اياسىندا بولىنەدى.
راكەتانىڭ قۇرىلىسىن سامارالىق «پروگرەسس» عارىش ورتالىعى جۇرگىزەدى. وعان حرۋنيچيەۆ ورتالىعى مەن ماكەيەۆ اتىنداعى زىمىران ورتالىعى قولداۋ كورسەتپەك.
اۆتور: جاسۇلان جولدىبايەۆ