2025 -جىلى ەڭ تومەنگى جالاقى وسە مە - مينيستر جاۋابى
استانا. KAZINFORM - ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا ەلىمىزدەگى ەڭ تومەنگى جالاقىنىڭ وسۋىنە قاتىستى تۇسىنىك بەردى.
«بۇگىندە ەلىمىزدە ەڭ تومەنگى جالاقى 85000 تەڭگە. كەلەر جىلى وسى 85 مىڭ تەڭگە كولەمىندە قالادى. ءبىز ەڭ تومەنگى جالاقىنى تاعايىنداۋ ادىستەمەسىن ازىرلەدىك. ول بويىنشا جاڭا ەڭبەك ءونىمى مەن مەدياندىق جالاقىنى بىرىكتىردىك. مەدياندىق ەڭبەكاقى مەن ەڭ تومەنگى جالاقى كورسەتكىشتەرىن سالىستىرساق %34 ايىرماشىلىق بار. ءبىز ەندى ءار جۇمىسشىنىڭ ەڭبەك تاۋەكەلدەرى كارتاسىن جاساپ، جۇمىس بەرۋشىلەرمەن بىرلەسىپ قاراستىرامىز. ارينە، جۇمىس بەرۋشى مەن جۇمىسشى اراسىندا كەلىسىمشارت جاسالادى، ول ەڭبەك كودەكسىنە نەگىزدەلەدى. ءبىراق، بيزنەس سالاسىنداعى كەيبىر جۇمىسشىلاردىڭ مەدياندىق ەڭبەكاقى مەن ەڭ تومەنگى جالاقى كورسەتكىشتەرى %9 عا جەتپەيدى»، - دەدى سۆەتلانا جاقىپوۆا ۇكىمەت وتىرىسىنان كەيىن وتكەن باسپا ءسوز ءماسليحاتىندا.
وسىلايشا مينيستر مەدياندىق جانە ەڭ تومەنگى جالاقى اراسىنداعى ايىرماشىلىقتى %9 دان %34 عا ارتتىرۋ جوسپارى بارىن ايتتى.
ۆەدومستۆو باسشىسىنىڭ ايتۋىنشا، اتالعان قادام قازاقستاندىقتاردىڭ ەڭ تومەنگى جالاقى مولشەرىن وسىرۋگە ىقپال ەتەدى.
ەسكە سالا كەتسەك، جىل باسىندا قازاقستاندا ەڭ تومەنگى جالاقىنى ەسەپتەۋ ادىستەمەسى وزگەرۋى مۇمكىن ەكەنى ايتىلعان.
