قازاقستان 2025-جىلعا قاراي ەكسپورت كولەمىن 50 ميلليارد دوللاردان اسىرادى
بۇل تۋرالى بۇگىن ۇكىمەت وتىرىسىندا ق ر ۇلتتىق بانك ءتوراعاسى ەربولات دوسايەۆ ايتتى، دەپ حابارلايدى قازاقپارات ءتىلشىسى.
«وسى جىلعى 1-جارتىجىلدىقتا تولەم بالانسىنىڭ اعىمداعى شوتىنىڭ پروفيتسيتى تىكەلەي ينۆەستورلارعا تولەنەتىن كىرىستەردىڭ تومەندەۋى 3,5 ەسەگە جانە جىل باسىنداعى مۇنايدىڭ سالىستىرمالى تۇردە جوعارى باعاسى مەن جەتكىزىلىمدەرى ەسەبىنەن تىركەلدى. 2020-جىلدىڭ قورىتىندىسى بويىنشا كوروناۆيرۋس ىندەتى سالدارىنان تولەمگە قابىلەتتى سۇرانىستىڭ تومەندەۋى جانە ينۆەستيتسيالىق جوبالاردى ىسكە اسىرۋ قارقىنىنىڭ باياۋلاۋى اياسىندا 2020-جىلى تاۋارلار يمپورتىنىڭ 13,1 پايىزعا قىسقارۋ بولجامىنا قاراماستان تولەم بالانسىنىڭ اعىمداعى شوتىنىڭ تاپشىلىعى كۇتىلەدى»، - دەدى ول.
ونىڭ ايتۋىنشا، اعىمداعى شوتتىڭ تاپشىلىعى 2020-جىلى وتكەن جىلمەن سالىستىرعاندا مۇناي باعاسىنىڭ جالپى تومەندەۋىنە جانە مۇناي ءوندىرۋدى قىسقارتۋ بويىنشا OPEC+ مامىلەسىنىڭ تالاپتارىن ساقتاۋعا، سونداي-اق 2020-جىلعى ەكىنشى جارتىجىلدىقتا تىكەلەي ينۆەستورلارعا تولەنەتىن كىرىستەردى بىرتىندەپ قالپىنا كەلتىرۋگە بايلانىستى تاۋارلار ەكسپورتىنىڭ قىسقارۋى اياسىندا قالىپتاسادى.
«بۇدان كەيىنگى يمپورتتىڭ بولجامدى سەرپىنى يمپورتتى الماستىرۋدىڭ بەلسەندى ساياساتىن ىسكە اسىرۋمەن نەگىزدەلگەن. بۇل رەتتە، 2021-جىلى كەيىنگە قالدىرىلعان سۇرانىس پەن 2020-جىلى توقتاتىپ قويعاننان كەيىن ينۆەستيتسيالىق جوبالاردى ىسكە اسىرۋدى جىلدامداتۋ سالدارىنان يمپورتتى قالپىنا كەلتىرۋ جانە ونىڭ 8,1 پايىزعا ءوسۋى كۇتىلەدى. تاۋارلار ەكسپورتىنىڭ بولجامى شيكىزاتتىق ەمەس تاۋارلار ەكسپورتىنىڭ ۇلعايۋىنا ىقپال ەتۋى ىقتيمال. بۇل 2025-جىلعا قاراي ەكسپورتتىڭ 50 ميلليارد ا ق ش دوللارىنان جوعارى دەڭگەيگە دەيىن كەزەڭ-كەزەڭىمەن وسۋىنە الىپ كەلەدى. ۇلتتىق بانك ۇكىمەتتىڭ وڭدەۋشى ونەركاسىپ ەكسپورتىن 2025-جىلعا قاراي 42 پايىزعا ۇلعايتۋ جونىندەگى جوسپارلارىن قولدايدى»، - دەدى ەربولات دوسايەۆ.
