2025-2026 وقۋ جىلىنا ارنالعان وقۋلىقتار ساراپتامادان ءوتتى
استانا. KAZINFORM - ساراپتامادا 278 وقۋلىق پەن وقۋ- ادىستەمەلىك قۇرال قارالدى، ونىڭ 266 سى ماقۇلدانىپ، پايدالانۋعا ۇسىنىلدى، دەپ حابارلايدى وقۋ-اعارتۋ مينيسترلىگى.
ق ر وقۋ- اعارتۋ مينيسترلىگىنىڭ رەسپۋبليكالىق عىلىمي- پراكتيكالىق ءبىلىم مازمۇنىن ساراپتاۋ ورتالىعى كەلەسى وقۋ جىلىندا قولدانىلاتىن وقۋلىقتار مەن وقۋ- ادىستەمەلىك كەشەندەردى ساراپتامادان وتكىزدى. ساراپتامادا 278 وقۋلىق پەن وقۋ- ادىستەمەلىك قۇرال قارالدى، ونىڭ 266 سى ماقۇلدانىپ، پايدالانۋعا ۇسىنىلدى.
سونداي-اق، ەرەكشە ءبىلىم بەرۋ قاجەتتىلىكتەرى بار بالالارعا ارنالعان برايل شريفتىمەن جانە جازۋى ۇلكەيتىلگەن وقۋلىقتار ازىرلەندى. 4-سىنىپتار ءۇشىن سيفرلىق ساۋاتتىلىق، ورىس ءتىلى جانە شەت تىلدەرى (اعىلشىن، نەمىس، فرانسۋز)، بەينەلەۋ ونەرى، ەڭبەككە باۋلۋ، جاراتىلىستانۋ پاندەرى بويىنشا وقۋلىقتار جانە ۇيعىر، وزبەك تىلدەرىندە وقىتاتىن مەكتەپتەرگە ارنالعان وقۋ قۇرالدارى بەكىتىلدى.
— پاندىك ساراپتاما كوميسسياسىندا تاجىريبەلى پەداگوگتەر مەن عالىمدار جۇمىس ىستەدى. وقۋ ادەبيەتتەرىن باعالاۋ ءار باسىلىمدى سىناقتان وتكىزۋ مەن تالداۋ ناتيجەلەرىنە نەگىزدەلىپ، عىلىمي- پەداگوگيكالىق تالاپتارعا سايكەس جۇرگىزىلدى. بەكىتىلگەن وقۋلىقتار مەن وقۋ- ادىستەمەلىك كەشەندەر ءبىلىم بەرۋدىڭ زاماناۋي تالاپتارىنا تولىق سايكەس كەلىپ، وقۋشىلاردىڭ تابىستى وقۋىنا جانە بولاشاقتا قاجەتتى ماڭىزدى داعدىلار مەن بىلىمدەردى دامىتۋعا باعىتتالعان، - دەپ اتاپ ءوتتى مينيسترلىكتىڭ رەسپۋبليكالىق عىلىمي- پراكتيكالىق ءبىلىم مازمۇنىن ساراپتاۋ ورتالىعىنىڭ ديرەكتورى نازيرا ءابدىراحمانوۆا.
سونداي- اق، ايتا كەتۋ كەرەك، مەكتەپكە دەيىنگى ءبىلىم بەرۋ ۇيىمدارىنا ارنالعان وقۋ-ادىستەمەلىك قۇرالدار العاش رەت كەشەندى ساراپتامادان ءوتتى. وقۋ-ادىستەمەلىك كەشەنگە ادىستەمەلىك نۇسقاۋلىق، جۇمىس داپتەرى، وقۋلىق، ۇلەستىرمە جانە دەمونستراتسيالىق ماتەريالدار مەن البومدار كىرەدى.
