ەلىمىزدە مۇناي ءوندىرىسى 2025 - جىلعا قاراي 104 ميلليون تونناعا جەتەدى

استانا. قازاقپارات - 2040 - جىلعا دەيىن قازاقستانداعى مۇناي مەن كوندەنسات نەگىزىنەن تەڭىز، قاراشىعاناق جانە قاشاعان كەن ورىندارىنان وندىرىلەدى. باسقا كەن ورىندارىنداعى جوبالار كەزەڭ- كەزەڭىمەن جۇزەگە اسىرىلماق.

ال سوڭعى 20 جىلدا مۇناي- گاز سالاسىندا ءىرى جاڭا كەن ورىندارى اشىلماعان. بۇل تۋرالى سىرتقى ىستەر مينيسترلىگىندە وتكەن باسپا ءسوز ءماسليحاتىندا ايتىلدى. ەلىمىزدىڭ ينۆەستيتسيالىق مۇمكىندىكتەرى تالقىلانعان جيىنعا 60 تان استام شەتەلدىك ۇيىمنىڭ وكىلدەرى قاتىستى.

 مامانداردىڭ ايتۋىنشا، وسى ءۇش كەن ورنىندا ءوندىرىس كولەمى ارتادى. ياعني كەنىشتەردىڭ اۋقىمى كەڭەيە تۇسەدى. ماسەلەن، قاشاعاندا 2024 -جىلعا قاراي جىلىنا 13 ميلليون توننادان 16 ميلليون تونناعا دەيىن مۇناي وندىرىلەدى. ال تەڭىزدە 2022 -جىلدان كەيىن مۇناي ءوندىرۋ جىلىنا 39 ميلليون تونناعا دەيىن وسەدى دەگەن جوسپار بار. قاراشىعاناق كەن ورنى وسى دەڭگەيىن ساقتاۋدى كوزدەيدى. دەسە دە، جاڭعىرتۋدان ءوتىپ، تاعى ءبىر كومپرەسسور مەن قۇبىردىڭ قۇرىلىسىن باستاۋ جوسپارلانعان. ناتيجەسىندە ەلىمىزدە مۇناي ءوندىرىسى 2025 -جىلعا قاراي 104 ميلليون تونناعا جەتەدى. ال بيىل شيكىزاتتى وڭدەۋ كولەمى ءبىر ميلليون تونناعا ارتادى.

www.24.kz