رەسپۋبليكالىق جولدار 2025 -جىلعا دەيىن 100 پايىز نورماتيۆتىك قالىپقا كەلتىرىلەدى

بۇل تۋرالى ق ر ۇكىمەتىنىڭ كەڭەيتىلگەن وتىرىسىندا پرەمەر-مينيستر ءاليحان سمايىلوۆ ايتتى، دەپ حابارلايدى قازاقپارات ءتىلشىسى.

«اۆتوجول سالاسىندا بارلىق حالىقارالىق ترانزيتتىك دالىزدەردى تولىق جاڭعىرتۋ جوسپارلانۋدا. 2025 -جىلعا دەيىن رەسپۋبليكالىق جولداردىڭ – 100، ال جەرگىلىكتى جولداردىڭ 95 پايىزىن ءنورماتيۆتى قالىپقا كەلتىرۋ جوسپارلانعان. سونىمەن بىرگە، 52 اۆتوكولىك وتكىزۋ پۋنكتىن مودەرنيزاتسيالاۋ جۇرگىزىلۋدە»، - دەدى ءاليحان سمايىلوۆ.

ۇكىمەت باسشىسىنىڭ اتاپ وتۋىنشە، «دوستىق- مويىنتى» تەمىرجول ۋچاسكەسىنىڭ 2-جولدارىنىڭ قۇرىلىسى باستالدى. «داربازا- ماقتاارال»، «باقتى- اياگوز» جانە «الماتى ستانسياسى اينالما تەمىرجول جەلىسى» جوبالارى بويىنشا ءتيىستى قۇجاتتامالارى دايىندالۋدا.

«قازاقستان تەمىر جولىن كولىك- لوگيستيكالىق كومپانياعا اينالدىرۋ باستالدى. كەرەكتى قۇزىرەتتىلىك ورتالىعى قۇرىلدى. ونىڭ نەگىزگى مىندەتى - جاڭا لوگيستيكالىق ونىمدەردى ۇيىمداستىرۋ جانە ترانزيتتىك جۇك اعىندارىن ترانسقازاقستاندىق مارشرۋتتارعا باعدارلاۋ بولىپ تابىلادى»، - دەدى پرەمەر- مينيستر.

ونىڭ ايتۋىنشا، ترانسكاسپيي حالىقارالىق مارشرۋتتاردى دامىتۋ ماقساتىندا قازاقستان، ازەربايجان، گرۋزيا جانە تۇركيانىڭ كولىك جانە ينفراقۇرىلىم مينيسترلىكتەرىنىڭ اراسىندا ءتيىستى جول كارتالارى قابىلداندى.

«قازاقستان تاراپىنان «كونتەينەرلىك حاب» سالۋدى، ساۋدا فلوتىن 10 پاروممەن تولىقتىرۋدى جانە پورتتىق ستانتسيالاردى كەڭەيتۋدى قوسا العاندا، اقتاۋ جانە قۇرىق پورتتارىنىڭ قۋاتتارىن كوتەرۋ جوسپارلانۋدا. سينگاپۋرلىق PSA كومپانياسىمەن بىرلەسىپ تسيفرلىق كولىك ءدالىزىن قۇرۋ جونىندەگى جوبا ىسكە اسىرىلۋدا»، - دەدى ول.

سونىمەن قاتار، سمايىلوۆ ءىرى مۇناي-گاز جوبالارىن دامىتۋدىڭ كەشەندى جوسپارى ازىرلەنەدى.

2023 -جىلى بۋتاديەن جانە مەتانول وندىرەتىن زاۋىتتاردىڭ قۇرىلىسى باستالادى. بۇل تۋرالى ق ر ۇكىمەتىنىڭ كەڭەيتىلگەن وتىرىسىندا پرەمەر-مينيستر ءاليحان سمايىلوۆ ايتتى.

«مۇناي-گاز ءوندىرۋ سالاسىندا تەڭىزدە 2023 -جىلى ساعالىق قىسىمدى باسقارۋ جوباسى اياقتالادى. قاشاعان كەن ورنىندا قۋاتى 1,1 ميلليارد تەكشە مەتر گاز وڭدەۋ زاۋىتىنىڭ قۇرىلىس جۇمىستارى باستالدى. وسىعان قوسا، وڭدەۋ كولەمى 8 ميلليارد تەكشە مەترگە دەيىن گاز وڭدەۋ زاۋىتتارىن ىسكە اسىرۋ جونىندەگى تۇجىرىمداما كەلىسىلۋدە. باتىس قازاقستان وبلىسىنىڭ گاز وندەۋ زاۋىتىندا قوسىمشا 3 ميلليارد تەكشە مەتر قاراشىعاناق گازىن وڭدەۋ بويىنشا ءتيىستى جوبا پىسىقتالۋدا. سونىمەن بىرگە، شەتەلدىك ينۆەستورلارمەن بىرلەسىپ، ءىرى مۇناي- گاز جوبالارىن دامىتۋدىڭ كەشەندى جوسپارى ازىرلەنەتىن بولادى»، - دەدى ۇكىمەت باسشىسى.

ونىڭ اتاپ وتۋىنشە، وسى سالاداعى كۇردەلى جوبالار ءۇشىن جەتىلدىرىلگەن مودەلدىك كەلىسىمشارتتار زاڭناماعا ەنگىزىلدى. بۇل 2023 -جىلى قالامقاس- حازار جانە قاراتون كەن ورىندارى بويىنشا 9 ميلليارد دوللاردى قۇرايتىن ينۆەستيتسيالىق جوبالاردى باستاۋعا مۇمكىندىك بەرەدى.

«الداعى جىلى كاسپي قۇبىر كونسورتسيۋمىنىڭ قازاقستاندىق ۋچاسكەسىندەگى تار جەرلەرىن جويۋ جوباسى اياقتالادى. بۇل قۇبىردىڭ وتكىزۋ قابىلەتىن جىلىنا 72,5 ميلليون تونناعا دەيىن ارتتىرۋعا مۇمكىندىك بەرەدى. الەمدىك وندىرۋشىلەردىڭ توپ-10 قۇرامىنا كىرەتىن قۋاتى 500 مىڭ توننا پوليپروپيلەن وندىرەتىن ءىرى مۇناي-حيميا زاۋىتى ىسكە قوسىلدى. قۋاتى 1,2 ميلليون توننا پوليەتيلەن ءوندىرۋ جوباسى بويىنشا بازالىق جوبالاۋ باستالدى»، - دەدى ول.

پرەمەر-مينيستر كەلەسى جىلى جالپى ينۆەستيتسيا سوماسى 1 ميلليارد دوللاردى قۇرايتىن بۋتاديەن جانە مەتانول وندىرەتىن زاۋىتتاردىڭ قۇرىلىسى باستالۋى كەرەكتىگىن ايتتى.

«مۇناي جانە مۇناي ونىمدەرىن جەتكىزۋ جۇيەسىندەگى ءتيىمسىز دەلدالداردى الىپ تاستاۋ بويىنشا ءتيىستى شەشىمدەر قابىلداندى. 2023 -جىلى شىمكەنت مۇناي وڭدەۋ زاۋىتىن 9 ميلليون تونناعا دەيىن كەڭەيتۋدى بازالىق جوبالاۋ باستالادى. بيتۋم ءوندىرىسى 300 مىڭ تونناعا ارتتىرىلاتىن بولادى» ، - دەدى ءاليحان سمايىلوۆ.