پاريج 2024 -جىلى وتەتىن جازعى وليمپياداعا قالاي دايىندالىپ جاتىر
رەسمي قۇجاتتى حالىقارالىق وليمپيادا كوميتەتى قازاقستان رەسپۋبليكاسىنىڭ ۇلتتىق وليمپيادا كوميتەتىنىڭ اتىنا جىبەرگەن. 2024 -جىلعى وليمپيادا ويىندارىنا دايىندىق قالاي ءجۇرىپ جاتىر، قانداي نەگىزگى سالتاناتتى ءىس-شارالار ۇيىمداستىرىلاتىنى جايلى قازاقپارات ماتەريالىنان وقىڭىزدار.
2017 -جىلدىڭ قىركۇيەگىندە پەرۋدە وتكەن حالىقارالىق وليمپيادا كوميتەتىنىڭ 131-سەسسياسىندا 33-ويىن قوجايىنى تاڭداۋى پاريجگە ءتۇستى. باستاپقىدا 2024 -جىلعى ويىنداردى وتكىزۋگە بۋداپەشت (ۆەنگريا)، گامبۋرگ (گەرمانيا)، لوس- اندجەلەس (ا ق ش)، پاريج (فرانسيا)، ريم (يتاليا) ۇمىتكەر بولعان ەدى.
فرانسۋز باسپا ءسوزىنىڭ مالىمەتىنشە، قازىرگى ۋاقىتتا پاريج وليمپياداسىنىڭ قۇنى 8,8 ميلليارد ەۋرونى قۇرايدى. ال 2017 -جىلى فرانسياداعى ويىنداردىڭ بيۋدجەتى 6,6 ميلليارد ەۋروعا باعالانعان-دى. ساراپشىلاردىڭ اتاپ وتۋىنشە، وليمپيادانىڭ «قىمباتتاۋى» بۇكىل ەۋروپاداعى ينفلياتسيانىڭ ءوسۋ ۇردىسىمەن بايلانىستى. بۇعان قوسا، فرانسيا بۇقارالىق اقپارات قۇرالدارى بۇل بيۋدجەت جارىسقا قاتىسۋشىلاردىڭ قاۋىپسىزدىگىن قامتاماسىز ەتۋ قاجەتتىلىگىنە بايلانىستى تۋىنداۋى مۇمكىن قوسىمشا شىعىنداردى فرانسۋز بيلىگىنىڭ ءالى ەسكەرمەگەنىن جازۋدا.
فرانسيا اۋماعىندا وليمپيادانىڭ اشىلۋىنا ارنالعان نەگىزگى ءىس- شارالار 2024 -جىلدىڭ 8-مامىرىندا باستالادى. سول كۇنى وليمپيادا الاۋى گرەتسيادان مارسەلگە رەسمي تۇردە جەتكىزىلەدى. بۇل رەتتە وليمپيادادا رەسمي تۇردە جاناتىن وليمپيادا الاۋى فرانسيانىڭ وڭتۇستىگىنە تەڭىز ارقىلى فرانسۋزدىق تاريحي «بەلەنا» كەمەسىمەن جونەلتىلەدى.
اتالعان ءۇش دىڭگەكتى كەمە العاش رەت 1896 -جىلى سۋعا تۇسىرىلگەن بولاتىن. ول تاريحتا بىرنەشە ءىرى وقيعانى باستان كەشىرىپ، فرانسيانىڭ تاريحي رامىزدەرىنىڭ بىرىنە اينالدى.
مارسەل - فرانسياداعى وليمپيادا الاۋى ەستافەتاسىنىڭ باستاپقى نۇكتەسى
ۇيىمداستىرۋشىلار مارسەلدى فرانسياداعى وليمپيادا الاۋى ەستافەتاسىنىڭ باستاۋى رەتىندە توسىننان تاڭداپ العان جوق. بۇگىندە بۇل قالا تۇرعىندارى سانى جاعىنان ەلدەگى ەكىنشى قالا سالادى. 2020 -جىلدىڭ 1-قاڭتارىنداعى دەرەككە سايكەس، وندا 870 مىڭ ادام تۇرادى.
فرانسيانىڭ وڭتۇستىك مەگاپوليسى ءارى ءىرى پورتى سان عاسىرلىق سپورتتىق مادەنيەتىمەن دە داڭقى شىققان. سوندىقتان دا الداعى ويىنداردا مارسەل ماڭىزدى رولگە يە. ەكى سپورتتىق الاڭدا - مارسەل ستاديونى مەن مارسەل ايلاعىندا فۋتبول مەن جەلكەندى سپورتتان وليمپيادالىق جارىستار وتەدى.
مارسەل مەرى بەنۋا پايان وليمپيادا-2024 الاۋىنىڭ ەسكى پورتا قارسى الىناتىندىعىن جانە سول جەردە اتالعان وقيعاعا بايلانىستى ۇلكەن فەستيۆالدىڭ ۇيىمداستىرىلاتىندىعىن مالىمدەدى. سونىمەن قاتار جەرگىلىكتى «ۆەلودروم» ستاديونىندا 2024 -جىلدىڭ كۇنى بەكىتىلگەن وليمپيادالىق شەڭبەر سۋرەتى بار الىپ وليمپيادالىق موزايكا ورنالاستىرىلادى.
وسى جىلدىڭ 9-16-شىلدەسى ارالىعىندا ويىندارعا دايىندىق اياسىندا 2024 -جىلعى وليمپيادانىڭ رەسمي الاڭى رەتىندە بەكىتىلگەن مارسەل ايلاعىندا كەلەسى ويىندارعا ءبىرىنشى سىناق ءىس-شاراسى رەتىندە جەلكەندى سپورتتان حالىقارالىق جارىس ۇيىمداستىرىلدى. مارسەلگە شامامەن 1200 ادام، ونىڭ ىشىندە الەمنىڭ 55 ەلىنەن 352 سپورتشى كەلدى.
دەگەنمەن، مارسەلدىڭ كەيبىر تۇرعىندارى جارىس كەزىندە تەڭىزگە بارۋلارىنا قولايسىزدىقتار بولعانىن الەۋمەتتىك جەلىدە جازدى. الايدا ولاردىڭ سۋعا ءتۇسۋى ءۇشىن قالا ورتالىعىنداعى جاعاجايدا ارنايى ايماق ۇيىمداستىرىلعان بولاتىن. وسىعان قاراماستان فرانسۋزدىق كوممەنتاتورلار الداعى جارىس كەزىندە مارسەلگە كەلەتىن تۋريستەر سانىنىڭ ارتاتىندىعىن اتاپ وتۋدە. ال بۇل COVID-19 پاندەمياسىنىڭ تەرىس سالدارىنان كەيىن ەندى قالپىنا كەلىپ جاتقان جەرگىلىكتى تۋريستىك بيزنەس ءۇشىن وتە وزەكتى.
فرانسياداعى وليمپيادا الاۋىنىڭ باعدارى
وليمپيادا الاۋى فرانسيا جاعالاۋىنا جەتكىزىلگەننەن كەيىن ەل ىشىندە قۇرلىقپەن الىپ جۇرىلەدى. باعدار فرانسيانىڭ 64 ەلدى مەكەنىن باسىپ ءوتىپ، 2024 -جىلدىڭ 26-شىلدەسىندە پاريجگە جەتكىزىلەدى. جالپى، وليمپيادا سيمۆولىن شامامەن 10 مىڭ ادام كەزەك-كەزەك الىپ جۇرەدى.
ۇيىمداستىرۋشىلاردىڭ ۇيعارىمىنا سايكەس، وليمپيادا-2024 ەستافەتاسى قوعامداستىقتى فرانسيا تاريحىنا ۇڭىلۋگە مۇمكىندىك بەرەدى. فرانسيا تاريحىنىڭ ءاربىر ماڭىزدى كەزەڭىندەگى ەلدىڭ مارتەبەسى مەن ىقپالىنىڭ ارتۋىنا سەپتىگىن تيگىزگەن بىرەگەي ورىندار ايشىقتالىپ، ءتۇرلى داۋىرلەر اراسىنداعى ايشىقتى مەزەتتەردى بايلانىستىرۋعا تالپىنىس جاسالادى.
سونىمەن، الاۋ لاسكو ۇڭگىرلەرىنە، الەزيانىڭ ارحەولوگيالىق قازبا ورنىنا، ورتاعاسىرلىق كاركاسسون قالاسىنا، ۆەرسال سارايىنا جانە فرانسيانىڭ باسقا دا كوپتەگەن تاريحي ورىندارىنا بارادى. ارحيتەكتۋرالىق جاۋھارلاردى، كوپتەگەن شىركەۋلەر مەن ابباتتاردى، ونىڭ ىشىندە ايگىلى مون- سەنت- ميشەل ورنىن پاش ەتەدى.
الاۋ ەستافەتاسى فرانسيا تاريحىندا ءىز قالدىرعان ادامدارعا، اتاپ ايتقاندا ورلەانداعى جاننا د'ارك، سي-شازەلدەگى روبەرت شۋمان جانە كولومبە-لە-دە-ەگليزدەگى شارل دە گوللگە تاعىز ەتۋگە مۇمكىندىك بەرەدى.
ايتا كەتەرلىگى، 2024 -جىلعى وليمپيادا الاۋىنىڭ ديزاينىن جاساۋ 1974 -جىلى دۇنيەگە كەلگەن جانە الەمگە ايگىلى مامان فرانسۋز ديزاينەرى ماتە لەحاننەرگە بۇيىردى.
م. لەحاننەر ءارتۇرلى شىعارماشىلىق سالالاردا، وبەكتىلەردەن ساۋلەت ونەرىنە دەيىن، ونەردەن ءونىم ديزاينىنا دەيىن، بىرەگەي قولدان جاسالعان بۇيىمداردان وزىق ديزاين تەحنولوگيالارىنا دەيىن جۇمىس ىستەيدى. ونىڭ جوبالارى يننوۆاتسيانى، سيقىردى، ديزايندى، عىلىمدى، ونەردى جانە پايدالانۋشىلاردىڭ ءال- اۋقاتىن ارتتىرۋعا دەگەن ۇمتىلىستى بىرىكتىرەدى.
ۇيىمداستىرۋشىلارعا الەمنىڭ تۇكپىر-تۇكپىرىنەن 45 مىڭ ەرىكتى كومەكتەسەدى. ەرىكتىلەر بۇكىل فرانسيادا وليمپيادا جانە پاراليمپيادا ويىندارىنىڭ بارلىق رەسمي نىساندارىندا جۇمىس ىستەيدى جانە ءىس-شارانىڭ بارلىق اسپەكتىلەرىندە شەشۋشى ءرول اتقارادى. پاريج وليمپياداسىندا ەرىكتى بولۋ ءۇشىن اعىلشىن جانە فرانسۋز تىلدەرىن ءبىلۋ قاجەت.
وليمپياداعا دەيىنگى سىناق جارىستارى
2024 -جىلعى وليمپياداعا بۇكىل الەمنىڭ نازارى اۋاتىندىعىن ەسكەرگەن ۇيىمداستىرۋشىلار ويىندار باستالۋعا 12 اي قالعان كەزدە سىناق جارىستارىن باستاپ تا كەتتى.
ۇيىمداستىرۋ كوميتەتىنىڭ اتاپ وتۋىنشە، سىناق ويىندار كەزىندەگى جارىستاردىڭ ناقتى كوشىرمەسى بولۋعا ارنالماعان. ولار پاريج-2024 سول جىلىدڭ جاز ايىندا بارلىق جارىس وتەتىن نىسانداردىڭ ساقاداي- ساي بولاتىندىعىنا كەپىلدىك بەرۋ ءۇشىن جاسالىپ وتىر. سىناق جارىستارى ويىنداردىڭ بارىنشا ۇزدىكسىز جۇمىسىن قامتاماسىز ەتۋ ءۇشىن قاجەتى بولۋى مۇمكىن كەز كەلگەن وزگەرىستەردى انىقتاۋعا جانە ونى ەنگىزۋگە مۇمكىندىك بەرەدى.
سىناق ءىس-شارالارى مارسەلدە باستالدى. ونى جوعارىدا جەلكەندى سپورتتان وتكەندىگىن اتاپ وتكەن ەدىك.
ال تامىزدىڭ بۇل كۇندەرى پاريج قالاسىندا ءۇشسايىستان حالىقارالىق جارىس جوسپارلانعان. ۇيىمداستىرۋشىلار سەنا وزەنىنىڭ سۋ ساپاسىنا، سونىمەن قاتار جارىس كەزەڭىندە جول قوزعالىسىن ۇيىمداستىرۋعا ايرىقشا نازار اۋدارىپ وتىر.
سىناۋ باعدارلاماسى 2024 -جىلدىڭ ماۋسىمىندا «ستاد دە فرانس» ستاديونىندا وتەتىن جەڭىل اتلەتيكادان وپەراتسيالىق تەستپەن اياقتالادى.
پاريجدەگى وليمپيادانىڭ اشىلۋ سالتاناتى
2024 -جىلعى وليمپيادا ويىندارىنىڭ اشىلۋ سالتاناتى «رەۆوليۋتسيالىق» بولادى دەپ جوسپارلانعان. ۇيىمداستىرۋشىلار داستۇرگە اينالعان ستاديون اياسىندا وليمپيادا ويىندارىن اشۋدان باس تارتىپ وتىر. سالتاناتتى ءىس- شارانى پاريج قالاسىنىڭ نەگىزگى سۋ ارتەرياسى - سەنا وزەنىندە وتكىزۋ تۋرالى شەشىم قابىلداندى.
«ستاندارتتان تىس ويلاۋ، ويىنداردى رەۆوليۋتسيالاۋ، ءبىراق كەڭ بۇقارا ءۇشىن قولجەتىمدى بولىپ قالۋ - بۇل پاريج-2024 شەشەتىن مىندەت»، - دەلىنگەن وليمپيادا-2024 رەسمي سايتىندا.
وسىلايشا، سپورتشىلار شەرۋى سەنا وزەنىنىڭ ۇستىندە وتەدى. ءاربىر ۇلتتىق دەلەگاتسيا قايىقپەن جۇزەدى. قايىقتار كامەرالارمەن جابدىقتالادى. ياعني، ۇلتتىق دەلەگاتسيالار شەرۋىن تەلەكورەرمەندەر جاقىننان تاماشالاي الادى. 10,5 مىڭ سپورتشى شىعىستان باتىسقا قاراي قوزعالىپ، پاريجدىڭ ورتالىعىمەن ءجۇرىپ وتەدى. 6 شاقىرىمدىق شەرۋ تروكادەرو الدىندا اياقتالىپ، قالعان وليمپيادالىق حاتتاما ءىس-شارالارى مەن قورىتىندى شوۋ بولادى.
دەگەنمەن، فرانسيا بيلىگى قاۋىپسىزدىك ماسەلەسىنە ايرىقشا نازار اۋدارىپ وتىر. ءى ءى م باسشىسى جەرالد دارمانين وليمپيادا كەزىندە قىلمىستىق مۇلدە بولماۋ قاجەتتىگىن جاريا تۇردە مالىمدەپ وتىر. بۇل ءۇشىن 2024 -جىلى وتەتىن وليمپيادا جانە پاراليمپيادا ويىندارى كەزىندە قوسىمشا 2,8 مىڭ پوليتسيا قىزمەتكەرى مەن جاندارم جۇمىلدىرىلادى.
بۇعان قوسا، فرانسيانىڭ تۋريزم مينيسترلىگى الداعى وليمپيادا ويىندارى كەزىندە قوناقتارعا ارنالعان قوناق ۇيلەردىڭ قىمبات باعاسىمەن كۇردەسۋگە دە نيەتتى. وليمپيادا ويىندارى كەزىندە ونسىز دا قىمبات قوناق ۇيلەردىڭ ءبىر كۇندىك باعاسى ەكى، ءتىپتى ءۇش ەسەگە شارىقتاپ كەتۋى مۇمكىن. باسپانا ىزدەۋمەن اينالىساتىن تانىمال قىزمەتتەردىڭ ءبىرىنىڭ زەرتتەۋلەرىنە قاراعاندا، قازىرگى ۋاقىتتا فرانسيا استاناسىندا باسپانانى جالعا بەرەتىندەردىڭ ورتاشا تابىسى تاۋلىگىنە 119 ەۋرونى قۇراپ وتىر. ال 2024 -جىلدىڭ جازىندا بۇل باعا 221 ەۋرو، ءتىپتى ودان دا جوعارى بولۋى ىقتيمال. مۇنداي باعا ءوسىمىن تۇساۋ ءۇشىن فرانسيانىڭ تۋريزم مينيسترلىگى باسپانا قۇنىنىڭ نەگىزسىز ءوسۋىن قاداعالاپ وتىرۋ ماقساتىندا تۇرعىن جايدى جالعا بەرەتىن پلاتفورمالارمەن بىرنەشە كەلىسىمگە قول قويماق.
