گاز ساتىپ الۋ باعاسىن 2024 -جىلعا دەيىن وسىرمەي ۇستاپ تۇرۋ ۇسىنىلدى

بۇل تۋرالى بۇگىن سەناتتاعى ۇكىمەت ساعاتىندا اتالعان ۆەدومستۆونىڭ باسشىسى بولات اقشولاقوۆ ايتتى، دەپ حابارلايدى قازاقپارات ءتىلشىسى.
«ەلىمىزدىڭ ىشكى نارىعىن گازبەن تۇراقتى قامتاماسىز ەتۋ ماقساتىندا 2014 -جىلى مۇناي كەن ورىندارىندا وندىرىلەتىن گازدى ساتىپ الۋعا مەملەكەتتىڭ ارتىقشىلىق قۇقىعى بەرىلگەن ۇلتتىق وپەراتور ينستيتۋتى ەنگىزىلدى. ۇلتتىق وپەراتور - «QazaqGaz» ۇ ك» ا ق گاز ساتىپ الۋ باعاسى مەن ماگيسترالدىق تاسىمالداۋ تاريفتەرىن نەگىزگە الا وتىرىپ، تاۋارلىق گازدى كوتەرمە ساۋدادا وتكىزۋدى جانە گازبەن جابدىقتاۋدىڭ ءبىرىڭعاي جۇيەسى بويىنشا گاز تاراتۋدى ءبىرتۇتاس ديسپەتچەرلەۋدى جۇزەگە اسىرادى. بۇل سحەما مەملەكەتكە گاز باعاسىن ۇستاپ تۇرۋعا مۇمكىندىك بەرەدى» - دەدى مينيستر.
وسى ورايدا بولات اقشولاقوۆ كوتەرمە ساۋدا ۇلتتىق وپەراتور ءۇشىن زالال اكەلەتىندىگىن العا تارتادى.
«ول سۋبسيديالانادى جانە ەكسپورتتىق تۇسىمدەرگە تىكەلەي تاۋەلدى. ماسەلەن، 2015-2021 -جىلدار ارالىعىنداعى ۇلتتىق وپەراتوردىڭ زالالى - 587 ميلليارد تەڭگە. بۇعان دەيىن ايتقانىمداي، اعىمداعى باعانى QazaqGaz سۋبسيديالايدى جانە بۇل الەمدەگى ەڭ تومەن باعانىڭ ءبىرى بولىپ ەسەپتەلەدى. گازداندىرۋدى دامىتۋ جاعدايىندا تۇتىنۋدىڭ، ونىڭ ىشىندە گازعا نارىقتىق باعانى تولەۋگە قابىلەتتى جاڭا كوممەرتسيالىق تۇتىنۋشىلارمەن تۇتىنۋدىڭ وسۋىنە بايلانىستى ۇلتتىق وپەراتوردىڭ زالالدارى جىل سايىن ارتىپ كەلەدى. بۇگىنگى كۇنى كوتەرمە ساۋدادان بولعان زالال ترانزيتتىك جانە ەكسپورتتىق تۇسىمدەردەن ارتىق»، - دەدى ول.
ونىڭ ايتۋىنشا، وسىعان بايلانىستى مينيسترلىك ۇكىمەتكە جەر قويناۋىن پايدالانۋشىلاردان گاز ساتىپ الۋ باعاسىن 2024 -جىلعا دەيىن ۇستاپ تۇرۋ جونىندە ۇسىنىس ەنگىزگەن.
«اتالعان شارا ەلىمىزدىڭ الەۋمەتتىك وسال ازاماتتارى ءۇشىن شەكتى كوتەرمە باعالاردى ۇستاپ تۇرۋعا ىقپال جاسايدى. ۇلتتىق وپەراتوردىڭ قارجىلىق تۇراقتىلىعىن قولداۋ ءۇشىن قازاقستاندىق گاز رەسۋرستارىنىڭ شەكتەۋلىلىگىن، بۇل رەتتە حالىققا جانە ءىرى الەۋمەتتىك ماڭىزى بار نىساندارعا بولشەك باعانى ۇستاي وتىرىپ، كوتەرمە باعانى كەزەڭ- كەزەڭىمەن كوتەرۋگە قاتىستى ۇزاقمەرزىمدى باعالىق جانە تاريفتىك ساياسات قاجەت»، - دەدى مينيستر.