پرەمەر-مينيستر: گاز باعاسى 2024 -جىلعا دەيىن وزگەرمەيدى
نۇر-سۇلتان. قازاقپارات - ق ر پرەمەر-ءمينيسترى ءاليحان سمايىلوۆ ۇكىمەتتىڭ كەڭەيتىلگەن وتىرىسىندا تابيعي جانە تاۋارلىق گازدىڭ باعاسى ەكى جىل بويى 2021 -جىلعى باعا دەڭگەيىندە ساقتالاتىنىن ايتتى، دەپ حابارلايدى قازاقپارات ءتىلشىسى.
«ىشكى نارىق قوسىمشا 150 مىڭ توننا كولەمىندە سۇيىتىلعان مۇناي گازىمەن قامتاماسىز ەتىلەتىن بولادى. شيكى جانە تاۋارلىق گازدىڭ باعاسى 2024 -جىلعى 1-قاڭتارعا دەيىن وتكەن جىلعى جەلتوقسان دەڭگەيىندە بەكىتىلەتىن بولادى»، - دەدى ۇكىمەت باسشىسى.
سونداي-اق ول تاريفتىك ساياساتتى جەتىلدىرۋ جونىندەگى ءىس-شارالار شەڭبەرىندە تابيعي مونوپوليالار سۋبەكتىلەرى قىزمەتىنىڭ اشىقتىعىن ارتتىرۋ جانە ولاردىڭ ينۆەستيتسيالىق باعدارلامالاردى ىسكە اسىرۋىنا باقىلاۋدى قامتاماسىز ەتۋ جونىندە زاڭنامالىق شارالار قابىلداناتىنىن جەتكىزدى.
اۆتور: ەسىمجان ناقتىباي
